1 Ivi tavoka kwevuna wenye? Ivi takunda bauwa ya umanyisi kwenu hambu kulawa kwenu inga wantu watuhu? 2 Nywie wenye ni bauwa yetu iandikwa mwe mioyo yetu, kia yumwe aiyone na kuisoma. 3 Yamanyika kuwa nywie ni bauwa ya Klistu, ekuyegaayo kwa mikono yetu. Bauwa yenye, khaikuandikwa kwa wino iya kwa Muye wa Muungu ekuwae mgima, khaikuandikwa mwe iwe iya iandikwa mwe mioyo ya wantu.

4 Tadaha kugombeka ivi, kwaajii ya kauwiyo detu tekuwado nado kwa Muungu kwa sia ya Klistu. 5 Khio kugombeka tadaha kugosoa chochose kwa nguvu zetu wenye, akini udaho wetu wose walawa kwa Muungu. 6 Yee nee atitendae tiwe wandima mwe diagane dihya, naho khio agane da miko dekuandikwado iya kwa agane da Muye wa Muungu. Kwaviya mwiko wekuandikwao ueta ufe akini Muye ueta ugima.

7 Mwiko uandikwa kwa kusongoa mwe ntii za maiwe. Hamwe na kugombeka kisiikizi chakwe ni ufe, naho ung'ao wakwe neuwa mkuu muno ata Waisilaeli wasekudaha kukauwa cheni cha Msa kwaajii ya ung'ao. Naho ukuu uwo neuwa wa kisingi kidodo du. 8 Isasa ndima iyo ya Muye wa Muungu khauna uwe na ukuu muno? 9 Ikawa ndima zietazo ufe zina ukuu, ivi ndima zietazo uohozi khazina ziwe na ukuu muno? 10 Kwaviya kia chekuwacho na ukuu isasa, khakina ukuu kuigana na ukuu unu utendesao muno wa Agano dihya. 11 Ikawa kia chekuwacho cha kisingi kijihi du nekiwa na ukuu wakwe, kia chekaacho misi yose chendakiwe na ukuu utendesao muno.

12 Kwaajii idi nee kauwiyo detu, khatiogoha muno. 13 Swie khio inga Musa ekukundigwae kugubika kitambaa mwe cheni chakwe ili wantu wa Waisilaeli wasekuona kisiikizi cha mng'ao uda wekuwaowasia. 14 Umanyi wao ugewa kiza, ata ivyeo disomwaho agane da kae, kitambaa icho kike aho. Kitambaa icho chauswa du hada mntu amzumiiaho Klistu. 15 Ata ivyeo hohose isomwaho miko ya Musa, kitambaa ugubika akii zao. 16 Akini mntu akamhitukia Zumbe, kitambaa icho chekumgubikacho chauswa. 17 Isasa, "Zumbe" nee Muye, naho hohose aho ekuwao Muye wa Muungu, tiekewa. 18 Naho swie ambao khatekwegubika vyeni vyetu kwa kitambaa, taonyesha ukuu wa Zumbe inga kioo ambavyo chaonyesha, na swie tahitulwa ili tiigane nae kulawa mwe ukuu umwe adi mwe ukuu mtuhu wekuwao mkuu muno. Zumbe ni Muye na nee agosoaye ndima iyo.