1 Kisingi Apolo ekuwaho Kolinto, Paolo nee katamba mwe si ya Asia, akabua Efeso, na uko nee awabwiia wamwe wa wahina, 2 akawauza, "Mumhokea Muye wa Muungu aho mwekumzumiaho Klistu?"

Nee wamtambaisa, "Hata khatizati kutegeeza kuwa kuna Muye wa Muungu."

3 Naho Paolo akawauza, "Uwo mbatiizwa kwa ubatiizo wa viivihi?"

Nee wamtambaisa, "Tibatizwa kwa ubatiizo wa Yohana."

4 Paolo akagombeka, "Yohana nekawa abatiiza wantu koonyesha kuwa wahituka na kubada mavigaviga yao, nekawa akawamba kuwa wamzumie yuda endaeeze bada yakwe ambae nee Klistu."

5 Wekutegeezaho ayo wakabatizwa kwa zina da Zumbe Yesu. 6 Nee Paolo akawaikia mikono wantu wada uwanga ya mitwi yao na Muye wa Muungu ukawezea wakavoka kutamwiiya kwa mbai mphya na kugombeka mbui ambazo Muungu endazoagosoe. 7 Wantu Wose wekuwao hada newawa wagosi kumi dimwe na mbii.

8 Kwa kisingi cha miongo mitatu Paolo nekawa akaita mwe Nyumba ya kuvikia Wayahudi, akagombeka kwa utintimamavu na wantu, newawa na matambaisano na kugeeza kuwabibiiza kuusu Useuta wa Muungu. 9 Akini wamwe wao wakahigana wakaemea kuzumiiya na kudumua mbui ya Paolo hemeso ya zumwezumwe da wantu, aho Paolo akabadana nao, akawadoa khandani wada wahina wakwe, akawa atamwiiya nao kia msi mwe zumba da Maandiko da Tilano. 10 Akaendeea kugosoa ivyo kwa mda wa myaka miidi hata wantu wose wa Asia, Wayahudi na wantu wesao kuwa Wayahudi wakadaha kutegeeza mbui ya Zumbe.

11 Muungu kagosoa vihii vikuu kwembokea Paolo. 12 Hata vitambaa vya mikono na nguo ntuhu zekudontazo mwii wa Paolo, nee zaikwa uwanga ya watamu, nao wakahona matamu yao na mazaiko yakawalawa. 13 Nehawa na Wamwe wa Wayahudi wekuwao wakaita uko na uko wakaditumia zina da Zumbe Yesu kuyamba mazaiko, "Kwa zina da Yesu yuda abiikiwae na Paolo tawaagiia mlawe." 14 Wamwe wa wantu wekuwao wagosoa ivyo newawa wabwanga mfungate wa mntu etangwae Sikewa, ambae nekawa mviki mkuu wa Kiyahudi.

15 Akini msi umwe zaiko dikawatambaisa wana wa Sikewa, dikamba, "Yesu nammanya, Paolo nammanya, akini nywie ni wakina ndai?"

16 Naho yuda mntu mwekukwewa ni mazaiko akawasookea wose, na kuwavota, na kuwatoa muno. Nao wana wa Sikewa wakalawa mwe kaya ida wakaguuka kimbwigii na uku wamema vionda. 17 Kia mntu uko mwe mzi wa Efeso, Myahudi na mwesae kuwa Myahudi akategeeza mbui iyo, nee wose wengiwa ni maatu na kuditogoa zina da Zumbe Yesu. 18 Wantu wangi wekumzumiiyao Yesu nee weza na kuzumiya hewazo mbui zao za ufyaimi. 19 Watuhu wekuwaho wagosoa usawi aho bosi wakavidoa vitabu vyao, wakavyoka moto hemeso ya wantu wose. Wekugosoaho ntaazia ya ghalama ya vitabu ivyo neiwa ya hea nyingi muno iiganayo na ghalama ya shiingi ya madini ya feza ya elufu hamsini. 20 Ivyo kwa udaho wa Zumbe mbui ya Muungu ikaendeea kweambaza na kuwa na nguvu.

21 Yekwembokaho ayo yose Paolo akavoka kuita Yelusalemu kwa kwembokea Makedonia na Akaya, akagombeka mwenye, "Nikabinda kubua uko yakundigwa pia niite Lumi nako." 22 Ivyo akawaagiiya wambizi wakwe waidi, Timoseo na Elasito, waongoe kuita Makedonia nae akasigaa kwa mda uko Asia.

23 Kisingi icho nee hekulawiiaho khumbizi khuu uko Efeso kwaajii ya sia ya Zumbe. 24 Nekuwa na mntu yumwe msongoaji wa vizuu vya madini ya feza zina dakwe Demetilio, ndima yakwe nee nikugosoa vizuu viiganavyo na nyumba ya muungu wao wa kivyee Atemi, ndima iyo nee ikaeta hea nyingi kwa kutaga ivyo vizuu. 25 Demetilio akawetanga awo wagosoa ndima hamwe na watuhu wekuwao na ndima inga iyo akawamba, "Nywie wantu mwamanya kuwa kipato chetu chalawana na biashaa inu. 26 Isasa mwadaha kutegeeza na kweonea wenye mbui ambazo Paolo agosoa, khio hanu Efeso du iya mwe inu Asia yose, yee awabibiiza na kuwahitua wantu nao wazumia kuwa miungu ida yekugosolwayo ni wantu khio miungu katu. 27 Iyuko hatai khio du kwa biashaa yetu indayaze zina dakwe ntana, iya hata nyumba ya muungu wa kivyee mkuu Atemi dendadibewe, na yuda mungu wa kivyee avikiwae mwe mzi wose wa Asia na mwe inusi, wendaubaigwe ukuu wakwe wa kimuungu!"

28 Wekutegeezaho ayo, wakamema maya wakavoka kutoa vuzo, "Atemi wa Efeso nee mkuu!" 29 Mzi wose ukamema khumbizi, wakamfuntia Gayo na Alisitaliko, wenyezi wa Makedonia ambao newawa watambaji weziwe Paolo, wakaguuka nao adi kwe uwasa wa misizigo. 30 Paolo mwenye akakunda ahigane na ido zumwezumwe da wantu, akini wada wahina wa Klistu wakamuemeza. 31 Wakuu wa hantu ha Asia wekuwao wambuya wakwe wakamwegaia Paolo mbui, na kumhaza asekwengia kwe uwasa wa misizigo. 32 Ndiho wantu wekuikao bunga hada nee wavuugika muno, wakatoa vuzo kugombeka, watuhu newawa wagombeka ivi watuhu wagombeka dia. Wangi khawekumanya ambado wadiikia bunga hamwe. 33 Kwaajii Wayahudi nee wamsindika Alekizanda hemeso ya zumwezumwe da wantu, wamwe wa wantu mwe dia zumwezumwe wakamwamba ya kugombeka ndiho Alekizanda akawekha utangio kwa mikono yakwe ili wanyamae evunie. 34 Akini wekumanyaho kuwa yee ni Myahudi wose kwa mgutio umwe wakatoa vuzo, "Atemi nee mkuu wa Efeso!" Wakaendeea kutamwiyiatamwiya yesayo kutama ivyo kwa mda wa masaa maidi.

35 Kisikizi muandikaji mkuu wa mzi uda akadaha kutuiiza dia zumwezumwe da wantu, akamba, "Wantu wa Efeso kia mntu amanya mzi unu wa Efeso ni semgoja wa nyumba ya muungu etangwae Atemi na hamwe na kizuu chekuandikwacho kulawa uwanga kwa Muungu. 36 Khahana adahae kuiemea mbui iyo, naho twiani msekugosoa dodose kinyionyio. 37 Muwaeta wantu awa hanu hetiho khawakubawa kintu mwe nyumba ya muungu wala khawakumdumua muungu yetu wa kivyee. 38 Akini ikawa Demetilio na mafundi weziwe wana mbui na wantu awa wakundigwa kuwakoea masa hemeso ya waamua wa miko. 39 Inga mna mbui ntuhu muikundayo, yegaeni mwe vyekao vya miko vimanyikanavyo. 40 Timwe hatai ya kukoewa masa kwaajii ya khumbizi ya ivyeo, khatina mbui yoyose ya kugosoa khumbizi inu na khatidaha kugombeka mbui yoyose ya kuigania." 41 Ekubindaho kugombeka akawamba wantu wahauke.