1 Wambuya wangu tikawa tiikiwa viaga ivi vyose, tezingue na tibade mbui zose zendazozititende mii yetu na mioyo yetu yesekuzumiwa mwe mbui ya kumvikia Muungu, ili tiwe wantu wa Muungu na kwekaisa kwa kumtunya Muungu.

2 Tikundiseni kwa mioyo yenu yose! Khatina masa na mntu yoyose, khatekumumiza mntu yoyose hambu kumtiiya mntu. 3 Khigombeka mbui izi ili kuwaamuiiya nywie kuwa mna masa, inga viya nekugombekavyo aho bosi, nywie muho mwe mioyo yetu tikawa wagima hambu kuuya na nyuma. 4 Nawazumiia muno, na nevunia nywie, nina nyemi kwaajii yenu. Mwe masuumizo yetu yose nekhigwa moyo na kuwa na nyemi muno. 5 Kwaviya ata tekwiingiaho mwe mzi wa Makedonia khatekudaha kuhumuiza. Kia phande nekuwa na masuumizo, chongoi nekuwa na khondo na mwe mioyo yetu nee kuna maatu. 6 Akini Muungu mwenye kuwagea moyo wenye uhovu, nee atigea moyo swie viyaviya kwa kweza kwakwe Titu. 7 Khio kwa kweza kwakwe Tito du, iya ni kwaviya mwekumgeavyo moyo. Yee katigombeka viya mkundavyo muno kuniona na viya mwekuwavyo khamna nyemi, na mgosoaho kia mdahado kwaajii yangu, mbui iyo ikanitenda nitendese kuwa na nyemi. 8 Ata inga kiwagea uhovu kwembokea bauwa yangu, naho khisininiika kuwa nee kiwandikia bauwa iyo, kwaviya namanya bauwa yangu iwatenda kuwa na uhovu, akini ni kwa kisingi kijihi du. 9 Akini isasa nina nyemi, khio kwaviya kiwatenda muwe na uhovu, iya kwaviya uhovu wenu uwatenda kumuuiya Muungu. Uwo uhovu uetwa na Muungu ili nywie mhituke, ivyo swie khatikuwaumiza kwa dodose. 10 Kwaviya kuwa na uhovu viya akundavyo Muungu, utenda wantu kuhituka na kubada mavigaviga yao na kuoholwa, ivyo khahana chochose chendachokititende tiwe na usungu, akini uhovu wa inusi ueta ufe. 11 Isasa mwamanya kia ambacho Muungu kagosoa mwe uhovu wenu, kuwaetea mbui ntana, iwatenda muwe na khwiina ya kugosoa mbui zikundigwazo. Mwadaha kwegombekea wenye kwa yada muyagosoayo kuwa ni kwei, mwadaha kuemea makwasukwasu na mwadaha kumtunya Muungu, akini viyaviya mwakunda kuona mntu agosoae masa ekhigwa sugusa inga ikundigwavyo, akini mwe ayo yose mwaonyesha khamna masa mwe mbui inu. 12 Ivyo etiho khiwaandikia, kayokuwa kwaajii ya uyo ekutendae masa hambu uyo ekutendewae masa. Akini nee nikakunda imanyike pwii hemeso ya Muungu mwekweavyavyo kwaajii yetu. 13 Mwe mbui izi tiambizwa.

Naho mwe kuambizwa netiwa na nyemi tekuonavyo Titu ekuwavyo na nyemi kwaviya mwekumtamizavyo nywie nyose. 14 Miye khiwatogoa nywie hemeso yakwe, naho mwe mbui iyo khamkunigea soni. Tigombeka kwei misi yose, ivyo kwetogoa kwetu hemeso ya Titu iyoneka ni mbui ya kwei. 15 Ivyo kuwakundisa kwakwe kutendesa muno, akumbukaho viya mtegeezaho na viya mwekumuhokeaho kwa kuogoha na kuzingiza. 16 Nina nyemi kwaviya nadaha kuwakauwiya muno kwa kia mbui.