1 Isasa wandugu zangu nawakumbusa Mbui Yedi nekuwabiikiayo kwenu, na nywie mkaihokea iyo nee iwatendayo kugooka kwa utintimavu. 2 Ikawa mwatozeeza Mbui Yedi inu nekuwabiikiayo mwendamuoholwe, iya inga khamtozeeza kuzumiiya kwenu ni bue.

3 Mie nee khiwahinya nywie mbui za mana muno ambayo miye nee kiyahokea, kuwa Klistu nee kauya na nyuma kwaajii ya mavigaviga yetu, inga yekuandikwavyo mwe Maandiko ya Muungu. 4 Naho akaikwa mwe mbia, akayuyuka mwe msi wa ntatu, inga viya yekuandikwavyo mwe Maandiko ya Muungu, 5 akamlawiiya Petulo,* naho nee awalawiya wagiiwa wakwe kumi dimwe na waidi. 6 Naho akawalawia wazumizi wekutendesao mia shano kwa maa mwenga, wangi wa awo wake wagima, akini wamwe wao wauya kae na nyuma, 7 akamlawiya Yakobo, naho akawalawia wagiiwa wose.

8 Ekubindaho kuwalawiiya wose nee anilawiya na miye, nekuwae inga mntu ekuvyaigwae kisingi ambacho khio chakwe. 9 Kwaviya miye ni mdodo kusima wose mwe wagiiwa, naho khifaa kwetangwa mwagiiwa kwaajii khiwasuumiza wantu wekumzumiao Klistu. 10 Akini kwa wedi wa Muungu khiwa ivi neivyo, naho wedi wakwe Muungu khawekuwa bue kwangu. Khigosoa ndima kusima wose, akini khio miye nekugosoae ndima kwa udaho wangu, iya ni uda wedi wa Muungu wekuwao hamwe na miye. 11 Ivyo niwe ni miye nibiikiae hambu wawe waagiiwa watuhu, tabiikia mbui idaida ambayo muizumiia.

12 Isasa inga tibiikia kuwa Klistu kayuyuswa, yawa viivihi wamwe wenu wagombeka khahana kuyuyuka? 13 Ikawa khahana kuyuyuka, viyaviya Klistu khekuyuyuka, 14 na inga Klistu khekuyuyuka, viyaviya kubiikia kwetu khakuna mana, na kuzumiiya kwetu khakuna mana. 15 Akini swie nee tioneka kuwa ni wahokho mwe mbui ya Muungu kwaviya tagombeka kuwa Muungu nee kamyuyusa Klistu. Akini inga wekuuyao na nyuma khawayuyuswa, naho Muungu khekumyuyusa Klistu. 16 Kwaviya ikawa ni kwei wekuuyao na nyuma khawanawayuyuswe, viyaviya ata Klistu khekuyuyuka. 17 Ikawa Klistu khekuyuyuka, ivyo kuzumia kwetu ni bue, naho mke mwe mavigaviga yenu. 18 Viyaviya wada wose wekuuyao na nyuma uku wamzumia Klistu waga kae. 19 Ikawa kauwio detu mwe Klistu ni wekaisi wa isasa du, swie ni wantu wa kufiiwa mbazi kusima wose mwe inusi.

20 Akini ukwei ni kuwa Klistu kayuyuswa, yee ni wa bosi kuyuyuka kwa wada wekuuyao na nyuma. 21 Kwaviya inga viya ufe ukuetwavyo na mntu yumwe mwe inusi, viyaviya kuyuyuka kuetwa na mntu yumwe. 22 Inga viya wantu wose wauyavyo na nyuma kwa viya tilawa na Adamu, viyaviya wantu wose wendawayuyuswe kwa kumzumiia na Klistu. 23 Akini kia yumwe endaayuyuswe kwa kutongea sia inu, Klistu nee wa bosi kuyuyuka, kisingi chezacho wada wekuwao wakwe Klistu wendawayuyuswe endahoeze. 24 Yendahoyemboke ayo, kisikiizi chendakibue kisingi Klistu endahoamwekhe Useuta Muungu Tate, bada ya kubananga wagookezi wose na wenye udaho wose na wenye nguvu wose. 25 Kwaviya Klistu akundigwa aongoee adi awavote wamasa wakwe na kuwaongoea. 26 Mmasa wa kisikiizi endaeadagamizwe ni ufe. 27 Kwaviya Maandiko yagombeka, "Muungu kaika vintu vyose asi ya ugookezi wakwe." Agombekaho kaika vintu vyose asi yakwe ni pwii kuwa Muungu khayumo, kwaajii Muungu mwenye nee mwekuika vintu vyose asi ya mwe ya Klistu. 28 Vintu vyose vyendahoviikwe asi ya ugookezi wa Mwanawe, nee aho Mwana uyo endaeike mwe ugookezi wa Muungu, ambae kaika vintu vyose asi ya ugookezi wa Mwanawe, ili Muungu awe mgookezi wa vyose.

29 Ikawa khakuna kuyuyuswa, ivi wada wekubatizwao kwaajii ya wekuuyao na nyuma wendawakauwie kwekhigwa mbwahi? Ikawa wekuuyao na nyuma khawanawayuyuswe, kwa mbwai wantu wabatizwe kwaajii yao? 30 Swie naswi, ni kwa mbwai tehosa tiuye na nyuma? 31 Wandugu zangu kia msi miye nehosa mwe ufe, kwetogoa kwangu nikoona nywie muungana na Klistu Yesu Zumbe yetu, yanitenda kugombeka mbui inu. 32 Inga kauwio dangu nediwa da inusi, kuda kutowana kwangu na wantu mabagaa inga wanyama wakai kuda mwe mzi wa Efeso nee kuniambiiza mbwai? Ikawa wekuuyao na nyuma khawayuyuka, "Naho tiwe tada na kudomea kwaajii kioi tendatiuye na nyuma."

33 Mwesekwetiiwa na wantu wagombekao ivyo, kwaviya wambuya wafyaimi wabananga khachu yedi. 34 Enukani, muwe na umanyi! Ekani kugosoa mavigaviga, kwaajii wamwe wenu khawammanya Muungu katu. Nawagombeka ayo ili muone soni.

35 Mntu adaha kuuza, "Wekuuyao na nyuma wayuyuswa viivihi? Wendawawe na mwii wa viivihi?" 36 Mwesekuwa wahezi! Ukahanda mbeyu, khaidaha kuhota adi ivoke kuuya na nyuma. 37 Mhandaho, khamhanda mmea uda wekukuwao iya ni mbeyu du, iwe ni uhemba hambu mbeyu ntuhu. 38 Muungu ayekha mbeyu iyo mwii inga akundavyo yee mwenye, kia mbeyu ayekha mwii wakwe.

39 Viyaviya mii ya viumbe vyose khaiigana. Wantu wana mii yao, na wanyama wana mii yao, na wadege wana mii yao, na samaki wana mii yao.

40 Kuna mii ya uwanga kwa Muungu na mii ya mwe inusi, utana wa mii ya uwanga kwa Muungu khauigana na utana wa mii ya inusi. 41 Zuwa dina utana wakwe, na mweenge nao una utana wakwe, na ntoondo zina utana wakwe, na kia ntoondo ina utana wakwe.

42 Nee vyeivyo kisingi wekuuyao na nyuma wendahowayuyuswe. Inga weivyo msimo wa mbeyu, mwii nao waikwa mwe mbia ukawa ubanika, akini wendahouyuyuswe khauna ubanike. 43 Mwii uikwaho mwe mbia khauna utana wala nguvu, akini wendahouyuyuswe wendauwe na utana na nguvu. 44 Ukaikwa mwe mbia ni mwii wa mntu du, akini ukayuyuswa wawa mwii wa kimuye, uwaho mwii wa mntu naho kuna mwii wa kimuye. 45 Mwe Maandiko iyandikwa, "Mntu wa bosi Adamu nee kaumbwa akawa kiumbe chenye ugima," akini Adamu wa kisikiizi ni Muye awekhae wantu ugima. 46 Akini uvokao khio uda mwii wa kimuye, iya ni uda mwii wa mntu, naho weza uda mwii wa kimuye. 47 Adamu wa bosi kaumbwa kwa uongo, akini mntu wa kaidi alawa uwanga kwa Muungu. 48 Wantu wose wa mwe inusi wana mii inga weivyo mwii wa mntu wa bosi yani Adamu, akini wose wekuwao uwanga kwa Muungu waaho inga yuda ekuwae uwanga kwa Muungu. 49 Inga viya tekuiganavyo na yuda ekugosolwae mwe uongo yani Adamu, viyaviya tendatiigane na yuda alawae uwanga kwa Muungu yani Klistu.

50 Ivyo wandugu zangu nagombeka ivi, mwii wa phome na nyama khaudaha kwengia mwe Useuta wa Muungu, na kia kibanikacho khakidaha kuwa na ugima wa misi yose kwesiho kisiikizi.

51 Tegeezani nawamba mbui yekufiswayo, swie wose khatina tiuye na nyuma, akini wose tendatihitulwe, 52 vuu puu, kugubika na kugubua meso mwe kisingi gunda da kisikiizi dendahodikeme, wekuuyao na nyuma wendawayuyuswe na wendawawe na mii yesayo kuuya na nyuma vituhu, na swie tendatihitulwe. 53 Kwaviya mwii unu ubanikao wakundigwa uhituke uwe mwii wesao kubanika, na mwii uuyao na nyuma uhituke kuwa mwii wesaokuuya na nyuma. 54 Mwii unu ubanikao ukahituka kuwa mwii wesaokubanika na kiya chenye kuuya na nyuma chendahokihituke kuwa chesekuuya na nyuma, aho nee ukwei wa Maandiko yendahoyaiganie, "Ufe ubanangwa na uvoti uigania!"

55 "Ufe uvoti wako ukuhi?

Nguvu zako za kueta usungu zikuhi?"

56 Mavigaviga yaeta usungu wa ufe, naho nguvu ya mavigaviga yaoneka kwembokea mwe mwiko wa Msa. 57 Akini timtogoe Muungu, atekhae uvoti kwa sia ya Zumbe yetu Yesu Klistu.

58 Wandugu zangu muwe watintimavu mwe uzumizi, gosoani kia mdahado mwe ndima ya Zumbe, mkamanya kuwa kia mgosoacho ni kwaajii ya Zumbe na khamwepisha bue.