Compaixão
A compaixão é o coração de Deus em ação. Ele é compassivo e misericordioso, tardio em irar-se e grande em amor. Somos chamados a refletir essa compaixão no mundo.
ज़ेन्च़रे बाजी अपने बच्चन पुड़ तरस खाते,
तेन्च़रे यहोवा तैन पुड़ तरस खाते, ज़ैना तैसेरो डर मनतन।
पन प्रभु दया केरनेबालो ते अनुग्रह केरनेबालो
ते च़िरे सेइं क्रोध केरनेबालो ते बड़ो प्यार केरनेबालोए।
किजोकि तेरी दया ज़िन्दगी भर बड़ी रोड़ीए,
अवं तेरी तारीफ़ केरेलो।
असां मिटी न जे; ई यहोवारी महाकरुणारो फले, किजोकि तैसेरी दया कधे खतम न भोए।
रोज़ झ़ेझ़ां तैसेरी करुणा ते दया नंव्वी भोती रैतिन; तेरी सच़्च़ाई महाने।
"कुन एन भोइ सकते कि कोई अम्मा अपने दुद्ध पीते बच्चे बिसरी सकतीए ते अपने ज़र्मोरे मट्ठे पुड़ दया न केरे? हाँ तै त बिसरी सकतीए, पन अवं तीं न बिसरी सेखी। हेर, मीं तेरी शकल अपने हथ्थेरी तेई पुड़ घेड़तां बनेवरीए; ते तेरी शहरपनाह हमेशा मेरी नज़री मां मेरे सामने बनोरी रहतीए।
फिर भी यहोवा एल्हेरेलेइ च़िर लाते, कि तै तुसन पुड़ अनुग्रह केरे, ते एल्हेरेलेइ उच्चे केरेलो कि तुसन पुड़ दया केरे। किजोकि यहोवा न्याय केरनेबालो परमेशरे; धन आन तैना ज़ैना तैसेरे इंतज़ारे मां रहतन।
हे यहोवा, तेरो ज़ेरो एरहो परमेशर कोड़िए ज़ै पाप माफ़ केरे, ते अपने हिस्सेरे बच़ोरे लोकां केरे पाप माफ़ केरते? तै अपनो क्रोध हमेशारे लेई न रख्खे, किजोकि तै दयाई सेइं प्यार केरते।
"अवं यहूदारे घराने मज़बूत केरेलो, ते यूसुफेरे घरानेरो छुटकारो केरेलो। मीं तैन पुड़ दया एवरीए, एल्हेरेलेइ अवं तैन्न वापस एन्हतां तैन्न तैन केरे मुल्खे मां वापस बसालो; ते तैना एरे भोल्हे, ज़ेन्च़रे तैना मने मरां नईं कढोरे; अवं तैन केरो परमेशर यहोवा आईं, एल्हेरेलेइ तैन केरि प्राथना शुनेलो।
सच़्च़ैई सेइं न्याय केरा, ते हर अक मैन्हु एक्की होरि पुड़ दया ते महरबानी केरतां कम केरे, न त विधवा कौन्शी पुड़ अंधेर केरा, ते न अनाथ बच्चन पुड़, ते न परदेशी पुड़, ते न गरीब लोकन पुड़; ते न अपने-अपने मने मां एक्की होरि नुकसान पुज़ानेरी कोशिश केरा।"
एल्हेरेलेइ परमेशरेरे च़ुनोरां केरे ज़ेरे ज़ैना पवित्र ते ट्लारेन, बड़ी करुणा, ते भलियाई, ते दीनता, ते नम्रता, ते बरदाशत धारण केरा।
ते एक्की होरि पुड़ दया केरा, ते माफ़ केरनेबाले भोथ, ते ज़ेन्च़रे परमेशरे मसीह मां तुश्शे पाप माफ़ किये, तेन्च़रे तुस भी एक्की होरेरे पाप माफ़ केरा।
आखरी मां अवं तुसन इन ज़ोताईं, तुसेईं सेभेइं अक मन भोवरू लोड़े ते एक्की होरि सेइं हमदरदी केरा ते एक्की होरि सेइं ढ्ला बेइनां केरो ज़ेरो प्यार केरा, ते एक्की होरि पुड़ दया केरा, एक्की होरेरे लेई नर्म बना।
पन ज़ैस कां दुनियारी जेइदात भोए, त तै अपने ढ्लाए ज़ैस ज़रूरत भोए, तैस हेरतां तैस पुड़ तरस खानो न चाए, त तैस मां परमेशरेरो प्यार केन्च़रे बनोरो रेइ बटते?
परमेशरेरू शुक्र भोए ज़ै इश्शे प्रभु यीशु मसीहेरो बाजी, ज़ै दया केरनेबालो बाजीए, ते ज़ै असन हमेशा तसल्ली देनेबालो परमेशरे। तै इश्शे सेब्भी मुसीबतन मां असन तसल्ली देते; ताके अस तैस शैन्तरे वजाई सेइं ज़ै परमेशर असन देते, तैन भी तसल्ली देइ बटम, ज़ैना कोन्ची वजाई सेइं मुसीबतन मां आन।
किजोकि इश्शो महायाजक इश्शी सैरी कमज़ोरी समझ़ते। किजोकि शैताने तै सेब्भी गल्लन मां इश्शो ज़ेरो अज़मव, पन तैनी कोई पाप न कियो।
आनन्द केरनेबालन सेइं साथी आनन्द केरा, ते लेरां देनेबालन सेइं साथी लेरां देथ।
हे ढ्लाव ते बेइनव, खुशी राथ, सिद्ध बनते राथ; एक्की होरि हिम्मत देथ; ते मेल मिलापे सेइं राथ, ते प्यार केरनेबालो ते शान्ति देनेबालो परमेशर तुसन साथी भोल्हो।