1 Nitongeani miye inga viya nimtongeavyo Klistu.

2 Nawatogoa nywie kwaviya mwanikumbuka naho mwatoza mahinyo yose nekuwahinyayo. 3 Akini nakunda mmanye kuwa Klistu ni mgookezi wa kia mgosi, nae mgosi ni mgookezi wa mkaziwe, viyaviya Muungu ni mgookezi wa Klistu. 4 Ivyo mgosi avikae na kubiikia mbui kulawa kwa Muungu uku kagubika mtwi wakwe, uyo amgea soni Klistu ambaye nee mtwi wakwe. 5 Naho mvyee akavika hambu kubiikia Mbui ya Muungu, kwesiho kugubika mtwi wakwe ambea muumewe, naho aigana na mvyee mwekumogwae fii za mtwi wakwe. 6 Mvyee mwesaekugubika mtwi wakwe, ni vyedi amoge fii zakwe. Akini ni soni kwa mvyee kumoga fii zakwe, ni vyedi akagubika mtwi wakwe. 7 Khivyo vyedi mgosi kugubika mtwi wakwe, kwaajii yee ni msimo wa Muungu na aonyesha kumtunya Muungu, akini mvyee aonyesha kumtunya muumewe. 8 Kwaviya mgosi khekuumbwa kulawa kwa mvyee, akini mvyee kaumbwa kulawa kwa mgosi. 9 Mgosi khekuumbwa kwaajii ya mvyee, akini mvyee khaumbwa kwaajii ya mgosi. 10 Kwaajii ya wandima wa uwanga kwa Muungu, mvyee akundigwa agubike mtwi ili kuonyesha yu asi ya uongweezi wa muumewe. 11 Mwe wekaisi wetu na Zumbe, mvyee amkauwiiya mgosi, na mgosi amkauwiiya mvyee. 12 Inga viya mvyee ekuumbwavyo kulawa kwa mgosi, nee ivyo mgosi avyaigwa na mvyee. Akini kia kintu chalawa kwa Muungu.

13 Amuani wenye, ivi ni vyedi mvyee kumvikia Muungu kwesiho kugubika mtwi wakwe? 14 Ata mii yenye yaonyesha pwii kuwa kwa mgosi kuwa na fii zekulehazo ni soni kwakwe mwenye, 15 akini kwa mvyee kuwa na fii zilehazo ni ntunyo kwakwe. Kekhigwa fii zilehazo ili zimgubike. 16 Akini inga mntu yoyose akakunda kuhigana mwe idi, aho amanye kuwa swie khatina mazweeya matuhu, naho mazumwezumwe yamzumiayo Klistu khayana mazweeya matuhu.

17 Ikawa naendeea kuwekha miagiiyo inu, khidaha kuwatogoa katu, kwaajii mkintanikaho mwagosoa mbui fyaimi kusima kugosoa mbui ntana. 18 Bosi, khiambigwa kuwa mkintanaho hamwe mwahigana, mwe ayo nekuyategezayo matuhu ni ya kwei. 19 Haika mahigano lazima yalawiiye, ili wada wamzumiao Muungu wadahe kumanyika. 20 Mkintanaho hamwe, khamda khande ya Zumbe inga ikundigwavyo. 21 Kwaviya kia mntu ada khande yakwe kwesiho kuwekha watuhu, ivyo uwatenda watuhu kuwa na saa na watuhu wakolwa. 22 Ivi khamdaha kuda na kudomea mwe nyumba zenu! Ivi nywie mwawabea wantu wa Muungu na kuwagea soni awo wesao kintu? Ivi niwatogoe mwe mbui inu? Khivyo mwe mbui inu khiwatogoa.

23 Kwaviya mahinyo nekuyahokeayo kulawa kwa Zumbe nee nekuwahinyayo nywie kio kia Yesu khazati kugwiiwa, Zumbe Yesu akadoa bumunda, 24 akamtogoa Muungu, akaubendua na kugombeka, "Unu nee mwii wangu kwaajii yenu, gosoani ivi kwa kunikumbuka." 25 Viyaviya wekubindaho kuda, nee adoa kikombe na kugombeka, "Kikombe iki ni agane dihya digosolwado kwa phome yangu, gosoani ivi, kia mdomeaho kwa kunikumbuka."

26 Kwaviya kia mdaho bumunda na kudomea kikombe icho, mwabiikia ufe wa Zumbe, adi aho endahoeze. 27 Ivyo, kia adae bumunda na kudomea kikombe cha Zumbe kwa viya vyesavyokukundigwa, endaawe kagosoa mavigaviga kwaajii kabea mwii na phome ya Zumbe. 28 Kia mntu akundigwa emamakhanye yee mwenye, nee ade bumunda na kukidomea kikombe icho. 29 Kwaviya mntu akada bumunda na kukidomea kikombe icho kwesiho kumanya vitana mana ya mwii wa Zumbe, ada na kudomea uwamuio wakwe mwenye. 30 Inu nee mana wantu wangi gatigati yenu ni wanyonge na watuhu ni watamu naho watuhu wauya na nyuma. 31 Inga nee tikemamakhanya wenye vitana, Muungu nee khatiamuiya. 32 Akini tiamuiwaho na Zumbe, tahinywa kuwa wedi, ili tesekuoneka tina masa inga wantu wa inusi.

33 Wandugu zangu, mkintanaho kuda khande ya Zumbe, gojaneni na mhokeane kwa moyo wa ukundiso. 34 Inga kuna yoyose ana saa, na ade mwe nyumba yakwe ili kukintana kwenu kwesekuwatenda kuamuiwa na Muungu, akini mwe yada matuhu nendaniwagombeke aho nikeza.