1 Wandugu zangu, nekuwaho aho henu nchekudaha kugombeka na nywie inga wantu waongweewao na Muye wa Muungu. Akini nekiwa nagombeka na nywie inga wantu waongweewao na mbui za inusi, naho inga wana wateke mwe kumzumiia Klistu. 2 Nee nawahinya mahinyo mahifu kumanyika inga viya mmaa amuokhesavyo mwanawe, khamwekhudaha kuhokea khande itogayo na ata isasa khamdaha kuhokea mahinyo yekuiganiayo ya mbui ya Muungu, 3 kwaviya mwekaisa inga wantu wa inusi wekaisavyo. Kauwani mna kinyuu na khumbizi gatigati yenu, mbui izo zaonyesha kuwa nywie ni wantu wa inusi na mwekaisa kwa kutongea khwiina za inusi. 4 Kwaviya yumwe yenu agombekaho, "Namtongea Paolo" mtuhu nae agombekaho, "Namtongea Apolo" Ivi iyo khaionyesha mke mwekaisa inga wantu wa inusi inu? 5 Ivi Apolo ni ndai? Na paolo ni ndai? Swie tiwandima tekuwabiikiao mbui ya Klistu. Kia yumwe yetu agosoa ndima ida ekwekhigwayo na Zumbe aigosoe. 6 Nekuwagombekeaho Mbui Yedi ya Muungu nekiwa inga mntu ahandae mbeyu, naho Apolo akeza kwetiiya, akini Muungu nee atendae ihote na ikuwe. 7 Ekuhandae na ekwetiiyae mazi khio kintu, iya wa mana ni Muungu aitendae ihote na ikuwe. 8 Yuda mwekuhanda na ekwetiiyae mazi wagosoa ndima za kuigana, Muungu endaawaihe kia yumwe kuigana na ndima ekugosoayo. 9 Kwaviya swie ni wandugu, wandima hamwe na Muungu, nywie ni mnda wakwe.

Na nywie ni nyumba yakwe Muungu. 10 Kwa wedi ekunekhao Muungu na miye inga mzengi nimanyae ndima yangu, nikazenga msingi ambao mntu mtuhu azenga uwanga ya msingi uwo. Akini kia yumwe akundigwa ekauwe viya azengavyo. 11 Kwaajii msingi wekuzengwao kae nee Yesu Klistu mwenye. Na khahana mntu adahae kuzenga msingi mtuhu. 12 Akini mntu yoyose akazenga uwanga ya msingi kwa zahabu, hambu madini ya feza, hambu maiwe ya yombe khuu, hambu mazengo hambu mani hambu mainde, 13 ndima yakwe yendaioneke viya yeivyo msi uda wa kuamuiwa, Klistu endahoaike pwii kwaviya ndima ya kia mntu yendahiimwe kwa moto wa kuamuiwa. 14 Ikawa ndima ya mntu yoyose azenga mwe msingi uwo haitaungua, mzengi uyo endaekhigwe funge. 15 Akini ikawa ndima ya mntu yoyose ihya na moto, endaawe kaza vyose, akini mwenye endaaoholwe inga mntu ekuhonywavyo mwe moto.

16 Ivi khammanya kuwa nywie ni Nyumba ya Muungu, na Muye wa Muungu wekaa uumo mwenu? 17 Ivyo mntu yoyose akaibananga Nyumba ya Muungu, Muungu nae endaambanange mntu uyo, na nywie ni inga Nyumba ya Muungu kwaajii nywie ni wantu wakwe Muungu.

18 Mntu yoyose asekwetiiya kuwa ni mwenye unyanyi. Mntu akeona kuwa ana unyanyi mwe inusi ni vyedi etende mhezi ili ekhigwe unyanyi wa kwei. 19 Kwaviya unyanyi wa wantu wa mwe inusi, uwo ni uhezi hemeso ya Muungu. Inga Maandiko ya Muungu yaandikwavyo, "Muungu awagwiya wenye umanyi mwe unyanyi wao," 20 Naho hantu hatuhu he Maandiko ya Muungu yamba, "Zumbe amanya kuwa mamakhanyi za wenye umanyi khazina mana." 21 Kwaajii ya ayo msekwevunia mgokeezi yoyose, wagookezi wose waikwa kuwaambiza nywie inga wantu wa Muungu. 22 Awe Paolo hambu Apolo hambu Kefa hambu inusi hambu ugima hambu kuuya na nyuma, hambu mbui za isasa na mbui zezazo ayo yose ni yenu. 23 Akini nywie ni wantu wa Klistu, Klistu nae ni wa Muungu.