1 Aho nauza, ivi Muungu nee kawaemea wantu wakwe? Bue! Miye mwenye ni Muisilaeli, wa muwango wa Ibulahimu, mwe mbai da Benjamini. 2 Muungu khekuwaemea wantu wakwe, ekuwasaguae kuvokea aho bosi. Mwakumbuka Maandiko ya Muungu yambavyo kuusu Eliya kisingi ekumhembeezaho Muungu kuusu Waisilaeli. 3 Akagombeka, "Kauwa Zumbe wantu wawakoma waoni wako na kubananga ingo da kukuvikia. Nkhisigaa mie ikedu, naho wakunda kunikoma!" 4 Ivi, Muungu kamtambaisa viivihi? Kamgombeka, "Nikenao wantu magana makumi mfungate wesaokumvikia muungu etangwae Baali." 5 Nee yeivyo isasa. Muungu kawasigaza wantu wa Isilaeli wacheche, ambao Muungu kawasagua kwa wedi wakwe. 6 Kusagulwa uko kwalawana na wedi wakwe, na khio kwa yada wantu wagosoayo, kwaviya inga kusagulwa uko nee kukakunda yada wantu wagosoayo, wedi wakwe nee khio wedi vituhu.

7 Naho tambe mbwai? Wantu wa Isilaeli khawekupata kia wakiondezacho. Akini wada wekusagulwao mwe wantu wa Isilaeli nee wakipata. Watuhu watendwa kuwa na mioyo itogayo. 8 Inga Maandiko ya Muungu yambavyo, "Muungu kaitenda mioyo yao kuwa itogayo, adi kubua ivyeo khawadaha kukauwa, naho khawadaha kutegeeza." 9 Naho Daudi agombeka,

"Wantu wakintanaho kuda aho ni mtego wa kuwagwiya,

Wagwe na kuihiwa kwa masuumizo."

10 Meso yao yagewe kiza wasekuona.

Naho migongo yao yename misi yose!

11 Naho nauza, ivi Wayahudi wekungwaa adi kudagamia muno? Bue! Kwaajii ya masa yao uohozi uwezea wantu wesaokuwa Wayahudi, ili Wayahudi wawaonee kinyuu. 12 Inga masa ya Wayahudi yaeta majaiwa mangi muno kwa wantu wesaokuwa Wayahudi, naho na imanyike kuwa wendahowawe wauya na kumzumiiya Mwohozi kwendakuwe na majaiwa muno.

13 Nagombeka na nywie wantu wesaokuwa Wayahudi. Kwaviya mie Muungu kanisagua niwe muagiiwa kwa wada wesaokuwa Wayahudi, nendanigosoe kia didahikanado kuitunya ndima yangu nekwekhigwayo ni Muungu. 14 Nidahe kuwagosoa Wayahudi wezwangu wawaonee nywie kinyuu, ivyo nidahe kuwaohoa wamwe wao. 15 Wayahudi wekumuemeaho Yesu, Muungu nae akawaemea wowo, akevana na wantu wesaokuwa Wayahudi. Kwaivyo kisingi ambacho endaawazumiiye Wayahudi vituhu, yendaiwe inga wekuuyao na nyuma wayuyuka!

16 Inga ntii ya bosi ya bumunda yekulavigwayo kwa Muungu, naho bumunda dose dilavigwa kwa Muungu. Inga mazindo ya mti yalavigwa kwa Muungu, viavia matambi ya mti ni yakwe. 17 Isasa matambi matuhu nee yasengwa, na nywie wantu wesaokuwa Wayahudi nee inga matambi ya mzaituni mwitu muunganishwa na matambi yekusigaayo ya mzaituni. Mwapata khande kwembokea mazindo ya mzaituni uwo wekuhandwao. 18 Naho, usekubea wada wekusengwao inga matambi! Inga ukawabea kumbuka mbui inu, khio wee uyakauwiyayo mazindo, akini wee nee wakauwiya mazindo.

19 Akini wendaugombeke, "Matambi nee yasengwa ili mie niikwe hantu hada." 20 Vyedi. Wantu wasengwa kwaajii ya khawekuzumiiya, iya wee wagooka kwaviya wazumiiya. Akini wesekwevuna, iya uogohe. 21 Kwaviya, ikawa Muungu khekuwaonea mbazi Wayahudi wekuwao inga matambi ya bosi, ivi wamanya endaakuonee mbazi wee? 22 Kauwa via Muungu ekuavyo yedi na mkai. Yee ni mkai kwa wada wabadao kumbasa, akini ni yedi kwa wee inga ukaendeea kuwa na wedi wakwe, hambu khivyo nawe wendausengwe. 23 Ikawa Wayahudi wendawahituke na kumzumiiya Muungu, yee endaawahokee na kuwavuza hada wekuwaho. 24 Nywie wantu wesaokuwa Wayahudi wa uvyaigwa ni inga matambi ya mzaituni mwitu, akini muuswa uko mkaikwa mwe mzaituni wa he mnda hantu hekuaho kwa uvyaigwa khio henu. Akini Wayahudi kwa uvyaigwa ni inga mzaituni mwekuhandwao he kamnda, naho yendaiwe vihifu kuikwa vituhu mwe mti uwouwo.

25 Wandugu zangu, nakunda mmanye sii inu, kwaviya nakunda msekumamakhanya kuwa ni wenye umanyi muno. Kuemea kwa Wayahudi nekuwa kwa kisingi kichechedu, adi aho wantu wesaokuwa Wayahudi wendahowammanye Muungu. 26 Aho nee wantu wa Isilaeli wose wendaowaoholwe, inga via Maandiko ya Muungu yambavyo,

"Mwohozi endaeze kulawa mwe mzi wa Sayuni,

Endaayause mavigaviga yose ya muango wa Yakobo."

27 Na mie Muungu nendanigosoe diagane idi

Kisingi nendahoniuse mavigaviga yao.

28 Kwaviya waiiemea Mbui Yedi, Wayahudi wawa wamasa wa Muungu kwaajii wabada kutongea mbui zedi, kwaviya wasagulwa wowo wake ni wambuya wa Muungu kwaajii ya mababa zao. 29 Kwaviya Muungu akawasagua wantu na kuwajaiya khadaha kuhituka. 30 Kwaviya nywie mwesaokuwa Wayahudi aho bosi, mwekumhitukavyo Muungu, akini isasa mhokea mbazi za Muungu kwa kuhituka kwao. 31 Isasa khawamtegeeza Muungu, akini Muungu nae kawa yedi muno kwenu ninywi, ili Muungu awe yedi kwao. 32 Muungu agombeka kia yumwe ana masa kwaajii khawekumtegeeza, Muungu agombeka ivyo ili aonyeshe wedi wakwe na kumuekea na kumuusia mavigaviga kia mntu.

33 Eehe Muungu ni mkuu, yee ana kia kintu, amanya vintu vyose na khahana amanyaye viya eamwiiavyo na khahana amanyae agosoavyo ndima zakwe.

34 Inga Maandiko ya Muungu yambavyo, "Nindai adahae kumanya mamakhanyi za Muungu?"

Nindai adahae kumgombeka kihi agosoe?

35 Ni yuhi ekumwekhae Muungu chochose,

Ili aihwe?

36 Kwaviya vintu vyose vyalawa kwakwe, vyose vyekhigwa udaho kwaajii yakwe. Ukuu wa Muungu uwe misi yose! Pepa.