1 Kwa mbuyangu Teofilo.

Mwe kitabu changu nekuongoacho kuandika, mbui zose Yesu ekugosoavyo na kuhinya kuvokea bosi wa ndima yakwe, 2 adi msi uda ekudoigwaho kuita uwanga kwa Muungu, kabla ya kudoigwa uwanga akawekha miagiiyo kwa sia ya Muye wa Muungu kwa wada waagiiwa ekuwasaguwao. 3 Kwa misi makumi mane bada ya ufe wakwe nee kawalawiiya maa nyingi kwa namna ekweavizavyo kuwa yu mgima. Nee wamuona, nae akagombeka nao mbui ya Useuta wa Muungu. 4 Kisingi kimwe ekuwaho ada nao akawaagiiya, "Msekuhauka Yelusalemu iya gojani dia funge Tate ekuwaikiado kiaga ambado mnitegeeza kae nikagombeka kuusu mbui izi. 5 Yohana kawabatiiza kwa mazi, akini mwe misi micheche yezayo, nywie mwendambatiizwe kwa Muye wa Muungu."

6 Wahina wekuwaho hamwe na Yesu ne wamuuza, "Zumbe, kisingi iki nee wendaho uvuze uda useuta kwa Isilaeli?"

7 Yesu akawamba, "Kisingi na msimu wa mbui iyo amanya udaho wa Tate yangu, naho nywie khamkundigwa mmanye vindaviwe ini. 8 Akini kisingi Muye wa Muungu wendaho uwezee nywie, mwendamhokee udaho nanywi mwendemuwe wavuhuzi wa mbui zangu mwekuzionazo mwe mzi wa Yelusalemu mwe si ya Yudea na si ya Samalia na mwe inusi ngima." 9 Ekubindaho kugombeka ayo, wose wakamkauwa akadoigwa na kuita uwanga kwa Muungu, zunde dikamfisa na khawekumwona vituhu.

10 Wekuwaho wafua meso uwanga, kisingi Yesu adoigwa kuita uwanga kwa Muungu, ahoaho wantu waidi wekuwao wavaa ngwanda zekung'aazo pee wakagooka hehi nao, 11 wakagombeka, "Nywie wantu wa Galilaya, kwambwai mwagooka hanu mkakauwa uwanga? Uyu Yesu, mwekudoigwa kuawa aho henu na kuita uwanga kwa Muungu endaeze vituhu inga mwekumwonavyo akaita uwanga kwa Muungu."

12 Naho wagiiwa wa Yesu wakauya mwe mzi wa Yelusalemu kuawa muima wa mizaituni wekuwao hehi na mzi wa Yelusalemu, uhae wa kwenda kwa miundi misi mfungate kulawa mwe mzi. 13 Wekubuaho mwe mzi wa Yelusalemu wakaita mwe chumba chekuwacho uwanga goofani, wekuwao wekaa aho nee ni awa, Petulo na Yohana na Yakobo na Andulea na Filipo na Tomaso na Batolomayo na Matayo na Yakobo mwana wa Alifayo na Simoni wa Zelote na Yuda mwana Yakobo. 14 Awa wose waliendeea kukintana hamwe na kuvika, hamwe na wavyee na Malia mami yakwe da Yesu hamwe na wanduguze.

15 Msi umwe mwe misi izo, nee wakintana wazumizi wekubuaho wantu mia mwenga na ishiini, naho Petulo akagooka gatigati wada wandugu. 16 Petulo akamba, "Wandugu nee ikundigwa Maandiko ya Muungu yaiganie yada ekugombekayo Muye wa Muungu aho kae, kwa kanwa cha Daudi kaavya uwoni wa mbui za Yuda mwekuwaongoeya wantu wekumgwiiyao Yesu. 17 Yuda nekawa mwezwetu kwaviya kasagulwa ni Yesu tigosoe ndima nae."

18 Akagua mnda kwa hea ekupatazo kulawana na mbui yakwe ya mavigaviga ekugosoayo, akagwa umo akagonea ifu, akatumbuka ifu dakwe utumbo ukalawa chongoi. 19 Kia mntu mwe mzi wa Yelusalemu akategeeza mbui ya kihii icho na ivyo kwa mbai yao uda mnda wakawetanga, "Akelidama," mana yakwe "Mnda wa phome."

20 Petulo akagombeka, "Iandikwe mwe kitabu cha Zabuli,

‘Hantu hakwe kusigae khahana kintu

Mntu yoyose asekwekaa.’

Naho igondwa,

‘Na mntu mtuhu adoe hantu hakwe.’

21 "Asa takundigwa tisague mntu yumwe mwekuwa na swie mda wose Zumbe Yesu ekuwahonaswi kiya hantu nee tikenda nae awe hamwe na swie. 22 Uyo akundigwa awe yumwe aho ya wada tekutongeana nawo, kuvokea Yohana ekuwaho abatiiza adi msi uda Yesu ekudoigwaho kulawa kwetu kuita uwanga kwa Muungu. Uyo endaawe hamwe na swie adoe ndima ya kuvuhuzia uyuyuko wa Yesu."

23 Aho wakasagua mazina ya wantu waidi, wa bosi etangwa Yusufu etangwae Balisaba na viyaviya etangwa Yusito na wakaidi Matia. 24 Naho nee wavika, "Zumbe, wee waimanya mioyo ya wantu wose, ivyo utionyeshe ni yuhi mwe wantu awa waidi wekumsaguaye, 25 ili adoe hantu ha ndima inu ya kubiikia ekuibadayo Yuda akaita hantu hakundigwaho kuwaaho." 26 Wekutoawo kula, naho wakamsagua Matia akaomeewa na wada waagiiwa kumi dimwe na mwenga.