1 Wandugu zangu, kisingi nekwezaho kwenu kubiikia mbui ya kwei ya Muungu, khio kuwa nagombeka ili kweonyesha namanya kugombeka vitana hambu nina umanyi. 2 Kwa mana khiamuwa kuwa nekuwaho kwenu nigombeke mbui zekuwazo za Yesu Klistu du asa ufe wakwe he mhamba kwesiho kugombeka mbui ntuhu. 3 Nekuwaho kwenu nekhiwa mnyonge, mwenye maatu na kuzingiza. 4 Kisingi nekuwaho nahinya na kisingi nekuwaho nabiikia, nchekuwa nagombeka mbui ili nywie mnione nina umanyi iya udaho wa Muye wa Muungu neziwa zaonyesha ukwei. 5 Khitenda ivyo, ili kuzumiiya kwenu kwesekwekauwia umanyi wa mntu akini kwekauwie nguvu za Muungu.

6 Swie tagombeka mbui ya umanyi kwa wada wekutogao mwe kuzumiiya. Akini khio umanyi wa mwe inusi, wala khio kwa waongoeezi wa mwe inusi inu, iya kwa wada ambao wana kisiikizi cha kugookea. 7 Akii tiigombekayo ni umanyi wa sii ya Muungu yekufiswayo kwa wantu, ida ekusaguayo kabla ya kuumbwa kwa inusi kwaajii ya swie kwekhingwa wedi wetu. 8 Ni umanyi ambao wakuu wa inusi inu khawekuimanya kwaviya nee waimanya, nee khawekumgong'ondea he mhamba Zumbe wa kutunywa agookeae uwanga kwa Muungu na inusi. 9 Akini inga yekuandikwavyo mwe Maandiko ya Muungu,

"Mbui zia khahana mntu adahae kuona, hambu kutegeeza.

Mbui zia ambazo mntu khazati kumamakanya mwe moyo inga yendayalawiiye,

Izo nee mbui Muungu ekuwaikiao wada wamkundisao."

10 Akini swie Muungu kationyesha mbui izo kwembokea Muye wa Muungu, kwaviya Muye wa Muungu wakauwa yose ata mbui zia ambazo Muungu kazifisa. 11 Ivi ni ndai adahae kumanya mamakhanyi za mntu iya muye wakwe mwenye? Viyaviya khahana mntu amanyae mamakhanyi za Muungu iya Muye wakwe. 12 Nee mana swie khatekuhokea muye wa inusi, akini Muungu katekha Muye wakwe ili tidahe kumanya yada yose matana ekutekhayo.

13 Naho khatigombeka kwa mbui zekuhinywazo kwa umanyi wa mntu iya swie tagombeka mwe mbui tekuhinywazo ni Muye wa Muungu, tatamwiiza mbui za Muye kwa wantu wekuwao na Muye wa Muungu. 14 Mntu esaekuwa na Muye wa Muungu khadaha kuhokea mbui zilawazo kwa Muye wa Muungu. Kwaajii mbui izo kwakwe ni uhezi, nae khadaha kumanya kwaviya mntu amanya izo mbui kwa uwambiizi wa Muye wa Muungu du. 15 Iya mntu aongweewae na Muye, uyo aiva mbui zose, akini wantu wesaokuwa na Muye wa Muungu khawadaha kumwiva yee. 16 Inga yekuandikwavyo mwe Maandiko ya Muungu, "Ni ndai amanyae mamakhanyi za Zumbe, ili amgombeke cha kugosoa?" Akini swie tina mamakhanyi zilawazo kwa Klistu.