1 Wekuamuaho kutamba adi mzi wa Italia, ne wamuika Paolo hamwe na wafungwa watuhu kwe ugoji wa Yulio mwekuwa mkuu wa kizumwezumwe cha asikai chetagwacho "Augusito." 2 Tikakwea meli yekulawayo Adilamito, yekuwayo ihehi kutamba kuita bandali zekuwazo phwani ya mzi wa Asia, tikavoka ntambo yetu, tiwa hamwe na Alisitaliko mvyaigwa wa Makedonia kulawa Sesalonike. 3 Kioi yakwe tikagooka mwe bandali ya Sidoni. Yulio akamtenda vyedi Paolo kwa kumuekea awaone wambuya wakwe na kupata vintu ekukundavyo. 4 Kulawa uko tikengia mwe mazimshindo vituhu na kwembokea phande ya kisiwa cha Kipulo kwaajii khusi nee ikahigana naswi. 5 Tekudumuaho mazimshindo yekuwayo phande ya Kilikia na Pamfilia, tikabua Mula uko mwe mzi wa Likia. 6 Yuda mkuu nee abwiiya meli mwenga ya Alekizandilia yekuwayo ikaita mwe mzi wa Italia, akatikweza umo.

7 Tikatamba phahoe kwa misi mingi na kwa suuba, kisikiizi tikabua hehi na mzi wa Nido. Kwaajii khusi nee iwa khai, ikatikindia tesekudaha kutoza sia tekukundayo temboke, tikemboka Kilete khandani ya Salimoni ambaho pheho khayokuwa khai. 8 Tikaendeea kwemboka phwani kwa suuba, tikabua hantu hetangwaho, "Bandali Ntana" Hehi na mzi wa Lasea.

9 Mda mwingi nee waga na kwaviya zemboka misi za kwehiniza kuda nee ni hatai kutamba kwaajii mazimshindo yakumbwadiswa. Ivyo Paolo akawahaza na kugombeka, 10 "Wagosi minaona inu ntambo indaiwe ni ya hatai muno nahodu khio kwa fuushi du na meli iya na kwa ugima wetu." 11 Akini yuda mkuu wa asikai khekumtegeeza kwa yada agombekayo Paolo, iya yee nee akamtegeeza deeva wa meli na mwenye meli. 12 Kwaviya Bandali iyo khayokuwa hantu hedi hakwekaa kisingi cha pheho, wangi wakakunda kuendeea na ntambo na ikadahika waite hadi Foinike he Bandali ya Kilete iitayo kusini kwa usweo wa zua na kaskazini kwa usweo wa zua na uko wenda wadahe kwekaa kisingi cha pheho.

13 Aho pheho yekutuiaho ikavoka kuvuma kulawa kusini, wakamamakhanya wendawadahe kuendeea na ntambo yao, ivyo wakausa iwe dekutozeezado meli na kuvoka kutamba, wakembokea khandani ya kisiwa cha kilete. 14 Akini bada ya kisingi kijihi kukaawiya khusi khuu yetangwayo "Khusi ya kasikazi" ivoka kukema kuawa mwe mazimshindo. 15 Khusi iyo khuu ikatoa meli, naho kwaviya khayekudahika kuhigana nayo, tikabada meli idoigwe na khusi iyo. 16 Kisiwa kimwe chetagwacho Kauda kikatikindia na ida khusi na tekwembokaho kusini mwake tikadaha, etiho kwa suuba, tuliifunga ngaawa ida na kuiohoa. 17 Wada wantu nee waubuuta mtumbwi khandani, naho wakaizengeteza meli sigi na kuifunga kwa nguvu. Newaogoha kuwa wendawahate mwe sanga, phwani ya Libia, ne waseeza matanga na kuiekea meli idoigwe na khusi. 18 Mkubwaniso ukaendeea kukema na kioi yakwe wakavoka kwasa chongoi fuushi zekuwazo mwe ida meli 19 Msi wa tatu wakavoka kwasa vintu vya meli mwe mazi kwa mikono yao wenye. 20 Kwa misi mingi khatekudaha koona zua wala ntoondo, khusi khai ikaendeea kukema muno, hata makauwiyo ya ugima wetu yakaga.

21 Bada ya kwekaa misi mingi kwesiho kuda khande, Paolo ne agooka gatigati yao na kugombeka, "Wagosi! Neiwa vyedi kunitegeeza na kueka kutamba kulawa Kilete, inga nee mtenda ivyo ne muhona na ubanasi wose unu. 22 Akini isasa nawaombeza ekheni moyo, khahana ata yumwe yenu, endaeawase ugima wakwe, meli ikedu nee yendayoyage. 23 Mie ni mntu wa Muungu nimvikiae naho ivyeo na kio mndima yumwe wa uwanga kwa Muungu kanilawia 24 Akanamba, ‘Paolo usekuogoha, wakundigwa ugooke hemeso ya Seuta Mkuu wa Kilumi, naho umanye kuwa wose awa ambao watamba hamwe nawo, Muungu enda awaohoe kwa wedi wakwe na kwaajii yako.’ 25 Kwaivyo wagosi ekheni moyo! Kwaviya namzumiya Muungu kuwa yendaiwe ivyo inga viya ekunigombekavyo. 26 Akini tenda tihate mwe kisiwa kimwe."

27 Kio cha msi wa kumi dimwe na nne, nee tikakubwaniswa uko na uko mwe mazimshindo ya Adilia. Hehi na kio kikuu, wandima wa meli waona inga wabua hehi na sii khavu. 28 Ivyo wakahima kimo cha mazi na kubwiiya kiwa phimo kumi dimwe na mbii, wekuendeeavyo mbee wakahima vituhu, nee wapata kina cha pimo kumi dimwe na shano. 29 Wakaogoha kuwa meli yao yadahika yendaitunte mwe maiwe, ne waseeza vigomo vine vya kutoza meli isekwenda, nee waomba kuche. 30 Wandima awo wa meli wakakunda kunyiika naho nee waseeza kae ngaawa mwe mazi, wetenda kuwa waita kuseeza kigomogomo phande ya kaidi ya meli. 31 Akini Paolo nee amwamba yuda mkuu wa asikai na asikai wakwe, "Ati wandima wa meli khawana wasigae mwe meli, khamna muoholwe." 32 Aho wada asikai nee wazisenga zia sigi zekuwazo zitozeeza ngaawa, nee waubada udoigwe na mazi.

33 Hehi na kucha, Paolo nee awakunda wose wade khande na kuwamba, "Kwa misi kumi dimwe na nne muwa mwe maatu naho kwesiho kuda chochose. 34 Nawahembeeza mde khande muendeee kuwa na ugima, kwamana khahana endae auye na nyuma wala kusuumizwa." 35 Ekubindaho kugombeka ayo, Paolo akadoa bumunda na kumtogoa Muungu hemeso yao na kuvoka kuda. 36 Aho wose nee wapata moyo wakuda khande nao nee wada. 37 Nee wapata wantu mia mbii na makumi mfungate na mtandatu wekuwaho mwe meli iyo. 38 Bada ya kia yumwe kuda bumunda na kweguta, ne wahunguza uzito kwe meli kwa kuwasa khande mwe mazimshindo.

39 Kwekuchao wandima wa meli khawokudaha kuimanya si ida, ila nee waona mazimshindo yengia mwe si khavu, nee wamamakhanya wamba vikadahika waike kigomogomo uko. 40 Ivyo wakasenga sigi za vigomogomo na kuvibada mwe mazimshindo, na kisingi kiakia wakavugua sigi zekuwazo zifungwa mwe usukani, naho wakatoza tanga mwenga hemeso ya meli ili khusi iwaambize kusindika ngaawa iite phwani. 41 Akini wakabua hantu ambaho mazimshindo yakitanaho, na meli ikahata. Hantu ha hemeso ya meli nee hazama he sanga kwesiho kusingisika. Hantu ha nyuma ha meli hakavoka kubondeka ntiintii kwa mkumbwaniso wa mazimshindo.

42 Maasikai nee wakakunda kuwakoma wafungwa wose kwa kuogoha kuwa wadaha kuogeea na kunyiika. 43 Akini kwaviya yuda mkuu wa maasikai nee akakunda kumuohoa Paolo akawakindia asikai wesekugosoa hivyo, akakunda wada wamanyao kuogeea wasooke kuawa mwe meli na kuogeea hadi phwani. 44 Naho watuhu watongeane na kutozeeza mwe zia mbao hambu mwe zia ntiintii za meli zekubondekazo, ndiho swie wose tekubuaho vitana phwani.