1 Paolo akawafuiya meso wantu wekuwao he uda mkonga na kugombeka, "Wandugu zangu Waisilaeli, yada yedi nekuyasaguayo yanionyesha ni viivihi nekukaisavyo hemeso ya Muungu adi ivyeo." 2 Ekugombekaho mbui iyo, Mviki Mkuu Anania akaagiiya wada wekugookao hehi na Paolo wamtoe kibao he muomo. 3 Paolo akamwamba, "Muungu mwenye endaakutoe kibao wee, wekuae inga ukanto wekuhakwao nchokaa! Wadaha viivihi kwekaa aho ili uniamuie kwa miko, uku wee mwenye khutozeeza miko kwa kukunda miye nitoigwe!"

4 Wada wantu wekuwao wagooka hada wakamwamba Paolo, "Wee wamdumua mviki mkuu wa Muungu?"

5 Paolo akatambaisa, Wandugu zangu Waisilaeli, nchekumanya ati yee ni mviki mkuu, kwaviya igondwa "Usekumgombekea ya ufyaimu kwa mkuu wa wantu wako."

6 Paolo ekumanyaho phande mwenga ni Masadukayo, na phande ntuhu ni Mafalisayo, nee agutia kwa mgutio mkuu, "Wandugu zangu miye ni Mfalisayo mwanangwa wa falisayo, khietwa he kuamuiwa kwaviya nakauwiiya kuwa wekuuyao na nyuma wenda wayuyuke!"

7 Ekubindao kugombeka ivyo, hakaawia kuemana gatigati ya Mafalisayo na Masadukayo na mkonga mkuu nee wepanga mazumwezumwe maidi. 8 Kwaviya Masadukayo wagombeka wekuuyao na nyuma khawana wayuyuke, na khahana mndima wa Muungu wa uwanga wala muye, akini Mafalisayo wayazumiiya ayo yose matatu. 9 Kukaawia mahigano makuu, nao wamwe wa wahinyi wa miko ambao ni Mafalisayo, wakagooka na kuhigana kwa nguvu wakigombeka, "Khationa masa yoyose kwa mntu uyu! Yadahika muye au mndima wa uwanga kwa Muungu katamwiiya nae!"

10 Zogo dikawa kuu hata mkuu wa maasikai akaogoha kuwa wadaha kumsenga Paolo ntiintii, ivyo nee awaagiia asikai wakwe gatigati ya Wayahudi wamdoe Paolo kwa nguvu na kumwengiza ndani ya khambi ya maasikai.

11 Kio kia, Zumbe akagooka hehi na Paolo nee amwamba, "Usekuogoha inga wekuwambavyo mbui zangu wantu wa mzi wa Yelusalemu, wakundigwa utende inga ivyo uko mwe mzi wa Lumi."

12 Kwekuchaho Wayahudi wakekaa hamwe hantu kwesiho wantu, nee waika ninda, nakugombeka khawana wade wala kudomea adi aho wendaho wamkome Paolo. 13 Wekwembizanao nteganyi iyo newawa zaidi ya wantu makumi mane. 14 Wakaita kwa waongoezi wa waviki na wadaa na kugombeka, "Swie tiaha kuwa khatina tide wala kudomea chochose adi aho tendao timkome Paolo. 15 Isasa nywie hamwe na Mkonga mumuombeze Mkuu wa maasikai awaetee na mtende inga mwakunda mzitegeeze vitana mbui ambazo mumkoea masa. Swie tendatimbengee siai na kumkoma kisingi khazati kubua aho."

16 Akini mwana wa umbu dakwe Paolo ekutegeezaho mbui iyo ya ufyaimu, nee aita kuda kwe khambi da maasikai na kumwamba Paolo mbui iyo. 17 Aho Paolo akamwetanga mgookezi yumwe wa asikai akamwamba, "Mwegae uyu mbwanga kwa mkuu wa maasikai, ana mbui ya kumwamba." 18 Yuda mgookezi wa masikai akamdoa yuda mbwanga na kumwegaa adi kwa mkuu wa maasikai akamwamba, "Yuda mvugaiwa Paolo kanetanga nee aniagiia nimuete uyu mbwanga kwako kwaviya ana mbui ya kukugombeka."

19 Yuda mkuu wa maasikai, akamtoza mkono yuda mbwanga na kumwegaa hantu kwesiho wantu, nee amuuza, "Una mbui yani ya kunigombeka?"

20 Yuda mbwanga akagombeka, "Wayahudi wevana wakuombeze umwegae Paolo he mkonga wao kioi, wetenda kuwa wakunda kumanya vitana mbui zakwe. 21 Akini wee usekwevana nao kwaviya wauko wantu zaidi ya makumi mane watayali kumbengea. Waika kiaga kugombeka khawana wade na kudomea chochose adi aho wendaho wamkome. Isasa wa tayali, naho wagoja uamua wako."

22 Mkuu wa maasikai akambada yuda mbwanga aite, akini akamhaza akamwamba, "Usekumwamba mntu yoyose kuwa kunamba mbui izi."

23 Naho mkuu wa maasikai akawetanga wagookezi waidi wa maasikai nee awamba. "Ikeni tayali asikai mia mbii na wakwea falasi makumi mfungate na watuhu mia mbii wa maguha, muite mwe mzi wa Kaisalia, saa ntatu ya kio ivyeo. 24 Ikeni tayali falasi watuhu kwaajii ya Paolo, mbuzeni vyedi kwa Felikisi mkuu wa Kilumi." 25 Mkuu uyo wa maasikai ne andika bauwa igombekayo.

26 "Kwa mkuu wa Lumi Felikisi miye Kilaudio Lusia nakuugusa. 27 Wayahudi nee wamgwia mntu uyu na wakakunda kumkoma nekumanyaho kuwa yee ni mntu wa si ya Lumi nee naita na asikai kumuohoa. 28 Nikamwegaa he mkonga mkuu wa Wayahudi nikakunda kumanya mbui wekumuahiao masa. 29 Nikoona kuwa wamuahia masa kwa mbui za miko yao, akini nchekuona mbui yoyose au masa yoyose yamkundayo agewe mwe kifungo au akomwe. 30 Nekumanyiswaho Wayahudi wakunda kumkoma, nikoona vyedi kumueta kwako, nee nawamba wamasa wakwe waete masa yao kwako."

31 Aho, wada asikai wakamdoa Paolo inga wekuagiiwavyo, nee wamwegaa kio kiakia hadi mwe mzi wa Antipatili. 32 Kioi yakwe asikai wendao kwa miundi wakauya mwe khambi, nee wawabada wada asikai wakweao falasi waendeee na ntambo hamwe na Paolo. 33 Wekubuao mzi wa Kaisalia, nee wamwekha ida bauwa yuda Mkuu na kumwekhiza Paolo kwakwe. 34 Felikisi ekuisomaho bauwa, nee awauza wantu Paolo kalawia mzi wani? Ekugombekwaho kuwa kaawia mzi wa Kilikia, 35 nee agombeka, "Nenda nitegeeze masa yako aho wamasa wako wendaho wabue." Naho akaagiiya Paolo aikwe kwe ugoji ndani ya nyumba ya useuta ya Helode.