1 Tambe mbwai? Tiendee kugosoa mavigaviga ili wedi wa Muungu ugenyee muno? 2 Bue! Ida khwiina ya kugosoa mavigaviga umu mwetu iuya na nyuma, tendatiendeee viivihi kwekaa he mavigaviga. 3 Kwaviya, mwamanya kuwa swie tekubatizwao tikaungana na Klistu Yesu, nee tibatiizwa na kuungana na ufe wakwe. 4 Tekubatizwaho nee tiungana na ufe wakwe, tikagewa mwe mbia hamwe naye, ili inga via Klistu ekuyuyuswavyo kwa ntendwa ya ukuu wa Tate, viavia swie tidahe kwekaisa ugima mhya.

5 Kwaviya swie tiungana nae he ufe wakwe, viavia tendatiungane nae mwe msi wa uyuyuso wakwe. 6 Tamanya kuwa untu wetu wa kae nee ugong'ondewa he mhamba hamwe nae. Ivyo nee wekazi wa utumwa tekuwao nao yekudagamizwavyo ili tisekuendeea kugosoa mavigaviga. 7 Kwaviya mntu yoyose ekuuyae na nyuma khana masa na yuhae na mavigaviga kulawa he udaho wa mavigaviga. 8 Ivyo, ikawa tiuya na nyuma hamwe na Klistu, takauwiya kwa kugombeka tendatekae hamwe nae. 9 Kwaviya tamanya kuwa Klistu nee kayuyuswa. Naho tamanya kuwa khadaha kuuya na nyuma vituhu na ufe khauna udaho kwakwe. 10 Kuuya kwakwe na nyuma ni kwaajii ya mavigaviga kauya na nyuma kamwe du na ekakaa hamwe na Muungu. 11 Ivyo mwakundigwa kweona mwe mbui ya mavigaviga inga mwekuuyao na nyuma akini mweone inga mwekaa hamwe na Muungu kwembokea Klistu Yesu.

12 Ivyo, mwesekugosoa mavigaviga vituhu na wala mwesekubada mii yenu iuyayo na nyuma ikagosoa mavigaviga, naho kuzitegeeza khwiina zakwe. 13 Naho msekulavya hata hantu hamwe he mii yenu kiwe via cha kugosoea makwasukwasu na mavigaviga. Bada yakwe elavyeni nywie wenye kwa Muungu inga wantu wekuyuyuswao, elavyeni ninywi wenye kwa Muungu kwaajii ya wedi. 14 Kwaviya mavigaviga khayana nguvu vituhu uwanga yenu kwaajii khamuho asi ya miko iya muumo asi ya wedi wa Muungu.

15 Naho, tambe mbwai? Ivi, tigosoe mavigaviga kwaajii khationgoewa na miko iya taongoeewa na mbazi ya Muungu? Aah bue. 16 Mwamanya kuwa mkeavya nywie wenye inga watumwa na kumtegeeza mtuhu inga mkuu yako, mwawa kwei watumwa wakwe mntu uyo, ivyo inga mweavya wenye kugosoa mavigaviga, mavigaviga yendayawe na nguvu uwanga yenu na kuwatenda muuye na nyuma, akini inga mkamtegeeza Muungu mwendamuwe watumwa wakwe na kuwatenda mwekae kwa kugosoa yada akundayo. 17 Aho kae ninywi nemuwa watumwa wa mavigaviga, akini isasa namtogoa Muungu kwaajii mzumiiya kwa mioyo yenu yose kutegeeza mahinyo mwekuhokeayo. 18 Namtogoa Muungu kwaajii kawatenda mwesekuoneka mna masa ili mwesekugosoa mavigaviga, kawatenda muwe wantu wakwe ili mgosoe mbui zimtamizazo. 19 Hanu nagombeka inga via wantu wagombekavyo kia msi kwaajii ya udodo wa kumanya kwenu. Inga viya kisingi kimwe mwekwelavyavyo nywie wenye kugosoa mbui fyaimi na za makwasukwasu, viyaviya mwakundigwa kwelavya nywie wenye kugosoa mbui zedi ili muwe wandima wa Muungu.

20 Mwekuwaho watumwa wa mavigaviga nemuwa khamgosoa yada Muungu akundayo. 21 Isasa, mpata myengizo yani misi zia kulawana na mbui ziya muoneazo soni isasa? Ivyo mbui izo zaeta ufe! 22 Akini isasa mkombolwa kulawa he utumwa wa mavigaviga na muwa wandima wa Muungu, myengizo mwekuwayo nayo isasa ni kusuntwa na kuhokea ugima wa kae na kae 23 Kwaviya maiho ya mavigaviga ni ufe, akini funge alavyayo Muungu ni ugima wa misi wa kae na kae kwa kuungana na Klistu Yesu, Zumbe yetu.