1 Ivi miye khio mntu ekuekewae? Ivi miye khio mwagiiwa? Ivi miye shekumuona Yesu Zumbe yetu? Ivi ndima nekugosoayo miye nee yekuwatendayo nywie mumzumiie Zumbe? 2 Ata ikawa wantu watuhu khawekunizumiia kuwa miye ni mwagiiwa, akini kwenu miye ni mwagiiwa, nywie ni ntangio ya uwagiiwa wangu kwaajii nywie mumzumiiya Zumbe.

3 Uwo nee uvunizi wangu kwa wada wahiganao na miye. 4 Ivi swie khatikundigwa kwekhigwa khande na vidomea kwa kugosoa ndima inu? 5 Ivi swie mwamamaakhanya twavotwa kudoa wavyee wetu na kutamba nao, inga watambavyo nao wagiiwa watuhu, na wanduguze Zumbe, na Kefa? 6 Hambu ni miye du na Balinaba, khatikundigwa kwekhigwa vintu vya kutiambiza kwaajii ya kwekaisa kwetu? 7 Ivi ni mtoana yuhi aitae mwe khondo kwa gaama zakwe mwenye? Ivi ni muimi yuhi ahandae mizabibu na asekuda matunda yakwe? Ivi ni mwiisi yuhi aisae ntintimo na asekudomea mee yakwe?

8 Mbui izi nigombekazo khio mamakhanyi za wantu du, iya ata miko ya Msa yagombeka ivyoivyo. 9 Iyandikwa mwe miko ya Msa, "Mnyama wa ndima agosoaho ndima ya kuhuuwa uhemba usekumfunga muomo." Ivi mwe mbui izo Muungu amamakhanya mbui za mnyama? 10 Ivi khekuwa atimamakhanya swie agombekavyo ivyo? Kwei ayo yaandikwa kwaajii yetu swie, kwaviya muimi na abondae, wose waidi wakundigwa kupata hantu ha ubosi uwo. 11 Ikawa nee tihanda mbeyu ya kimuye mwe mioyo yenu, ivi khatikundigwa kwekhigwa vintu kwaajii ya wekaisi unu kulawa kwenu? 12 Ikawa nywie mwazumiiya kuwekha wantu vintu vya kuwaambiza mwe wekaisi, haika ata swie mwakundigwa kuzumiiya kutekha vintu vya kutiambiza mwe wekaisi?

Akini swie khatiwadai viya vintu mkundigwavyo kutekha iya tazizimiza mwe yose ili tisekweza tikawakindia wantu kuizumiia Mbui Yedi ya Klistu. 13 Ivi khammanya kuwa wantu wagosoao ndima mwe Nyumba ya Muungu, wada khande mwe Nyumba ya Muungu? Naho wose wagosoao ndima he ingo, wahokea hantu ha ayo malavyo yalavigwayo? 14 Viyaviya Zumbe kaagiiya wada wose wabiikiao Mbui Yedi, wakundigwa kwekhigwa khande kulawana na ndima iyo.

15 Akini miye shekukunda mwe yada mwekukundigwayo kunigosoeya. Naho khiandika aya nikakauwia kuwa mwendamnigosoee ayo, kwangu miye ni ebae kuuya na nyuma kusima kumtenda yoyose anikindie miye kwetogoa kuwa nabiikia Mbui Yedi kwesiho kuihwa. 16 Ikawa nabiikia Mbui Yedi, iyo khio mbui ya kwevuna kwaajii iyo ni ndima nekwekhigwacho. Naho mmbwii yangu yendayoyanibwiie inga khina nibiikie Mbui Yedi ya Muungu! 17 Inga nee kiisagua ndima inu mwenye nee nikakauwia kuihwa, akini isasa nakundigwa kugosoa kwaajii Muungu nee ekwenekhae ndima inu niigosoe. 18 Maiho yangu ni yahi? Maiho yangu ni kubiikia wantu Mbui Yedi ya Muungu bue, kwesiho kukunda yada nekukundigwayo kwekhigwa kwaajii ya kubiikia Mbui Yedi.

19 Mie khio mtumwa wa mntu yoyose, akini ketenda kuwa mtumwa wa kia mntu ili kuwaambiza wantu wangi muno wamzumie Klistu. 20 Kwa Wayahudi nekiwa inga Myahudi ili niwaambiize Wayahudi ili wamzumie Klistu, kwa wada watongeao miko ya Msa niketenda inga naongweea na miko ya Msa ili niwaambize watongeao miko kumzumia Klistu. 21 Kwa wada ambao khawaongoewa na miko, nee nekaa inga wowo, ili niwaambize kumzumia Klistu, inu khio kuwa miye khiongoewa na mwiko wa Muungu kwaviya naongoewa na mwiko wa Klistu. 22 Kwa wada wesaokutintimaa mwe uzumizi, na miye khitenda kuwa shekutintimaa mwe uzumizi ili niwaambize awo wesaokutintimaa mwe uzumiizi. Nee natenda kia kintu kwa wose ili nidahe kuwaohoa wamwe wao.

23 Nagosoa aya yose kwaajii ya Mbui Yedi ya Muungu ili nidahe kuhokea majaiwa yakwe hamwe na watuhu. 24 Ivi khammanya wantu wavotanaho mwe kuguuka, wose waguuka akini ni yumwe du ahokeae funge? Ivyo na nywie guukani muno ili mdahe kuhokea funge. 25 Kia mntu agosoae msizigo wa kuguuka ukindia mwe mbui nyingi, wowo wagosoa ivyo ili wekhigwe funge ibanikanayo akini swie tagosoa ivyo ili kwekhigwa funge yesayokubanika misi yose kwesiho kisiikizi. 26 Viyaviya na miye naguuka muno ili nivote, naho nee nitoanavyo na khio inga mntu atoae pheho. 27 Nautenda mwii wangu uzizimize kwa kuusuumiza na kuugosoeza ndima, ili nikabinda kuwabiikia wantu watuhu miye mwenye nesekweza kuemewa hemeso ya Muungu.