19 Fye ta kpəlo nge əfye anayi zhni Zafnu gyigyii-pwuwa nu n wo dna n əfye nyi m, əza n fye ɓə gwo n Shekwoyi nyi m? Fye to ye zhni əfyehni anyanu m; 20 a ɓə si fye n kwoná nu. Ntucenu fye ga Shekwoyi mwamwa n əfye anayii.

27 Aawo, mi znu əmihni nayi ənya jesnu ma zè kwo əmi fyenu nabai nge shi mi ɓə kwu nabagyi manai zo azaje da, əmi n mihni, to ai la mi gbmiya n anyaga gwoyi m.

3 N ma kwu əmi nyaɓwa vnyanya ga asnayi jesnu maa əmi nayi ga nge a kpe kwo əná nabai ma gyigbe, ama ntna yeyewu, mi to n gyiba hoi lo m.

13 Ntuge a ɓə zhni yi batizima vnyanya n Zafnu gbmanyi nu, nabai ya kwu zè nayi gbmanyi; kwo Ayahudiyi nu kwo Abyedo, afyenu kwo aza loloiya; jesnu əyi vnyanya a ɓə ga yi Zafnu gbmanyi nu ya sni.

4 N ɓwasnu she zahozahoyi ń yi, ń nayii gbmanyi nu, n agai mwa bəgyé, jesnu aga ye vnyanya, ɓa ta zhni tnutnu gbmanyigbmanyi nu m. 5 Ntulonu dna ń Kirisiti, əyi, kwo shikwonyi, yi mwa bəgyé lo, yi zhni nayi gbmanyi nu, jesnu əga dəhodəhoi zhni aga aje vnyanya nya nu.

8 Ntuge tata nayi nya kwo n apma lo fyewyi, ama tata dna n shekwodnawo kwo n apmai lo ntu anya vnyanya ɓo; n ɓəgbeshii ntu anyìgyi nsaiye nya ɓo, ɓədo n ədoi n kwo ye ɓeɓelo nyi.

41 Fye kwu zhigwu jesnu fya zhniaduwa, nabai n fye taa lofyi n mwumwu m. Zafnu ncei ye lo, ama nayi ń gbakalá gbàgbài lo."

29 Ngye əho əwyekwnunu ɓwaizhe nya ɓa zhni ho ha cebwonyi, la kwo gbmiya, haa kwo sheya. Kwo n hoi dulo hoi ɓwu əho nayi əga gbmanyi nuwna, a fa ədo ń a ɓa she əho nayi vnyanya ya dna n anápyi nyi.

25 "Ntucenu mi gna fye, fye to wnubwugba tu n əfye awyewyeyi ɓo m, ənya n fye ɓa gyi kwo n fye ɓa sni m; kwo ntu n fye anayi ɓo, ənya n fye ɓa kpe m. Wyewyeyi to du nyagyi lo, jesnu anayi to du aje lo m?

28 Fye to wo aza yi ədna n ɓa wu nayi, ama n ɓa taa myi n ɓa wu wyewyeyi m. Ama, fye wo əza ədna ń wo ɓa wu wyewyeyi ń nayii jesnu wa sheɓaya fyi ń anápyi.

1 Aɓwazhilo, she deeji adugwu bəgyé ɓəə la yezhi, kwa si ɓai pyi ajeya, Yeisu wa ya ɓəda n əwo amwutuyii nu n kpmisnu, woi gna: "Fye la əwyewna n Afarisiyi yisti, ń əkwo nu zhni kwocedna. 2 Nyaho to lo n kwo pwuanya shì lo, n a to ɓə la kwo gbmiwu m. Kwo n ɓwushi lo ń a to ɓə kwu kwo wu pəipəi m. 3 Əɓo n fye kwu da fyi ń wyegbma, a ɓə wo kwo n nyipyei pəipəi, jesnu əɓo n fye ɓə da kwo fyi aje n atnubwa fyi n anyakwnumi, a ɓə da kwo kpe ń anyakwnusni.

4 "Əmi anugwnudo, əmi nu gna fye, fye to wo aza yi ədna n ɓa wu nayi nu, ama n dəye avnu, ɓa to n ɓəhoi shnasnu lo n ɓa zhni m. 5 Ama mi ɓa wu fye əza n fye ɓa wo wodna: Fye wo əza ədna n wo ɓa myi wa wu əfye nayi, jesnu ń əkwo avnu, wo n ikwoi lo wa she kwo ya dna ń anápyi. Əə, mi gna fye, fye wo wodna. 6 A ta kwnu agbakwolowyi ngwnu-atnu akəɓwo ngwnu-aba nu m? Dudulonu ədoho to lo n ɓa ń Shekwoyi n kwoi zamwi lo m. 7 Ɓəhnihni, əfye tukwoyì vnyanya n babai lo. Fye to wodna m; fye du agbakwolowyi bəgyé lo n apma.

8 "Əmi nu gna fye, əza n wa da əmi əye kpe ɓo pəipəi n aza abye, Əza Nugwnu ɓə da əwo əye kpe ɓo ce ń amaləka Shekwoyi nya abye. 9 Ama əza n wa ná əmi aɓo ń aza abye, a ɓə ná əwohni aɓo n amaləka Shekwoyi nya abye. 10 Nlonu əzahozahoyi ń wa da ɓədagbma nukwoi tu n Əza Nugwnu tukwo, a ɓə kwu aleifyi zo wo, ama zahozahoyi ń wa da atukwopmi ɓəda tu n Zafnu Gyigyiyi tukwo, a to ɓə zo wo aleifyi m.

11 "She a ɓə lo n fyei ń Ayahudiyibwokwnu, abegyiyi n a ikwodai, fye to ɓə gná fyehni gnagna, she fye ɓa gnyi əfyehni kwo əɓo n fye ɓa da m, 12 ntuge Zafnu Gyigyiyi ɓə wu fye əɓo n fye ɓa da n əsayii."

13 Əzaho dna n deeji wa gna wo, "Nyawuyi, gna əmido nge yi la əgwú gna."

14 Yeisu wa dnaɓəgbe, "Nyiyiza, nyika nu ń la mi dna owadayi kwo əgwú gnáyi n əfye atasni a?" 15 Nlonu wa gna ɓa, "Fye la əwyewna! Fye kwu əfyehni wnashi ntu ń aɓo awyeda n aɓəpwawo dəhodəhoi pya ɓo; ntuge anyìgyi ta vyi shi əza n nyaɓwai lo nsnu nu m."

16 Njesnu wa gna ɓa ɓəsisi ye, "Nyaɓwayi ho, əwo ofwa ɓə ga wo afwanyakwu n mwa kwokwo. 17 Wa zhni ɓənubwo fyi n əwohni, ‘Knyiyi nu n mi ɓa zhni a? Mi too nabai lo n mi ɓa fyi əmi anyagyigyi m.’

18 "Nlonu, wa gna, ‘Əɓo nu nyi n mi ɓa zhni. Mi ɓa adobwi ye ɓaya, jesnu ma mi adnagbmai, nabai ma fyi əmi awyi n mwa kwokwo ye. 19 Njesnu mi ɓə gna əmihni, "Ho kwu awyi ɓwa n mwa ncei yefyi ntu aye bəgyé ɓo n abye. La snú; gyi, hoi sni jesnu ha dagbma." ’

20 "Ama Shekwoyi wa gna wo, ‘Əza mama! Dna n sukwo ye mi, a ɓa gwo əho wyewyeyi. To gna mi, anya n ho la yezhi əhohni nyi, ɓa ɓə kwu zhni nyika anya nu a?’

21 "Nlai nu n kwo ɓə zhni n əzadəhodəhoyi n wo la nyaɓwa yezhi əwohni, ama ntna nyaɓwa yezhi n Shekwoyi aba."

22 Nlonu Yeisu wa gna əwo amwutuyi: "Ntucenu, mi gna fye, fye to wnubwugba tu n əfye awyewyeyi ɓo m, ənya n fye ɓa gyi m; kwo ntu n əfye anayi ɓo, ənya n fye ɓa kpe m. 23 Wyewyeyi kwo du nyagyi lo, jesnu anayi n du aje lo. 24 Fye ka akwasakwasa wye: Ɓa ta bye kwo ɓa dò m, ɓa to n anyagyi yezhibai lo, kwo dobwi m; dudulonu Shekwoyi kpá ɓa. Ai fye du alú lo n apma n mwa! 25 Nyika nu dnalo n fye n wo ɓa ɓe əwohni wyewyeyi snukna gbmanyi ntu n bwugbawnu ɓo a?" 26 Shikwonyi fye taa myi fya zhni əɓo ɓyiyi ye m, knyiyi nu zhni fyei wnubwugba ntu aɓo n ɓa ce nyi a?

27 "Fye ka amamawyí əwye n bmana she ɓa mwa n wu. Ɓa ta zhni tnutnu, kwo ɓa she lulu m. Dudulonu əmi nu gna fye, kwo Sulemanu dna n əwohni bmyabmya vnyanya, wo to ɓə kpe aje ngye mamawyi ho gbmanyi n ɓa m." 28 "Ngye Shekwoyi kpe agbegbe bmana nya aje ń lai nu, n ɓa nyi n naiye, əfye kwa gyi a sheɓaya fyi n əná nyi, wo taa gna əfye nu ajekpekpe m; əfye agaiciyaganunui agbagbaida! 29 Fye to kwu əfye adu zhi ntu anya ɓo nu ń fye ɓa gyi kwo fya sni nyi m; fye to wnubwugba ntuce m. 30 Ntuge aza anyì nya zna anya ye pya nu shni vnyanya, jesnu əfye Dada kpəlo nge fye n əɓa apmai lo. 31 Ama fye zna əwo əbemi shni, jesnu anya ye vnyanya a ɓə kwu ɓa ga fye ɓədo cè.

32 "Gəluce ɓyiyi, fye to wodna m, ntuge kwo dá əfye Dada lo wa ga fye əbemi. 33 Fye kwu əfye nyaɓwa kwnu, fya kwu agyiwye ga awyekwoyi. Fye zna alagyiita shni ga əfyehni n ɓa taa saya m, nyaɓwayezhi n kwo fyi n əshemi n kwo ta shna zo nyi m, aba ń əvyì ta wo vyivyiwyi, jesnu ń anyìmana taa zhni anya agbma m. 34 Ntuge aba ń əho nyaɓwayezhi nyi, ń abaayi nu ń əho ədu ɓa shi cè.

35 "Fye kwu əfyehni pmá ntu tnutnuzhni ɓo jesnu fya kwu əfye apyitila shi ń anai wna, 36 ngye atnutnuyi ń ɓa zhi ɓai pmi əɓa dagayi wa zhi amwula awyefna, nabai əsa ń wo ɓə zhi wa jeaba, ń ɓa ɓə gwu wo kpakwo ya wolowolo. 37 Kwo ɓə kwu atnutnuyi yi bmya ń əɓa dagayi ɓə jezezhi wa gye ɓa zhigwu. Ɓəhnihni əmi nu gna fye, wo ɓə pmá əwohni wa zhni tnutnu, wo ɓə zhni ɓa ɓai la kpmima ń tebwul jesnu woi ɓe wa gna ɓa nyagyi. 38 Kwo ɓə kwu atnutnuyi yi bmya ń əɓa dagayi ɓə gye ɓa zhi n əɓahnii yeyei, kwo n wo ɓə ɓe dna n sukwo sadu nu kwo n fyegyi ɓwai. 39 Ama fye ɓwa awyega ye: Ngye pwuwada ɓəə gna wa kwu kpe əsa n əvyì ɓə ye wa ɓe ncei, wo too ɓə ɓa ye nge a ɓá əwo pwuwa ya a lofyi m. 40 Ɓəshishi nu fyaa əfyehni ye, ntuge Əza Nugwnu ɓə ɓe n əsai nu ń fye to n əwo əɓoi dnalo m."

41 Byitusu wa nyaɓo, "Dagayi, ho wu əyi nu ɓəsisi yee, kwo ntu əzahozahoyi ɓo nu a?"

42 Dagayi wa dnaɓəgbe, "To, nyikanu zhni anya aknawnayi gbenui n wo cecei, ń əwo dagayi ɓa kwu atnutnuyi fyi ń əwo akwnu, wa ga ɓa nyagyi n əkwo əsai a? 43 Kwo ɓə la zhni əɓo manai nu n tnutnuyi aba, ń əwo Dagayi ɓə jezezhi wa gye wo gnyi woi vyi əwo əɓəgbetu." 44 Ɓəhnihni əmi nu gna fye, "Wo ɓə kwu əwo nyaɓwa vnyanya fyi ń əwo akwnu. 45 Ama ń kwa zè ge tnutnuyi gna əwohni, ‘Əmi dagayi wo kwu kalala zhni n jezezhii; wa ya woi lu atnutnuyi aje, azanugbai n anyikwozai, jesnu wa gyi, woi sni, kwoi zhni wo woi fyijeya.’ " 46 Tnutnuyi dagayi ɓə jezeɓe n əwyii ń wo to n əwo əɓoi dnalo m, jesnu n əsai ń wo ta dnace lo m. Wo ɓə ce wo ya wyiwowyiwo jesnu woi la wo yadna nkwnusnu n atnavyiyii.

47 "Tnutnuyi ń wo kpé əwo dagayi ɓəyé ye, ama to wa pmá əwohni, wa zhni əɓo n wo dagayi yé m, a ɓə fyi wo apmi n aɓwai mwa bəgyé. 48 Ama əza n wo ta kpeye lo m, n wo zhni əɓo ń kwo kwnuce wa gwo tata, a ɓə fyi wo apmi fyewyi nu. Əzahozahoyi ń a la ga wo n mwa, a ɓə tuwye ń wo n mwa; jesnu əza ń a la ənya yaakwo ga wo, a ɓə nya wo ənya yaakwo ɓo.

49 "Mi la ɓe ma dna əná ń anyì, a wo mi lo, ngye kwo yee la lu wnawna nu kwoi gwo! 50 Ama mi n batizimai lo n a ɓa zhni mi, jesnu mi dnalo n bwugbawnu nya əsa ń kwo ɓə nu ncei! 51 Fye zhninubwo nge ma ɓe nabai ma ga bwugbafu nu ń anyì? Aawo, əmi nu gna fye ma ɓe n ajegnai nu. 52 Ənya ń kwo laka nsaiye kwoi lo n abyei, a ɓə gye aza fyi ń pwuwa ngwnu-atnu ń gnajeya, ngwnu-ata ń gwnukpe ngwnu-aba, jesnu ngwnu-aba ń gwnukpe ngwnu-ata. 53 Ɓa ɓə la gnaje, əda ń gwnutu nugwnu, jesnu nugwnu ń gwnutu əda, əyà ń gwnutu nyigwnu jesnu nyigwnu ń gwnutu əyà, əvya ń gwnutu tnáyi, jesnu tnáyi ń gwnutu əvya."

54 Wa gna deeji: "She fye gye ənyì tu ń shnikwó ɓwa, nsayisayii fya gna, ‘Əgbma ye kwa zhi nu,’ n kwnusnu kwa kwu zhi. 55 Njesnu she əse ci kwoi kwnu ń snutakwo əɓwa, fya gna, ‘Wyepye ye kwa fyi nu,’ n kwnusnu kwa kwu fyi. 56 Akwocednayi! Fye kpəlo shi fye ɓa ɓwa awyeknaya əknyi nya n anyìbmanai. Kwo zè n wunanu fyenyi ta kpəlo shi fye ɓa ga awyeknaya əsa ye nya ma a?

57 "Knyiyi nu zhni to fyei kpe əɓo ɓəfyece znu ga əfyehni ma a? 58 Shi ho lo owa bwokwnu n kwnusnu n əho nuwnuyii, la əhohni yi n əwyei bmyibmyii, fya kwu əɓo wnado lo n zokwo, ntolonu m, əho nuwnuyii ɓa myi wa lo n hoi ń owadayi aba, owadayi woi la ho taya ga bwusiɓyiyida, jesnu bwusiɓyiyida woi la ho sheya dna n zhalu. 59 Mi gna ho, ho to ɓə gbmiya m, akpe ho kwu sisinkəɓwo agyiwye yi nya zo gba vnyanya."

4 Nayi lo gbmanyi nu jesnu Zafnu gbmanyi, n ɓwasnu shi a ɓə yi fye fyi n awyetu gbmanyi nu, əsa n a ɓə yi fye nyi.

22 Anyikwo anusei, fye kwu əfyehni ga əfyehnii aɓá shi fye ga Dagayi nyi. 23 Ntuge əɓá nu zhni əwo nyikwo tukwo, ngye shi Kirisiti nu zhni ikilisiya tukwo nyi, əwo nayi, n əwo nu zhni əkwo Gnyiyi nyi.

15 Fye fa Kirisiti bwugbafu kwa gyibe fyi n əfye adu, shikwonyi fye zhni aga nayi gbmanyi nya nu, a ɓə yi fye fyi n bwugbafu nu. Jesnu fye kwu zhni Shekwoyi amisayi.

16 Ntucenu yi too gbmi bwugba ya m. Kwo shikwonyi, n əbmyi, yi zhi yii kwokwo nu, ama n əmi, a zè yi lo yii wu n woiwoyii fyegyifyegyi.

24 "Əwo n wohni tukwoi wo ɓə la əyi aleifyi kwu" dna n wo nayi tu n znudu, nabai n yi ɓa kwu zè afyífyii ga aleifyizhni njesnu ya gyianyì ntu n ɓəfyecezhni ɓo, "ntu əwo aci ɓo nu n fye kwu kágna ɓwa."

2 Əyi vnyanya yi knyiabwonyi ń azokwoi gbowogbowo. Zahozahoyi n a ta ɓwa wo n ɓəgyii m, kpekpe dna n əwo ɓəda, wo zhni əza nunui nu; n wo myi ń əwo nayi vnyanya wnashi.