1 Wandugu zangu, kwa vyovyose mwendamuve kwa yada nikundayo kugombeka, kwaviya nyose mwaimanya miko. Miko yamwekaiya mntu kisingi yuke mgima. 2 Kwa msimo mvyee ekutegulwae atozwa ni miko kwa mgosi yakwe kisingi yuke mgima, akini muumewe akauya na nyuma, yuda mvyee kaekewa kulawa he miko ya ndoza. 3 Mvyee akawa na mgosi mtuhu kisingi muumewe yuke mgima, aho endaetangwe mkianga, akini muumewe akauya na nyuma, mvyee uyo khatozwa na miko naho akategulwa na mgosi mtuhu, yee khio mkianga. 4 Wandugu zangu, ivi nee yeivyo kwenu viavia hata nywie khamtozwa na miko kwaviya muuya na nyuma hamwe na Klistu he mhamba, isasa ninywi ni wantu wakwe yee ekuyuyuswae ili mdahe kugosoa ndima ntana za Muungu. 5 Kwaviya tekuwaho taongweewa na mii yetu, khwiina za mavigaviga nee zasongeezwa na miko na kugosoa ndima mwe mii yetu, na yose tekugosoayo yaheeya mwe ufe. 6 Akini isasa tiekewa mwe vifungo vya miko, kwaviya tiuya na nyuma mwe kia kititendacho tiwe wavugaiwa. Isasa tekaa kutongeana na wekazi mhya wa Muye wa Muungu, na khio uda wekazi wa kae mwe miko yekuandikwayo.

7 Ivi tambe mbwai kuwa miko ni mavigaviga? Bue! Khio ivyo! Kwaviya miko nee yekuniekayo mie kumanya mavigaviga ni kintu chani, kwaviya nee nchekumanya khwiina fyaimi ni kintu chani inga miko nee itamwiiya, "Usekuwa na khwiina." 8 Akini he mwiko uwo, mavigaviga nee yapata phasi ya kwenua khwiina nyingi umu mwangu, kwaviya kwesiho miko, mavigaviga ni kintu chekuuyacho na nyuma. 9 Aho bosi mie nee ni mgima, kisingi miko khaiho, akini miko yekwezaho ikanitenda nimanye ni mwenye mavigaviga. 10 Naho nikaona miko ida yekukundigwayo kunietea ugima, initenda kuuya na nyuma. 11 Kwa sia ya miko iyo, mavigaviga yanitiiya na kunietea ufe.

12 Miko inu yalawa kwa Muungu na mwiko zalawa kwa Muungu naho ni ntana na ziaho inga ikundigwavyo. 13 Haika kintu chedi khakinakidahe katu kueta ufe, mavigaviga nee yaeta ufe kwa sia ya miko yedi, nee ekukikundacho Muungu kuwa miko ionyeshe mavigaviga ni kintu kifyaimi muno.

14 Tamanya kuwa miko yalawa kwa Muungu akini mie nina untu wa mavigaviga, nee kugombeka mie kiwa mtumwa wa mavigaviga. 15 Khimanya kia nigosoacho, kwaviya mie khigosoa kia nikundacho kugosoa, naho nagosoa yada nesayokuyakunda. 16 Kwaviya nigosoacho ni kia nesachokukikunda, naho yaonyesha kuwa nazumiiya kuwa miko ni yedi. 17 Ivyo, khio mie nigosoacho kintu icho, akini ni yada mavigaviga yekaayo umu mwangu. 18 Namanya kuwa khamna tana dodose umu mwangu mie, mwe untu wangu. Etiho nakunda kugosoa mbui yedi, akini khidaha kugosoa. 19 Kwaviya khigosoa yedi nikundayo kugosoa, akini nagosoa ufyaimi uda nesaokuukunda kuugosoa. 20 Naho inga nagosoa dia nesadokukunda kugosoa, khio mie nigosoaye akini ni yada mavigaviga yekaayo umu mwangu.

21 Naho naikauwa miko inu igosoavyo ndima, nikundaho kugosoa dekuwado dedi akini nagosoa dia dekuwado fyaimi. 22 Kwaviya nina untu mhya nina nyemi na miko ya Muungu. 23 Akini naona kuwa kuna miko mituhu igosoayo ndima mwe mwii wangu, miko ihiganayo na ida miko ikundigwayo na akii yangu. Iyo yanitenda niwe mtumwa wa miko ya mavigaviga yagosoayo ndima mwe mwii wangu. 24 Mmbwii yangu mie! Ni ndai endae aniohoe mwe mwii unu uniwegaao mwe ufe? 25 Namtogoa Muungu kwaajii yee nee endae aniohoe kwembokea Zumbe yetu Yesu Klistu!

Ivyo mwe umanyi wangu naigosoea ndima miko ya Muungu, akini kwa untu wa mavigaviga maa ntuhu naigosoea ndima miko ya mavigaviga.