1 Paolo na Sila watamba kwembokea Amfipoli na Apolonia adi Sesalonike ambako nekuwa na Nyumba ya kuvikia Wayahudi. 2 Inga yekuwavyo mazweeya ya Paolo akengia mwe Nyumba ya kuvikia Wayahudi, misi mitatu ya Kuhumwiiza akatambaisana nao kuusu Maandiko ya Muungu. 3 Akawamba pwii na kweonyesha kuwa imkunda Klistu kusuumizwa na kuyuyuka. Akawamba, "Yesu ambae miye nambiikia kwenu nee Klistu." 4 Wamwe wa Wayahudi wakazumiia wakawa hamwe na Paolo na Sila. Viyaviya Wagiiki wangi wekumzumiao Muungu na wavyee wangi wamanyikanao, wakawa hamwe nao.

5 Akini Wayahudi watuhu ambao khawekuzumiiya wakawa na kinyuu, wakaita mwe magwiiyo na kuwaeta wantu wafyaimi ambao nao nee wakitanisha wantu wangi, naho wakavoka kugosoa khumbizi khuu mwe mzi wose. Wakaita wakengia kwa nguvu mwe kaya ya Yasoni wakamuondeza Paolo na Sila ili wawegae he mkonga wa wantu wa mzi. 6 Akini khawokuwabwiia na ivyo wakambuuta Yasoni hamwe na wanduguze watuhu adi kwa wakuu wa mzi, wakatoa vuzo, "Wantu awa nee waetao khumbizi khuu mwe si ntuhu zose, isasa weza mwe unu mzi wetu, 7 Yasoni kawahokea kaya kwakwe, wose wagosoa vyesavyo kukundigwa ni miko ya Kaisalia wakamba eti, kuna Seuta mtuhu etangwae Yesu." 8 Kwa mbui izo wakawagea maatu wakuu wa mzi na zumwezumwe da wantu. 9 Naho wakaagiia Yasoni na weziwe waekewe.

10 Kio kiya wada wantu wekumzumia Klistu wakawaagiiya Paolo na Sila waite Belea, wekubuaho uko wakengia mwe Nyumba ya kuvikia Wayahudi. 11 Wantu wa Belea newawa wakawategeeza vitana kusima wada Wasesalonike, kisingi Paolo abiikia Mbui ya Zumbe Yesu wakazihokea kwa hovu khuu wakawa wayasungumanya Maandiko ya Muungu kia msi, ili kufanyanya inga yada yagombekwayo na Paolo na Sila yawa ya kwei. 12 Wayahudi wangi wakamzumiiya Yesu hamwe na wavyee wa Kigiiki wamanyikanao na wagosi wangi wa Kigiiki nao wakazumiia. 13 Akini Wayahudi wa Sesalonike wekumanyaho kuwa Paolo kawa akabiikia mbui ya Muungu uko Belea, wakaita uko wakavoka kubibiiza zumwezumwe da wantu, kugosoa khumbizi. 14 Wada wantu wekumzumia Klistu wakamwegaa kinyio Paolo aite phwani, akini Sila na Timoseo wakasigaa Belea. 15 Wada wekuwao wamwegaa Paolo, wakaita hamwe nae adi mzi wa Asene, naho wakauya Belea na miagiiyo kuawa kwa Paolo kuwa Sila na Timoseo wambase kinyio idahikanavyo.

16 Paolo ekuwaho awagoja Sila na Timoseo uko mwe mzi wa Asene, moyo wakwe ukakimwa muno ekuonaho mzi uwo, wekuwavyo umema miungu. 17 Akatambaisana na Wayahudi hamwe na wantu watuhu wesao kuwa Wayahudi wekumzumiao Muungu kia msi mwe Nyumba ya kuvikia Wayahudi kuvika na hantu ha gwiiyo kwa wada wekukintanaho uko.

18 Wamwe wa wahinyi wa Waepikulo na Wasitoiki ne wahigana nae, watuhu wakamba, "Mbahau uyu akunda kugombeka mbwai?" Watuhu wakatambaisa aoneka inga muambaza mbui ya miuungu migeni, kwaviya nee akabiikia mbui za Yesu na uyuyuko. 19 Naho wakamwegaa Paolo he mkonga wa wamanyisi wekwetagwao Aleopago, wakamba, "Takunda kumanya mahinyo aya mahya wekuwayo wahinya. 20 Mbui ntuhu tekuzitegeezazo mwe magutwi yetu, yaoneka inga ni mbui mphya umu mwetu, takunda kumanya ina mana yani?" 21 Wantu wa Asene na wantu wesao kuwa wenyezi wa uko wekwekaao uko kisingi chao chose wawa wakatamwiizwa na kutegeeza mbui mphya.

22 Paolo akagooka gatigati ya mkonga wa Aleopago na kugombeka, "Wantu wa Asene khiona nywie ni wantu mkundao kumvikia muno Muungu. 23 Kwaviya nekuwaho nemboka uko na uko nikakauwa miuungu yenu ya miviko khiona ingo dimwe ambado diandikwa, ‘KWA MUUNGU MWESAEKUMANYIKA.’ Naho uyo mumvikiae mwesaekummanya, nee nimbiikiae kwenu. 24 Muungu mwekugosoa inusi na vyose vyeumo nee Zumbe wa uwanga kwa Muungu na inusi, yee khekaa he Nyumba za Muungu zekuzengwazo ni wantu. 25 Khagosoewa ndima na wantu, kwamba akakunda chochose, kwaviya yee mwenye nee awekhae wantu ugima, awekha muye hamwe na kia kintu wenacho. 26 Kuawana na mntu yumwe kagosoa wantu wa si zose na kuwatenda wekaise mwe inusi yose, aho kae yee nee mwekukunda ni ini na hahi wantu wa si izo wendawekaise. 27 Muungu kagosoa ayo yose, ili wantu wadahe kumuondeze etiho kwa kuhahasa hahasa wadahe kumbwiiya, hata ivyo khayuko ahe na yoyose. 28 ‘Kwaviya kwa yee tekaisa,

Tenda na kuwa na ugima wetu’

Inga wamwe wa watunga mawiya wenu wakwambavyo,

‘Swie naswi ni wana wakwe.’

29 Kwaviya swie ni wana wa Muungu, khaikundigwa kumamakhanya kuwa Uungu wakwe waigana na vizuu ambavyo vigosolwa kwa madini ya zahabu au feza au maiwe. Ivyo vizuu vigosolwa kwa umanyi wa wantu. 30 Naho kisingi kia cha ubahau, Muungu katenda inga khakiona iya isasa awaagiia wantu wose wabade mavigaviga na kumhitukia Muungu. 31 Kwaviya kabinda kae kuuika msi ambaho endaaiyamwiie inusi kwa kiukwei, kwembokea mntu yumwe mwekusagulwaye ni Muungu, kawaonyesha wantu wose mbui inu kwa kumyuyusa mntu uyo!"

32 Wekumtegeezaho Paolo agombekavyo kuusu mbui ya kuyuyuka, watuhu gatigati yao wakavoka kumseka kwa kumbea, akini watuhu wakamba, "Takunda kumtegeeza vituhu kuusu mbui inu." 33 Ivyo Paolo akawabada, akalawa he mkonga. 34 Akini wamwe wa wantu wakatongeana nae wakatenda wazumizi. Gatigati yao nee ni Dionisio yumwe wa mkonga wa Aleopago na mvyee yumwe etangwae Damali na watuhu hamwe nao.