1 Ivyo tizumiiwa hemeso ya Muungu kwa sia ya uzumizi, Ivyo wose tina pheho hamwe na Muungu. 2 Viavia kwaajii tamzumiiya Yesu Klistu katitenda timanye Muungu ekuwavyo yedi, inu yatitenda titintimae mwe wekazi wetu isasa na viavia tamanya tendatekae na Muungu uko uwanga kwakwe, ivyo tina nyemi muno. 3 Khio ivyodu iya tikawa na nyemi mwe masuumizi uku tikamanya masuumizo yatiambiza kuwa wazizimizi. 4 Naho uzizimizi waeta utintimavu na utintimavu waeta kauwiyo. 5 Naho kauwiyo khadina ditigee soni kwaajii Muungu kabindakae kutekha ukundiso wakwe mwe mioyo yetu kwa sia ya Muye wa Muungu.

6 Tekuwaho khatina uwambizi wowose, kisingi chekubuaho Klistu akauya na nyuma kwaajii yetu swie wenye makwasukwasu. 7 Khio vihufu mntu kuuya na nyuma kwaajii ya mntu azumiiwae hemeso ya Muungu, etiho mntu adaha kuuya na nyuma kwaajii ya mntu yedi hemeso ya Muungu. 8 Akini Muungu kationyesha kuwa katikundisa muno, kwaviya kisingi tekuaho ni wenye mavigaviga akamlavya Klistu kuuya na nyuma kwaajii yetu. 9 Kwaviya isasa tizumiiwa hemeso ya Muungu kwa phome ya Klistu na imanyike pwii endaatiohowe na maya ya Muungu. 10 Kwaviya, tekuwaho wamasa wakwe Muungu katitenda kuwa wambuya kwembokea ufe wa Mwanawe na inga titendwa wambuya wakwe, ivyo tamanya tendatioholwe. Klistu endaatiohoe kwaajii yee ni mwenye ugima misi yose. 11 Naho khiyo ayodu, iya tinanyemi na Muungu kwa sia ya Zumbe Yesu Klistu ekutigosoae tiwe wambuya na Muungu.

12 Naho inga via mavigaviga yekwengiaho mwe inusi kwa kwembokea kwa mntu yumwe na kwa kwembokea mavigaviga ayoayo yaeta ufe, ivyo kuuya na nyuma kukawabwiiya wantu wose, kwaajii wose wagosoa mavigaviga. 13 Kisingi miko khaizati kuikwa, mavigaviga nee yaaho mwe inusi akini Muungu khekuwadoea kuwa wantu wana mavigaviga.

14 Kuvokea kisingi cha Adamu adi kisingi cha Msa ufe uwekaiya hata wada wekuwao khawakugosoa mavigaviga inga yada ya Adamu ya kumbada Muungu. Adamu nee ntangio ya Klistu ambae keza. 15 Vigaviga da Adamu khadiigana na wedi wa Muungu, Adamu ni mntu yumwe ambae nee kawatenda wantu wose wauye na nyuma kulawana na vigaviga dakwe. Akini kuna yumwe mtuhu ni Yesu Klistu awekhae wantu wangi funge da wedi wa Muungu, wedi uwo wa Muungu ni mkuu muno kusima vigaviga da Adamu. 16 Naho khakuna kuigana mwe funge ya Muungu na mavigaviga ya mntu yumwe. Kwaviya mntu yumwe ekugosoaho mavigaviga, Muungu akalavya uwamwiiyo, akini wantu wangi wekugosoaho mavigaviga, Muungu akawekha funge dakwe kwa kuwaekea na kuwausia mavigaviga yao. 17 Kwa vigaviga da mntu yumwe akatenda ufe uwe na udaho kwa wantu, inu yaonyesha kuwa ekugosoacho Klistu ni chedi muno. Wantu wose wahokeao wedi wakwe ambao nee funge da kuzumiwa hemeso ya Muungu.

18 Muungu awaamwiiya wantu wose kwaajii ya masa dimwe ekudigosoado Adamu. Akini kwa ntendwa mwenga ekugosoayo Yesu Klistu iwatenda wantu kuekewa mavigaviga yao, ivyo awazumiiya wantu kwa sia ya ntendwa dimwe ekugosoado Klistu. Ivyo wantu wahokea ugima kulawa kwa Muungu. 19 Naho kwa kutokutegeeza kwa mntu yumwe wantu wangi watendwa kuwa wenye mavigaviga, nee ivyo kwa kutegeeza kwa mntu yumwe kwendakuwatende wangi wazumiiwe he meso ya Muungu.

20 Miko yeza ili wantu wamanye weivyo watendavyo mavigaviga, akini wantu wekutendesao kugosoa mavigaviga, nee ivyo Muungu ekutendesaho kuonyesha wedi wakwe muno. 21 Inga via mavigaviga yekuambazikaho na kueta ufe, viavia wedi wa Muungu uambazika na kueta ugima wa kae na kae kwa kwembokea kwa Zumbe yetu Yesu Klistu.