1 Mwe mbui zia mwekuniandikiazo.

Natambaisa ni vyedi mgosi asekutegua. 2 Kwaajii ya wantu wangi kugosoa ukianga, yakundigwa kia mgosi awe na mkaziwe, na kia mvyee awe na muumewe. 3 Muume awe amgosowea mkazie inga ikundigwavyo na viyaviya mvyee nae awe amgosowea inga ikundigwavyo. 4 Mvyee khana udaho mwe mwii wakwe mwenye, akini mwenye udaho mwe mwii wakwe ni muumewe, neivyo na muume khana udaho mwe mwii wakwe iya mkaziwe nee mwenye udaho wa mwii wa muumewe. 5 Msekukonyana, akini inga mkevana kugosoa ivyo kwa kisingi kidodo, ili mdahe kumvikia Muungu ni vitana, mkabinda muuiyane vituhu, ili Shetani asekuwageeza kwaajii ya kuvotwa kwekindia.

6 Niwagombekayo khio amli iya ni miagiiyo yangu. 7 Mie nee nikakunda wantu wose wawe inga ivi miye neivyo, akini khivyo yeivyo kwaviya kia mntu Muungu kamwekha funge yakwe, yumwe ekhigwa iki na mtuhu kekhigwa kia.

8 Akini nawamba wada ambao khawekutegua na wada ambao khawekutegulwa na wada wekufiwao ni wagosi ni vyedi wakaendeea kwekaisa ikedu inga viya miye nekaisavyo. 9 Akini inga mntu khadaha kwekindia moyo ni vyedi ategue hambu ategulwe kusima kuwa na khwiina.

10 Kwa wada wekuteguanao, nawekha mwiko unu, naho khio wangu ni wa Zumbe, mvyee asekumbada muumewe. 11 Akini akabadana nae, akundigwa asekutegulwa vituhu, ama khivyo wevane na muumewe na kuuwiiana. Mgosi nae akundigwa asekumbada mkaziwe.

12 Kwa watuhu nagombeka ni miye mwenye khio Zumbe, ikawa mgosi mwekumzumia Klistu kategua mvyee mwesaekumzumiya Klistu, akini kazumiya kwekaisa nae, asekumbada. 13 Naho ikawa mvyee mwekumzumia Klistu kategulwa na mgosi mwesaekumzumiya Klistu, akini kazumiya kwekaisa nae, asekumbada. 14 Kwaviya mgosi mwesaekuwa mzumizi, uzumiwa na Muungu, kwaviya kawa kintu kimwe na mkaziwe ekumzumiae Klistu. Naho mvyee mwesaekuzumiya, azumiwa na Muungu kwa kuwa kintu kimwe na muumewe ekumzumiae Klistu. Inga nee khivyo ivyo wana wao nee khawahokewa na Muungu, akini isasa wazumiwa ni Muungu. 15 Akini ikawa yuda mwesaekuzumiya akoona ni vyedi kumbada mwenziwe, mbadeni atende ivyo. Aho uyo mwekuzumiiya mgosi hambu mvyee endaawe hulu. Kwaviya Muungu kawetanga mwekaise kwa uivanisa. 16 Kudaha kumanya! Yadahika mgosi yako adaha kumzumia Klistu kwaajii ya kuzumia kwako, nawe mgosi uzumiiyae, mkazio adaha kumzumiia Klistu kwaajii ya kuzumiiya kwako.

17 Kia yumwe ekae inga viya Zumbe ekumwekhavyo funge, naho inga viya ekwetangwavyo ni Muungu. Unu ni muagiiyo wangu mwe mazumwezumwe ya wantu wamzumiao Klistu. 18 Inga mntu ketangwa ni Muungu akawa kagwiswa, aho asekwetenda inga khazati kugwiswa, naho inga mntu ketangwa akawa khazati kugwiswa, na abadwe asekugwiswa. 19 Kwaviya kugwiswa hambu kwesekugwiswa khio kintu. Kikuu ni kutoza Miko ya Muungu. 20 Kia yumwe yenu na asigae inga viya ekuwavyo kisingi ekwetangwaho ni Muungu. 21 Ivi wee nekuwa mtumwa kisingi wekwetangwao ni Muungu? Wesekupatiiza, akini ukapata phasi ya kuekewa, hauka. 22 Mntu yoyose ekwetangwae ni Zumbe akawa mtumwa, uyo mntu awa kaekewa kwa Zumbe, viyaviya mntu ekwetangwae ni Klistu akawa kaekewa, yee ni mtumwa wa Klistu. 23 Muungu kawagua kwa gaama khuu, ivyo mwesekutendwa watumwa wa wantu. 24 Wandugu zangu, mwe wekaisi wenu mhya hamwe na Muungu, kia yumwe yenu akundigwa kuendeea kuwa inga eivyo kisingi Muungu ekumwetangaho.

25 Isasa nendaniwagombeke mbui mwekuniuzayo mwe mbui ya wada wesao kutegulwa na kutegua, khina mwiko kulawa kwa Zumbe mwe mbui iyo, akini miye naavya mamakhanyi zangu na kwaajii Zumbe kanionea mbazi naho mwadaha kunizumiia.

26 Kwaajii kuna suuba nyingi mwe misi izi namamakhanya ni vyedi mntu asigae inga eivyo. 27 Ikawa kutegua wesekukunda kumbada mkazio, ikawa kwekutegua wesekukunda kutegua. 28 Akini mgosi akategua khanaawe agosoa mavigaviga, na viyaviya mndee inga akategulwa endaawe khekugosoa mavigaviga. Iya wada wekuteguanao wendawawe na suuba mwe wekaisi unu na miye nee khikunda suuba izo ziwabwiie.

29 Wandugu zangu nakunda kugombeka ivi, kisingi chekusigaacho adi Klistu auye ni kijihi, ivyo kulawa isasa wada wekuteguao waeke kumamakhanya wavyee wao du iya wagosoe ndima ya Zumbe. 30 Wada waiyao na watende inga khawaiya, na wenye nyemi wawe inga khawana nyemi, wose waguao vintu na wawe inga khawana vintu, 31 wose waangadikao na mbui za inusi, wawe inga wantu wesaokuangadika na mbui izo, kwaviya inusi inga timanyavyo yendaibue kisiikizi.

32 Akini nakunda nywie mwesekuwa na maatu. Mntu esaekutegua, eavya muno kugosoa ndima za Muungu, agosoa kia adahado kumtamiiza Muungu. 33 Akini mgosi mwekutegua angadika na mbui za inusi, kwaviya amamakhanya endavyoamtamize mkaziwe, 34 naho avutwa mwe mamakhanyi yakwe yawa mwe mbui mbii. Mvyee mwesaekutegulwa eavya mwenye mwe ndima za Zumbe, kwaviya akunda mwii na moyo wakwe kuvilavya kwa Muungu, akini mvyee mwekutegulwae uangadika na mbui za inusi na amamakhanya endavyoamtamize muumewe.

35 Nagombeka ivi kwa kuwaambiza nywie, khio inga nakunda kuwakindia. Akini nakunda nywie mgosoe inga viya vikundigwavyo, mgosoe ndima ya Zumbe kwa moyo wose.

36 Inga mntu yoyose amamakhanya kuwa khatenda vitana akesekutegua, nae akawa myaka yakwe yemboka na mntu uyo aona yamkunda kutegua agosoe inga akundavyo. Yee khagosoa mavigaviga, akundigwa wateguane. 37 Mgosi akakunda mwenye kwesekutegua naho adaha kuzivota khwiina zakwe na kumbada mndee ekukundae kumtegua endaawe kagosoa vitana. 38 Ivyo mgosi akategua mndee yuda ekukundae kumtegua atenda vyedi, akini yuda esaekutegua atenda vyedi muno.

39 Mvyee ekutegulwae kafungwa na muumewe kwa kisingi chose wake wagima, akini muumewe akauya na nyuma, adaha kutegulwa ni mgosi yoyose amkundae, akini awe du mwekumzumia Klistu. 40 Akini ni vyedi asigae kwesiho kutegulwa, izo ni mamakhanyi zangu, kwaviya nagombeka kwa kuongoewa na Muye wa Muungu.