1 Petulo na Yohana wekuwaho wakatamwiiya na wantu, waviki na mkuu wa wagoji wa Nyumba ya Muungu hamwe na Masadukayo wakabua. 2 Wakimwa muno kwaajii awo waagiiwa newawa wakawabiikia wantu kuwa uyuyuko wa Yesu waonyesha kuwa wekuuyao na nyuma wendawayuyuswe kulawa kwe wekufao. 3 Nee wawagwiia Petulo na Yohana na kwaviya kiza ne kihehi kwengia wakawaikia wagoji adi kioi yakwe. 4 Akini wantu wangi gatigati ya wada wekutegeezao ubiikizi uwo wekugombekwao ni Petulo na Yohana wakazumiia, na wantu wekuzumiao newawa wagosidu elufu shano.

5 Kioi yakwe waongoezi wa Wayahudi na wadaa na wahinyi wa miko wakakintana hamwe uko mwe mzi wa Yelusalemu. 6 Mwe mkonga huo nekuwa na Anasi Mviki Mkuu na Kayafa na Yohana na Alekizanda na watuhu wekuwao wa muango wa Mviki Mkuu. 7 Wekuwagoosaho waagiiwa wa Yesu hemeso yao, wakawauza, "Nywie mgosoa mbui inu kwa udaho wa ndai na kwa zina da ndai?"

8 Aho Petulo uku akaongoewa na Muye wa Muungu akawamba, "Nywie wagookezi na wadaa wa wantu, 9 ikawa mwatiuza ivyeo ida mbui ntana ekugosoewayo yuda mntu mwekuviya miundi na viivihi ekuhonywavyo, 10 naho nywie na wantu wose wa Isilaeli mwakundigwa kumanya kuwa mntu uyu agookae hemeso yenu ivyeo ni mgima du kwa udaho wa zina dakwe Yesu Klistu wa Nazaleti. Uyo nee Yesu mwekumgong'ondae he mhamba akini Muungu akamyuyusa. 11 Uyu Yesu nee ambae Maandiko ya Muungu yagombeka,

‘Iwe mwekudiemeado nywie wazengi

Isasa diwa iwe kuu da muhimu da kuzengea.’

12 Yesu ikedu nee adahae kuwaohoa wantu, kwaviya mweinusi na uwanga kwa Muungu khahana mntu yoyose ambaye Muungu kamuika ili atiohoe swie."

13 Wada waongoezi na wadaa wa uda mkonga wekuonaho utintimavu wa Petulo na mweziwe Yohana na kumanya kuwa newawa wantu wesaho na umanyi, wakahondomaa muno. Wakamanya kuwa wantu awa newawa hamwe na Yesu. 14 Akini wekumuonaho yuda mntu mwekuviya miundi kahonywa, naho kagooka hamwe na Petulo na Yohana khawokudaha kugombeka kintu chochose. 15 Ivyo ne wawakunda walawe chongoi ya uda mkonga, naho wowo wakasigaa mda ndani ne watamwiiya wowo wenye. 16 Wakauzana "Tiwatende mbwai wantu awa? Kia mntu mwekaa mwe mzi wa Yelusalemu amanya utangio unu wekugosokaho na swie khatidaha kuemea mbui iyo. 17 Akini ili tidahe kuikindia mbui inu isekuambazwa gatigati ya wantu tiwaemeze wasekutamwiia kwa mntu yoyose kwa zina da Yesu."

18 Naho wakawetanga vituhu mda ndani wakawaemeza wasekutamwiia vituhu hewazo na wala kuhinya katu kwa zina da Yesu. 19 Akini Petulo na Yohana wakawatambaisa, "Tiamwiiyeni nywie wenye inga ni vyedi hemeso ya Muungu kuwategeeza nywie hambu kumtegeeza Muungu. 20 Kwaviya khatidaha kubada kutamwiiya kuusu mbui ida tekuiyonayo na kuitegeeza." 21 Nee awo wadaa wa mkonga wakawahaza kwa ukai muno na kuwabada waite, khawokudaha kuwekha sugusa kwaajii wantu wose newawa wakamtogoa Muungu kwaajii ya utangio uwo. 22 Uyo mntu mwekuviya miundi ekugosoewae utangio wa kuhonywa nekawa na myaka yemboka makumi mane.

23 Petulo na Yohana wekuwekewaho, wakauya kwa wezwao wakawamba yada wekwembiwayo na waviki wakuu na wadaa. 24 Nao wekumzumiao Yesu wekutegeezaho mbui izo wakawa hamwe na kumvikia Muungu wakamba, "Zumbe wee nee mwekugosoa uwanga kwa Muungu na inusi na mazimshindo na vyose vyeumo! 25 Wee nee mwekumgosoa mndima yako tati yetu Daudi, kwa udaho wa Muye wa Muungu akagombeka,

‘Kwa mbwai wantu wesaokuwa Wayahudi wakimwa?

Kwambwai wantu wamamakhanya mbui za bue.?

26 Maseuta wekuswagulwao na Muungu wa inusi wekaa tayali na waongoezi

Wakintana hamwe

Kuhigana na Zumbe na Klistu wakwe.’

27 Kwaviya ki ukwei neivyo Helode na Pontio Pilato na wantu wose wa Isilaeli na wantu wesaokuwa Wayahudi wekukintanaho hanu mwe mzi wa Yelusalemu, kumuemea Yesu, mndima yako mng'azi Klistu wekumsagua. 28 Haika nee wakintana ili wagosoe mbui ziya wekukundazo na kuteganya kuvokea bosi kwa udaho wako na kwakukunda wee mwenye. 29 Isasa wee Zumbe kauwa watitisavyo, utiambize swie wandima wako tibiikie mbui zako kwa utintimavu. 30 Wee uonyeshe udaho wako wa kuwahonya wantu, utiambize ili tiwe tagosoa vihii na utangio kwembokea zina da Yesu mndima yako Mng'azi."

31 Wekubindaho kuvika hantu hada wekuwaho wakintana hakasingiswa. Nao wose wakaongoewa na Muye wa Muungu, wose wakavoka kubiikia mbui ya Muungu kwesiho kuogoha.

32 Naho wada wose wamzumiiyao Yesu newawa hamwe mwe mamakhanyi zao na mwe mioyo yao. Khahana hata yumwe kwekaa na kintu chochose akakiika kuwa ni mai yakwe mwenye, iya nee wakapangana vyose wekuwavyo navyo. 33 Waagiiwa wa Yesu wakabiikia mbui ya kuyuyuka kwa Zumbe Yesu kawavuhuzia kwa nguvu nyingi na Muungu akawajaiya wedi wose. 34 Khahana mntu yoyose mwekuhungukiwa na kintu kwaajii wekuwao na minda au nyumba newawa wakavitaga, na wakaeta hea ya vintu wekutagavyo, 35 na izo hea wakawekha waagiiwa wa Yesu zikapangwa kwa kia yumwe ekuhungukiwavyo.

36 Nekuwa na Mlawi yumwe mvyaigwa wa Kipulo zina dakwe Yusufu ambae waagiiwa wa Yesu wamwetanga Balinaba maana yakwe, "Mgea moyo wantu." 37 Yee pia kawa na mnda wakwe akautaga akazidoa zia hea akawekha waagiiwa wa Yesu.