1 Khahana mbui yoyose miye kuwaandikia mwe mbui ya kuwaambiza wantu wa Muungu. 2 Namanya viya mweivyo na moyo wa kuambiiza na nevunia nywie mwe mbui iyo hemeso ya wantu wa mzi wa Makedonia nee khiwagombeka, "Wandugu zetu wa Akaya weika tayali kuambiza kuvokea mwaka zana." Kweavya kwenu mwe kulavya, kuwabibiiza wangi gatigati yao kuwa na moyo wa kulavya. 3 Khiwagiiya wandugu zetu awo, ili kwevunia kwetu kwenu nywie kwesekuoneka ni ntamwiizi du, akini ioneke mtayali muno na mwenavyo vintu vya kutiambiiza inga nekugombekavyo. 4 Kwaviya inga nikeza uko hamwe na wantu kulawa Makedonia na kuwabwiiya khamho tayali, aho tendatione soni kwaviya tekuwakauwiavyo muno, kugombeka chochose mwe mbui yenu ya malavyo. 5 Ivyo kiona yakundigwa awa ndugu wationgowee kweza kwenu, wadahe kuwekha funge mwekuikiayo kiaga naho ionyeshe kuwa ni funge yekulavigwayo kwa kukunda kwenu na khio kwa kukundigwa mlavye.

6 Kumbukani mntu yoyose ahandae hadodo abonda kidodo na yoyose ahandae kwa wingi abonda ubosi utendesao. 7 Kia yumwe naaavye kwa viya akundavyo kwa moyo umwe na khio kwa kukundigwa kugosoa ivyo, kwaviya Muungu awakundisa walavyao kwa nyemi. 8 Muungu adaha kuwekha nywie vintu vitendesavyo kusima viya mkundavyo, ili mdahe kuwa na kia kintu mkundacho, ivyo muwe wantu wa kugosoa yedi mwe kuwaambiiza watuhu. 9 Inga yagombekavyo Maandiko ya Muungu,

"Yee ulavya kwa moyo wa kukundisa, kuwekha wakiwa,

Wedi wakwe ni wa misi yose khauna kisiikizi."

10 Muungu amwekhae muimi mbeyu na khande, endaawekhe nywie mbeyu za kuhanda na endaazitende zihote na kukua na kuwekha ubosi utendesao muupatao kwaajii ya kulavya kwenu kwa moyo. 11 Misi yose endaawekhe vintu vingi ili wantu wangi wamtogoe Muungu kwaajii ya funge zenu wahokeazo kulawa kwetu. 12 Ndima inu mgosoayo khio kwaajii ya kuwekha wantu wamzumiiao Klistu yada wakundayo, iya viyaviya yendaitende wantu wangi wamtogoe Muungu. 13 Kulawana na yada yaonekanayo mwe ndima yetu inu, wantu wendawamtogoe Muungu kwaajii yenu nywie kuizumiiya Mbui Yedi ya Klistu mbiikiayo, akini viyaviya kwaajii ya moyo wenu wa ukundiso wa kuwekha wantu wose vintu vyenu. 14 Ivyo wendawawavikie nywie kwa moyo kwaajii ya wedi ekuwekhao Muungu. 15 Atogolwe Muungu kwa funge yakwe yesayokudahika kugombekeka ekutekhayo.