1 Aho Mviki Mkuu akamuuza Sitefano, "Masa aya ni ya kwei?"

2 Nee Stefano akamtambaisa, "Wandugu zangu na tati zangu, nitegeezani! Tati yetu Ibulahimu, ekuwaho khazati kwekaa Halani Ukuu wa Muungu ukamlawia uko Mesopotamia. 3 Muungu akamwamba, ‘Hauke mwe si yako na kuawa mwe wantu wako, naho uite mwe si nendayo nikuonyeshe.’ 4 Aho, Ibulahimu akahauka mwe si ya Wakalidayo akaita kwekaa Halani. Ekuuyaho na nyuma tati yakwe, Muungu akamlavya uko Halani na kumueta kwekaa mwe si inu, mwekaayo isasa. 5 Muungu khekumwekha hantu hohose mwe si iyo iwe mai yakwe, iya Muungu ne kamuikia kiaga kuwa yee na vyekuvyaigwavyo vyakwe wenda waipae si inu, etiho kisingi icho Ibulahimu khekuwa na mwana. 6 Muungu nee kamwamba ivi Ibulahimu, ‘Vyekuvyaigwavyo vyako wendawegalwe mwe si ambayo khio yao, naho wenda watendwe watumwa na kukubwaniswa kwa myaka mia nne. 7 Akini miye nenda niwaamuie wantu wa si iyo wendao wawatende watumwa. Naho nenda niwalavye mwe si iyo na kunivikia hantu aha.’ 8 Naho akamwekha Ibulahimu diagane da kugwiswa, nee Ibulahimu amgwisa Isaka msi wa nane ekuvyaigwaho. Isaka akamgwisa Yakobo, naye Yakobo akawagwisa viyaviya wada wadaa wetu wakuu kumi dimwe na waidi.

9 "Wana wa Yakobo wakamwonea kinyuu Yusufu mvunayao, nee wamtaga inga mtumwa uko mwe si ya Misili. Akini Muungu ne yu hamwe naye, 10 nee amuohoa kuawa mwe suuba zose zekumpatazo, naho akamwekha umanyi hemeso ya Falao Seuta wa Misili, Seuta uyo akamwekha ugookezi wa Misili na nyumba yose ya Kiseuta. 11 Naho nee kuawia gumbo mwe si yose ya Misili na Kanaani, kukaawiia suuba khuu, na khande ikawasiiya tati zetu na khawokuwa na khande ntuhu, 12 aho Yakobo ekusikiaho kuna khande uko Misili, akawaagiiya wanawe ambao nee baba zetu, wakaita uko kwa maa yao ya bosi. 13 Wekuitaho maa ya kaidi, Yusufu akeaviiza kwa wanduguze, naho Falao seuta wa Misili nee awamanya wanduguze da Yusufu. 14 Naho Yusufu akawagiiya wamweete Yakobo tati yakwe hamwe na wanduguze wose, ntaazia yao newawa wantu makumi mfungate na shano. 15 Nee Yakobo akaita Misili ambaho yee na baba zetu wakauya na nyuma. 16 Vimba vyao vikavuzwa Shekemu na kugewa mwe mbia ambado Ibulahimu ne kagua kwa hea kuawa kwa wana wa Hamoli.

17 "Akini kisingi chekubuao cha Muungu kuiganiza kiaga ambacho kamwekha Ibulahimu, wantu wetu nee wavyaiana na kugenyea muno uko Misili. 18 Naho Seuta mtuhu mwekuwa khekumanya dodose da Yusufu, akagookea uko Misili. 19 Seuta uyo akawagosoa wadaa wetu mbui za ufyaimi na kuwasuumiza tati zetu na kuwakunda wawase wana wao wateke ili wauye na nyuma. 20 Mwe kisingi icho Musa ne kavyaigwa, nekawa mwana mtana muno. Akaewa kaya kwa tati yakwe na mami yakwe kwa miongo mitatu, 21 wekuvotwaho kumfisa wakamwasa, biti Falao akamdoa na kumueeya inga mwana yakwe. 22 Musa ne kahinywa mbui zose za umanyi wa Wamisili akawa amanyika kwa tamwiizi na ntendwa.

23 "Musa ekuwaho na myaka makumi mane, akatamiwa kuita kuwavuia nduguze wantu wa Isilaeli. 24 Uko akoona Muisilaeli yumwe agosoewa vya ufyaimu ni Mmisili, akamwambiza yuda ekuoneewae kwa kuihiza akamkoma yuda Mmisili. 25 Musa akamamakhanya wanduguze Waisilaeli wendawamanye kuwa Muungu akunda kuwaohoa kwembokea kwa yee Musa, akini wowo khawokuwa na umanyi. 26 Msi wekutongeao Musa akawabwiiya Waisilaeli waidi watoana, akageeza kuwaika hamwe kwa kuwamba, ‘Tegeezani nywie wantu ni ndugu, kwambwai mwatoana?’ 27 Akini yuda yumwe ekuwaye akamtoa mweziwe, nee amsindika Musa khandai akamuuza, ‘Nndai mwekukuika kuwa mkuu na muamua yetu? 28 Uwo, wakunda kunikoma inga wekumkomavyo yuda Mmisili zana?’ 29 Musa ekusikiaho mbui ida, nee aguukia mzi wa Mediamu, na uko akavyaa wana waidi wa kigosi.

30 "Yekwembokaho myaka makumi mane, mndima wa uwanga kwa Muungu akamlawiya Musa mwe kisaka chekuwacho chaka moto he kiwawe hehi ya Muima wa Sinai. 31 Musa nee ahondomaa muno ekuonaho mbui zia, ekusogeaho hehi akauwe vyedi, akategeeza mgutio wa Zumbe, 32 ‘Mie ni Muungu wa baba zako, Muungu wa Ibulahimu na Isaka na Yakobo.’ Musa akakakama kwa maatu na khekudaha kukauwa. 33 Zumbe akamwamba, ‘Hambua sabana zako kwaviya aho wekugookaho ni hantu ha ung'azi. 34 Khiiona suuba wapatazo wantu wangu uko Misili, khitegeeza ndio ya masuumizi yao, na miye khiseeya kweza kuwaohoa. Isasa naonda nikuagiie mwe si ya Misili.’

35 "Uyu ne Musa ambae Waisilaeli wamuemea wakamba, ‘Nndai mwekukutenda uwe mkuu na muamua yetu?’ Nee uyo ambae Muungu kamwagiia awe mkuu na muohozi wa kuwalavya mwe si ya Misili, kwa wambizi wa mndima wa uwanga kwa Muungu yuda mwekumlawiaye mwe kisaka chekuwacho chaka moto. 36 Akawaongoea wantu wa Isilaeli kulawa Misili, nee kagosoa vihii na tangio uko Misili na mwe mazimshindo ya Shamu na kwa mda wa myaka makumi mane he kiwawe. 37 Uyu ne Musa mwekuwamba wantu wa Isilaeli, ‘Muungu endaawasaguiie muoni inga miye, kulawa gatigati ya wanduguzo.’ 38 Musa nekawa hamwe na mababa zetu mwe zumwezumwe da wantu he kiwawe. Nee mwekugombeka na mndima wa uwanga kwa Muungu he muima wa Sinai, akahokea mbui za ugima atekhe swie.

39 "Akini mababa zetu ne waemea kumtegeeza Musa, na wakaemea kutegeeza mbui wekwambiwazo na kukunda kuuya Misili. 40 Wakamwamba Haluna, ‘Tigosoee miuungu yendayo itiongoee siai, kwaviya khatimanya yekumpatayo Musa ekutietae aha kuawa Misili.’ 41 Aho wakagosoa kizuu kiiganacho na njeku wakakiaviya ntambiko, wakakigosoea kinyemi kizuu wekugosoacho kwa mikono yao wenye, wakawa na nyemi kwa yada wekugosoayo. 42 Akini Muungu akahauka gatigati yao, akawabada wavike ntoondo za uwanga kwa Muungu inga yekuandikwavyo he kitabu cha waoni wa Muungu,

‘Nywie wantu wa Isilaeli! Khie miye

Ambae mnilaviya ntambiko na malavyo

Kwa myaka makumi mane kuda he kiwawe.

43 Nywie mwenua tweya da kizuu cha muungu Moleki

Na kizuu cha ntoondo cha muungu yenu Lefani,

Na vizuu mwekugosoavyo na kuvivikia.

Kwaivyo nendaniwegae mwe si ya ntuhu hae kwemboka Babeli.’

44 "Uko he kiwawe mababa zetu newawa wakavika mwe dia tweya da kuwaonyesha kuwa Muungu yu hamwe nao. Nee digosolwa inga Muungu ekumwaagiiavyo Musa, kuigana na ekuonavyo. 45 Naho mababa zetu wakahokezana tweya ido wowo kwa wowo adi kisingi cha Yoshua, wekuidoaho ida si kuawa kwa si zose ambazo Muungu nee kawaguusa wantu, aho dikekaa mwe si inu adi kisingi cha Daudi. 46 Daudi nee kamtamiza muno Muungu, naye Daudi akamwombeza Muungu ambade amzengee nyumba yee Muungu wa Yakobo. 47 Akini Seemani nee mwekumzengea Muungu nyumba.

48 "Nee ivyo, yee Muungu mwekuwaye uwanga muno khekaa mwe nyumba zekuzengwazo ni wantu, inga muoni wa Muungu ekugombekavyo,

49 Zumbe amba, ‘Uwanga kwa Muungu ni he kigoda changu cha Useuta,

Na inusi ni hantu hangu ha kuikia miundi.

Ni nyumba ya yevivihi mwendayomdahe kunizengea?

Na ni hantu hani nendaho nihumwiize?

50 Uwo, khie miye nekugosoaye vintu vyose ivi?’ "

51 Sitefano akaendeea kugombeka, "Nywie wantu ndii, nywie inga wantu wesaokummanya Muungu! Nywie inga mababa zenu, misi zose mwahigana na Muye wa Muungu! 52 Uwo, kuna muoni yoyose ambae mababa zenu khawakumsuumiza? Wawakoma wose wekugombekaho mbui za kweza kwakwe yuda Mntu Mng'azi. Nanywi isasa mkamhituka na kumkoma. 53 Nywie nee mwekuhokeao miko ya Muungu yekuetwayo henu na mndima wa uwanga kwa Muungu, akini khamwekutegeeza."

54 Naho wagookezi wa mkonga wekutegeezaho yada ekugombekayo Sitefano, ne wakimwa muno na vyeni vyao vikanyafuika kwa maya. 55 Akini Sitefano kwa kuongoewa na Muye wa Muungu, akakauwa uwanga kwa Muungu, akoona Ukuu wa Muungu na Yesu kekhigwa ntunyo khuu kusima wose. 56 Nee Sitefano akamba, "Kauwani! Naona uwanga kwa Muungu kuvuguka na Mwana wa Mntu kagooka phande ya kuume kwa Muungu!"

57 Wantu wose wa mkonga, wakaemea kumtegeeza wakagubika magutwi yao, uku watoa vuzo na kumfuntia sitefano, 58 wakamlavya chongoi ya mzi, wakamtambikia maiwe. Naho wada wekuonao wakabada makoti yao asi ya ukauwizi wa mbwanga yumwe etangwae Sauli. 59 Wekuwaho wakamtambikia maiwe, Sitefano nee avika, "Zumbe Yesu hokea muye wangu!"Mntu kutoigwa maiwe adi kuuya na nyuma 60 Naho akakinta mavindi, akaiya kwa mgutio mkuu akamba, "Zumbe waekee mavigaviga aya!" Ekubindaho kugombeka ivyo akauya na nyuma.