1 Ń dəye avnu Dagayi wa tnu azaje ngwnu shiitnaaba-ceaba, wa tnu ɓa tnutnu ngwnu-aba-aba ɓa kwu gyiabye, lo əzhi dəhodəhoi ń wo ɓə ncei pma wa lo. 2 Wa gna ɓa, "Afwanyakwu n mwa kwokwo lo, ama atnutnuyi n ɓwasnu lo fyewyi nu. Ntucenu, fye nya Dagayi afwanyakwu nya, wa tnu n atnutnuyii fyi ń əwo afwanyakwu ofwa. 3 Fye lo! Əmi nu tnú n fyei ngye aknyi fyi ń acamcam atasni. 4 Fye to la lagyiita, kwo gwnuma, kwo fya kwu abwada m; jesnu fye to gwo zahozahoyi gnaɓyi lo ń zokwoi m.

5 "She fye lofyi ń pwuwa, kpmisnuyi fye gna, ‘Bwugbafu kwo ɓe dna n pwuwa ye.’ 6 Ngye əzaho dnalo n ɓo n wo n əwyei ce n bwugbafu, əfye bwugbafu ɓa shnikpe n əwo; ntolonu m, kwo ɓa jezeɓe da fye. 7 Fye kwu fyi n ɓo, fyei gyi, fyei sni nyahonyahoi n ɓa ga fye, ntuge tnutnuyi kwnuce lo a gba wo əwo tnutnu gyiwye. Fye to zna laɓa fyei kwnu n pwuwa gbmanyi fyei lo pwuwa ədo m.

8 "Əsa n fya lofyi n əzhi aa fye gwo, fye gyi nyahonyahoi n a ga fye. 9 Fye ká anyasnayi gna n ɓa fyilo n ɓo, jesnu fya gna ɓa, ‘Shekwoyi əbemi kwo la ɓe vyivyiwyi n fyei.’ 10 Ama she fye lofyi ń əzhi, to a gwo fye m, fye lofyi ń əkwo adnadna fya gna, 11 ‘Kwo əfye əzhi aɓwutukwnu, yi lu kwo ya nu ngye ɓəkwnukwnù ń əfye aba. Dudulonu ɓəhnihni fye kwu dəye kpe ge: Shekwoyi əbemi kwo la ɓe vyivyiwyi.’ 12 Əmi nu gna fye, kwo ɓə la Sodom gnawo faafa a fa əzhi yi.

13 "Owii n hoi, Korazin! Owii n hoi, Betsaida! Ntuge ngye aɓəwowoi n a ɓə zhni fyi n əfye nyi, a ɓəə gna a zhni ɓa fyi ń Taya nu n Sidonii, əsa ye la mwalo shi ɓa ɓə ɓa yeabwi, n fyi n ajekwokwoi n ətnui. 14 Ama kwo ɓə la Taya n Sidonii gnawo faafa n owada aba, a fa əfye. 15 Jesnu əho Kapanam, a ɓə la ho latu n ashebmana a? Aawo, ho ɓə shnilo Akwu nu.

16 "Əzadəhodəhoyi n wo kna fye ɓəda tnubwa, wo la mi knatnubwa; əzadəhodəhoyi n wo ná fye aɓo, wo la əmi aɓo na; ama əzadəhodəhoyi n wo na mi aɓo, wo na əza nu aɓo n wo ɓə tnú n mii nyi."

17 Shiitnaaba-ceaba yi ɓa jezezhi n agbmadai ɓa gna, "Dagayi, kwo ase ɓə kwu ɓahni gà fyi n əyi akwnu dna n əho əye."

18 Wa dnaɓəgbe, "Mi ɓə kwu gye Shetam woi kaya ngye əgbmanabmya n əshe. 19 Mi la ikwo ga fye fya dna awa n anapisii n apitai, jesnu fya gyi nuwnuyi tukwo kalá vnyanya; nyaho taa wu fye əɓwa m. 20 Dudulonu, fye to dagbma nge ase ɓa kwu ɓahni gà fyi n əfye akwnu m, ama fye dagbma nge aa n əfye ayei kafyilo n əshemi."

21 N əsayii, Yeisu, n nunui n agbmada Zafnu Gyigyiyi nyai, wa gna, "Mi ci ho lo, Dada, Dagayi əshemi nya n əknyii, ntuge ho kwu aɓo ye so awyemwayi n aɓəyekpeyii, jesnu honyii la ɓa kpeyawu aɓyi anawyi. Əə, Dada, ntuge ənya nu nyi n kwa da ho ha zhni.

22 "Əmi Dada wo kwu aɓo vnyanya fa fyi ń əmi akwnu. Əzaho to lo n wo kpe əza ń Nugwnu n zhni m, akpəge Dada, jesnu əzaho to lo n wo kpe əza ń Dada n zhni m, akpəge Nugwnu, jesnu ń aza yii n Nugwnu la ɓa knyi waa Dada kpeyawu ɓa."

23 Nlonu wa pmyiawye shi əwo amwutuyi, jesnu wa gna ɓa ɓahniɓahni, "Awye anabəlika nya nu n awyei n ɓa gye əɓo n fye gyewye nyi. 24 Nlonu mi gna fye nge, sheɓəgwognayi bəgyé n asui ɓə ncei pma ɓa gye əɓo n fye gyewye nyi, ama to ɓa gye əkwo m, jesnu ɓa wo əɓo n fye wo nyi, ama to ɓa wo əkwo m."

25 N əwyihoi, owa gnayekpeyi ho, wa laka gnyi nabai wa tu Yeisu mwi. Wa nyaɓo, "Nyawuyi, knyi ɓəshishii nu n mi ɓa zhni nabai mii ɓwa wyewyeyi nyalonyalo nya a?"

26 Wa dnaɓəgbe, "Knyiyi nu kafyilo n owa, jesnu fye ba kwo lo n wunanu a?"

27 Wa dnaɓəgbe, " ‘Ye Dagayi əho Shekwoyi n əho ədui vnyanya, n əho wyewyeyi vnyanya n əho akalái vnyanya ɓədo n əho bwugbai vnyanya’; jesnu, ‘Ye n əho kwnuzhiyii ngye əhohni tukwo.’ "

28 Yeisu wa dnaɓəgbe, "Ho la əɓo dnagbe shi kwo lo, zhni dəye jesnu ho ɓa gyianyì."

29 Ama wo ɓə ncei pma wa bmya əwohni shi, ntulonu wa nya Yeisu əɓo, "Nyika nu zhni əmi kwnuzhiyi a?"

30 Yeisu wa dnaɓəgbe: "Əza ɓə gbmi n Urishelima woi shnilo Jerikwo, avyì azokwojei ɓa znu wo zokwo. Ɓaa aje kpma wo, ɓa lu wo jesnu ɓa kwukala, ɓa fa wo shi n znufyi. 31 Pirisiti ho ɓə shnilo woi wna zokwo yi, shi wo ɓə gye əza yi, wa bmá, wa wna zokwo do. 32 Nlonu cè, Levyiyi ho, əsa n wo ɓə si abaayi, wa gye wo, wa bmá jesnu wa wna zokwo do. 33 Ama Samariyayi, shi wo ɓə dnalo n əzna, wa ɓe aba n əza yi ɓə shi nyi; shi wo ɓə gye wo əwye, wa gye wo snusnu. 34 Wa lo da wo jesnu wa pa wo aci n pəgyii, wa kpe wo omi ɓədo n anamnuwnai. Nlonu wa la wo tu n əwo zhagawyi, wa lo n woi n ashnidna aba, jesnu wa kwu wo wnakna. 35 Shi əfye ɓə gyi zhi, wa kwnu gyiwye zhnana denari ngwnu-aba, wa gba ashnidna wyekayi. Wa gna wo, ‘Wna wo akna, shi mi ɓə jezeɓe, mi ɓə gba ho əta ənya n ho kwu wu dutui, tu n əwo tukwo.’

36 "Dna n əɓa ngwnu-ata ye, ho zhninubwo lo nge nyika nu ɓə zhni əza ye kwnuzhiyi, n avyì ɓə znu wo zokwo nyi a?"

37 Owa agnakpeyi wa dnaɓəgbe, "Əza n wo ɓə gye wo snusnu nyi."

Yeisu wa gna wo, "Lo hoi zhni nlonu ce."

38 Shi Yeisu n əwo amwutuyii ɓə fyilo n zokwo, wa ɓe əzhi, n nyikwoza ho, n a yi wo ge Mata nyi, ɓə gwú əwo pwuwa ya ga wo. 39 Wo ɓə n madoyii ai yi wo ge Mariyamwu, əwo nu ɓə sase shi n Dagayi apita ba woi kna əɓo tnubwa n wo ɓə da nyi. 40 Ama bwugba kwaa Mata gnaje ntu tnutnu nyagyizhni nya ɓo vnyanya n wo ɓə gnyi woi zhni nyi. Wa ɓe da Yeisu wa nyaɓo, "Dagayi, ho ta gye əho anuwna lo nge əmi mado wo la mi fa gnyi mii zhni tnutnu n əmihnii m? Gna wo nge wo bma mi zhni!"

41 Dagayi wa dnaɓəgbe, "Mata, Mata, bwugba kwo la ho wnu, jesnu ho la gnamyi ntu n aɓo bəgyé ɓo, 42 ama anya n ɓwasnu lo fyewyi nu n ɓa n apmai lo; ɓəhnihnii əɓo ɓwasnu lo gbmanyi nu. Mariyamwu wo la ənya knyí n kwo gnabmya, jesnu a taa myi a gwo wo kwo m."