1 Tambe mbwai kuusu, Ibulahimu Tati yetu, yee kamanya viivihi mntu azumiwavyo hemeso ya Muungu? 2 Ikawa Ibulahimu kazumiiwa hemeso ya Muungu kwaajii ya mbui zakwe, anacho kintu cha kwevunia, akini khio hemeso ya Muungu. 3 Kwaviya, Maandiko Yedi yamba, "Ibulahimu nee kamzumiiya Muungu, kwaajii ya kuzumiiya kwakwe Muungu akamzumiiya." 4 Mntu agosoaho ndima, maiho yakwe khayalavigwa inga funge. Ni kintu apatacho kulawana na ndima ekugosoayo. 5 Akini mntu esae kukauwiya mbui zakwe mwenye, iya amzumiiya Muungu ambae awaekea wenye makwasukwasu, naho Muungu aupatiiza uzumizi wa mntu uyo, na kumzumiiya kuwa yedi hemeso yakwe. 6 Daudi naye agombeka viavia kwa mbui ya mntu mwenye majaiwa yuda ambae Muungu kamzumiiya kwesiho kukauwa ntendwa zakwe.

7 "Wajaiwa wada wekuekewao makwasukwasu yao,

Ambao mavigaviga yao yausigwa!

8 Kajaiwa mntu yuda ambae, Zumbe khakumbuka mavigaviga yakwe."

9 Majaiwa ayo ni kwa wada Wayahudi wekugwiswao du, na kwawada wesao kugwiswa? Ni kwa wada wesao kugwiswa. Kwaviya tibinda kae kugombeka, "Ibulahimu nee kamzumiiya Muungu, kwaajii ya kumzumiia kwake Muungu akamtenda kuwa ni yedi." 10 Tambe Ibulahimu kazumiiwa ake khazati kugiswa, hambu ekubindaho kugwiswa? Kazumiiwa na Muungu kisingi khazati kugwiswa, na khio ekubindaho kugwiswa. 11 Ibulahimu nee kagwiswa kisingi chekwezacho, na kugwiswa uko nee kuwa ntangio yekuonyweshayo kuwa Muungu kamzumiiya kwaajii ya uzumizi wakwe ekuwao nao kisingi khazati kugwiswa. Kwaivyo, Ibulahimu kawa tate wa wada wose ambao, etiho khawekugwiswa, wamzumiiya Muungu wakatendwa wazumiiwa hemeso yakwe. 12 Viavia Ibulahimu ni tate wa wada wekugwiswao mwe uzumizi ikawa wamzumiiya Muungu, khio tate yao kwaajii ya kugwiswa iya ni tate yao kwaajii wamzumiiya Muungu inga ekugosoavyo yee, hada ekuwaho khazati kugwiswa.

13 Muungu nee kamwekha kiaga Ibulahimu na uvyazi wakwe kwa kugombeka inusi yose indaiwe yao. Kiaga icho nee khakikugosolwa kwaajii Ibulahimu nee kategeeza miko, iya kwaviya nee kazumiiya, nee atendwa kuwa yedi na Muungu. 14 Kwaviya wendao wekhingwe ayo ekuikayo kiaga Muungu ni wada du waitegeezayo miko, naho kumzumiiya Muungu khio kintu na yada ekuyaikiyao kiaga Muungu yendayawe khayana mana. 15 Miko yaeta maya ya Muungu, akini ati khahana miko khahana kuitegeeza miko.

16 Mbui inu yawa hivyo kwa kuzumiiya tekhigwa kiaga icho kulawana na wedi wa Muungu na nikwei kuwa kiaga icho ni kwaajii ya wantu wose kwaani si kwajii wantu wategeezao miko iya viyaviya ni kwawada wazumiiyao inga Ibulahimu ekuzumiiavyo. Yee ni tati yetu swie wose. 17 Inga Maandiko ya Muungu yagombekavyo, "Khikutenda uwe tate wa wantu wa si zose." Kiaga icho ni kwei he meso ya Muungu na uyo Ibulahimu akaika uzumizi wakwe kwa Muungu, uyo Muungu awekha ugima wekuuyao na nyuma na kwa mwiko yakwe akagosoa vyesivyokuwaaho vyawaaho. 18 Ibulahimu ekugombekwaho na ekwembigwaho mbui izo neiwa vitoga kuyazumiiya, akini akaendeea kuzumiiya na kukauwiya kuwa Muungu endaamtende awe tate wa wana wangi kwaajii Muungu kamwamba kuwa wantu wa uvyazi wako wendawawe wangi inga ntoondo. 19 Kisingi icho Ibulahimu nee kawa mdaa hehi na myaka mia mwenga, nee kamanya mwii wakwe nee uwa inga uuya na nyuma, na Sala mkaziwe nee kawa khadaha kuvyaa akini Iblahimu khekubada kumzumiia Muungu. 20 Ibulahimu khekuwa na maatu na kia kiaga cha Muungu akaendee kuwa na udaho mwe uzumizi na kumtogoa Muungu. 21 Ibulahimu akamanya haika kuwa Muungu adaha kuyagosoa yada ekuyaikiayo kiaga. 22 Ivyo nee vikuekavyo amanywe kuwa ni yedi he meso ya Muungu. 23 Igombekwaho, "Kamzumiiya," khaigombekwa kwaajii yakwe mwenye du. 24 Iya ni hamwe na swie ambao tamzumiiya Muungu ekumyuyusae Yesu Zumbe yetu. 25 Yee kalavigwa akomwe kwaajii ya mavigaviga yetu, nee ayuyuka ili tidahe kuzumiiwa he meso ya Muungu.