1 "Wandugu zangu na tati zangu, nitegeezani, nikamba uvunizi wangu!" 2 Wekutegeezao akatamwiiya kwa mbai ya Kiebulania, nee wanyamaa tui, naho Paolo akaendeea kugombeka.

3 "Miye ni Myahudi mvyaigwa wa mzi wa Taso mwe mzi wa Kilikia, akini khieewa hanu mwe mzi wa Yelusalemu, kwa mhinya Gamalieli. Kihinywa vyedi miko ya wadaa wetu, sheava kwa moyo wose kwa Muungu, inga nywie wenye mweivyo ivi ivyeo. 4 Khiwasuumiza wantu wose wa sia inu na kuwakoma, nikawagwia wagosi kwa wavyee na kuwagea mwe kifungo. 5 Mviki Mkuu na wadaa wa mkonga, waimanya mbui inu ni kwei, khihokea bauwa yekulawayo kwao yekugondwayo na kwegalwa kwa Wayahudi wekuwao mwe mzi wa Damesiki, nee naita Damesiki niwagwie wantu wa sia ida, niwaete mwe mzi wa Yelusalemu uku wazongotezwa minyololo ili wekhigwe sugusa.

6 "Nekuwaho siai kuita Damesiki, yabua saa mtandatu wa musi, vuu puu ung'azi mkuu kulawa uwanga kwa Muungu ukanimuika phande zose. 7 Aho nikagwa asi, nikategeeza mgutio ukanamba, ‘Sauli, Sauli! Kwabwai wanisuumiza?’ 8 Nikauza, ‘Wee ni ndai Zumbe?’ Nae nee amba, ‘Ni miye Yesu wa Nazaleti, unisuumizae.’ 9 Wada wantu wekuwaho hamwe nami nee waona uda ung'azi, akini khawekuva wala khutegeeza mgutio wa mntu ekuwaye atamwiiya na miye. 10 Nee nauza, ‘Zumbe nitende mbwai?’ Zumbe akanamba, ‘Gooka uite mwe mzi wa Damesiki, uko wendawembigwe yose ukundigwayo kugosoa.’ 11 Kuawana na uda ung'azi mkuu nchekudaha kuona, ivyo wada wezwangu wakanitoza mkono na kuniongoea adi mwe mzi wa Damesiki.

12 "Mwe mzi uda nekuwa na mntu yumwe zina dakwe Anania, mntu wa Muungu ekutozae miko ya Musa na Wayahudi wose weuko mwe mzi wa Damesiki nee wamtunya. 13 Nee eza na kugooka hehi yangu na kugombeka, ‘Sauli! Ona vituhu!’ Ahoaho nikoona vituhu nee namkauwa. 14 Aho Anania nee agombeka, ‘Muungu wa baba zetu kakusagua wee, ili umanye akundayo yee umuone yuda mndima yakwe yedi na udahe kumtegeeza mbui zakwe. 15 Kwaviya wendauwe mgombekaji wakwe kwa wantu wose kwa yada wekuonayo na kuyategeeza. 16 Isasa wagojani? Gooka ubatizwe naho uusiwe mavigaviga yako, ukadetanga zina dakwe.’

17 "Nekuuyaho Yelusalemu, nekuwaho navika he Nyumba ya Muungu, Muungu akanionyesha kintu, 18 nikamwona Zumbe akanamba, ‘Hauka kinyio mwe mzi wa Yelusalemu kwaviya wantu wa aha khawana wazumiie kuyategeeza yada ambayo kuyaona kuusu miye.’ 19 Nami nikamtambaisa, ‘Zumbe, wowo wamanya vyedi ni miye mwekuwa nemboka mwe Nyumba za kuvikia Wayahudi na kuwagwia na kuwatoa wada wekuwao wakakuzumia. 20 Kisingi mndima wako Sitefano akomwa, miye nee nihada, nikazumiiyaa kuwa akomwe na kuyaika vitana magwanda ya wada wekuwao wakamkoma.’ 21 Naho Zumbe akanamba, ‘Hita, kwaviya nendanikuagiie hae kwa wantu ambaho khio Wayahudi.’ "

22 Wada wantu wakamtegeeza Paolo, akini ekugombekaho mbui iyo, wakavoka kugombeka kwa mgutio mkuu, "Muuseni aha! Mkomeni! Mntu inga uyu khakundigwa kubadwa mgima!" 23 Wakaendeea kutoa vuzo, uku wakasingisa singisa magwanda yao, na kutambika sanga uwanga kwa maya. 24 Mkuu wa maasikai akawaagiiya wantu wakwe wamwegae Paolo mwe khambi, nee awamba wamtoe Paolo ngoda ili wamanye kwaajii yani Wayahudi wamtoea vuzo. 25 Akini wekumzongomezaho sigi ili wamtoe ngoda, Paolo nee amuuza asikai yumwe ekuwaye hehi yakwe, "Kuawana na miko ivi yadahika kumtowa ngoda mntu wa si ya Lumi ambaye khazati kuoneka na masa?"

26 Yuda asikai ekutegeezaho ayo, nee amuuza mkuu wa maasikai, "Waonda kutenda mbwai? Mntu uyu ni wa si ya Lumi!"

27 Yuda mkuu wa maasikai, akamtimia Paolo akamwamba, "Nambia, wee u mntu wa si ya Lumi?"

Paolo akatambaisa, "Eehe."

28 Yuda mkuu wa asikai nee agombeka, "Miye khiwa mntu wa si ya Lumi kwa kuiha galama khuu ya hea."

Paolo akatambaisa, "Miye ni mntu wa si ya Lumi kwa kuvyaigwa."

29 Wada wantu wekuwao waonda kumuuza Paolo, wakahauka kinyio ata yuda mkuu wa maasikai akaogoha ekumanyaho Paolo ni mntu wa si ya Lumi, na kabinda kae kumzongomeza minyololo.

30 Kioi yakwe, mkuu wa maasikai nee akakunda kumanya yada masa ambayo Wayahudi wamuahia, ivyo akamvugua Paolo, akaagiiya waongoezi wa waviki na mkonga wose wakintane, naho akamueta Paolo nee amgoosa hemeso ya mkonga.