1 Dna n nyipyei kpmisnuyi laadi yi nya, n labmilabmii, anyikwoza ɓa kwu anyasnidaí n ɓa ɓəə la zhniaba zhi nyi, ɓa lo vnyigwo. 2 Ɓa gye kwuta ń pmyipmyii ya ń vnyigwo, 3 ama she ɓa ɓə lofyi, to ɓa gye Dagayi Yeisu nayi shi m. 4 Ɓai ye zhi n ɓəwowoi ɓəye nya, n əsagbmanyii ɓa gye aza ngwnu-aba ń ma ɓa zhi, n ajei kpe ɓai bmyana ngye əgbmanabmya. 5 Anyikwoza yi ɓai ye zhi n ədnai, ɓa yakwnu n awyei wu n əknyi, ama aza yi ɓa gna ɓa, "Knyiyi nu zhni fyei zna əza wyewyeyi shni ń afyífyiyi aba a? 6 Wo to dnalo n ya m; wo la laka! Fye pa əɓo n wo ɓə gna fye woi ye kwnusnu n fyei ń Gəlili: 7 ‘Ɓəshishi nu a ɓə lá Əza Nugwnu ga dna n aleifyizhniyi akwnu, ə la wo znudu, dna nyipyei taayi, a ɓə la wo laka jesnu.’ " 8 Nlonu ɓa pa əwo aɓədagbma ɓo.

9 She ɓa ɓə zhí avnyigwo, ɓa da Awocei-gbmanyi aɓo ye vnyanya, n azajei vnyanya, n ɓa ce nyi.

10 Mariyamwu Magadalayi, Jowana, Mariyamwu Jemyis əya n azajei ń kwnusnu ń ɓai nu ɓə gna atnutnuloyi aɓo ye. 11 Ama to ɓa ga anyikwoza ye gaiciya m, ntuge əɓa ɓədagbma ɓə wu ngye əɓo tnatukwogyii nu. 12 Ama Byitusu wa laka, wa bwusi lo vnyigwo. Shi wo ɓə ya awye shi, wa ɓwa ajebwe nu wyegye n yakpe, jesnu wa jezelo woi zhni əɓonubwo fyi ń əwo mi, əɓo ń kwo ɓəə kwu zhni nyi.

13 Dna n əwyi yi, əɓa ngwnu-aba ɓə lo ń zokwo ɓai znazna lo əzhigba ń a yi kwo nge Imawus nyi, ń kwo ɓə nyi ngye amyalu ngwnu-tnaaba n əkpa ənya n kwo laka ń Urishelima. 14 Ɓa ɓə lo ɓai daɓo n ajei nu, kpe n aɓo vnyanya ń ɓa ɓəə kwu zhni nyi. 15 Shi ɓa ɓə lo ɓai daɓo jesnu ɓai taaza kpe ń aɓo ye tukwo, Yeisu n əwohnii, wa ɓe da ɓa, wa kwnu znazna n ɓai; 16 ama to a ye nge ɓa kpe wo əye m.

17 Wa nya ɓa əɓo, "Fye lo fyei da knyiɓei nu n ajei lo ń əzna ye a?"

Ɓa kwu kpezhi kpa ń awyei mafyi. 18 Zaknayi n ɓa, ai yi wo ge Kileyopas, wa nya wo əɓo, "Əho nu ɓwa zhiɓeyi zhni dna n Urishelima, n ho ta kpe aɓo ye lo n ɓa kwu zhni fyi ń anyipyei ye nyi m?"

19 Wa nyaɓo, "Aknyiɓəi nu a?"

Ɓa dnaɓəgbe, "Aɓo tu n Yeisu Nazeretiyi tukwo. Wo ɓə zhni sheɓəgwognayi nu, əwo ɓədagbma ɓədo ń atnutnui ɓə ń kalái dna n Shekwoyi abye ɓədo ń aza abai vnyanya. 20 Apirisiti atukwoda ń əyi abegyiyii ɓaa wo taya ga nabai a znu əfyi owa tu wo, jesnu ɓaa wo znudu. 21 Ama yi ɓəə la əwye tu nge əwo nu zhni əza ń wo ɓə ye wa ɓe Israila n shnashnai. Njesnu knyiɓei nu ce a, nnaiye nu zhni nyipyei taayi she aɓo ye ɓə zhni vnyanya. 22 Əɓo ń kwo la je ɓe, anyikwoza n əyi atasni ɓa kwu ɓəwowo gna yi. Ɓa lo vnyigwo n labmii nnaiye, 23 ama to ɓa gye Yeisu nayi ye shi m. Ɓa jezezhi ɓanyi gna yi nge ɓa kwu ɓəwyegye amaləka nya gyewye, n ɓa gna nge wo n wyewyeyii lo. 24 Nlonu əyi azaje ho, ɓaa lo vnyigwo ɓanyi ɓwa wyegye shi anyikwoza ɓə da nyi nu, ama ɓa to gye Yeisu nayi əwye m."

25 Wa gna ɓa, "Gye fye zhni amama nu, jesnu fye ta pyelo n gaiciyagai ń aɓo vnyanya n sheɓəgwognayi ɓə kwu da nyi! 26 Kwo to ɓə zhni ɓəshishi nu Kirisiti wa gyeazhnì aɓo ye nya, wa kpəlo dna ń əwo latu m?" 27 Nlonu Yeisu wa kna ɓa awyeya ənya n kwo kafyilo n anyakagyigyiyi ntu əwohni ɓo; ənya n kwo ya ń Mwusa kwoi lo Sheaɓəgwognayi aje vnyanya.

28 Shi ɓa ɓə wo vyivyiwyi n əzhigbai n ɓa ɓə lo kwo nyi, Yeisu wa zhni ngye wo ye wa gwodu lo n abyei. 29 Ama ɓa gyi wo əwye n əwyei bmyibmyii, "La wnagye n əyi aba, ntuge wyeshe kwo la ga she; nyipyei kwo la ga zo." Ntulonu wa kwnulo waa dna n ɓai.

30 She wo ɓə sasetu ń kwnusnu n ɓai ń tebwul, wa shni biledi, wa sa Shekwoyi ami, waa kwo saya, jesnu wa ya ɓa kwo gná. 31 Nlonu əɓa awye ɓaa gwuya, ɓa kwu kpe ge əwo nu tu, jesnu waa ɓwuwye ń əɓa awyeba. 32 Ɓa nya aje aɓo, "Əyi adu to ɓə pyena fyi ń əmì; woi ye ɓe woi daɓo n yii, yi ye ɓe ń zokwo, jesnu əsa ń wa gwu Anyakagyigyiyi ya ga yi nyi m?"

33 Ɓa kwuka n əsagbmanyii ɓa jezelo Urishelima. Ɓa lo ɓa gye Awocei-gbmanyi n aza yii n ɓa ɓə kwnusnu nyi n gwnudo zhi n abagbmanyi, 34 ɓai gna, "Gaiciya nu! Dagayi wo la laka jesnu wo la kpeya da Sima." 35 Nlonu əɓa ngwnu-aba ɓa daɓo ń kwo ɓə zhni n zokwo, jesnu shi ɓa ɓə kpe ge Yeisu nu tu, əsa n wo ɓə sa biledi ya ncei nyi.

36 Ɓai ye ɓwazhi ɓai daɓo ye, Yeisu n əwohnii wa kpeya dna n əɓa atasni, wa gna ɓa, "Bwugbafu kwo kwnusnu n fyei."

37 Ca wo ɓa jesnu ɓa vnyi, ɓai zhninubwo nge ɓa gye nyasnuɓwuyi nu. 38 Wa gna ɓa, "Knyiyi nu zhni fyei wnubwugba a, jesnu knyiyi nu zhni fyei fyi abwugba ngwnu-aba n əfye mii a? 39 Fye shi əmi aɓwa awye n əmi apitai. Əmi nu n mihnii! Fye to mi əɓwa fya gye; nyasnuɓwuyi to n nayi gyi n asnukwnui, ngye shi fya gye mi ncei gyi nyi m."

40 She wo ɓəə kwu dəye da, wa wu ɓa əwo aɓwa n apitai. 41 Njesnu əsa n ɓa ɓə ye zhi to ɓai ga ce gaiciya ntu agbmada ɓo n ɓəwowoi, wa nya ɓa əɓo, "Fye n nyahoi lo ń ya n a ɓa gyi?" 42 Ɓa ga wo əbmya pisai ɓyiyi natuyi, 43 jesnu wa gwo kwo wa gyi kwo ń əɓa awyeba.

44 Wa gna ɓa, "Əɓo nyi ń mi ɓə gna fye mii ye kwnusnu n fyei: Nyahonyahoi n kwo kafyilo ntu əmi ɓo ń Mwusa owa ń sheaɓəgwognayii ń Anyisasayii, ɓəshishinu kwa nu."

45 Nlonu wa gwu əɓa abwugba ya nabai n ɓa ɓá ɓwa Anyakagyigyiyi awyega.

46 Wa gna ɓa, "Əɓo nyi n kwo kafyilo: Kirisiti ɓə gyeazhnì jesnu woi laka ń əfyi ń nyipyei taayii, 47 jesnu nge a ɓə zhni waazi abwuye nya, ntu n aleifyi zo ɓo, dna n əwo əye ga abye vnyanya, kwoi ya ń Urishelima. 48 Fye zhni aɓəkwnuyi nu aɓo ye nya. 49 Mi ɓə tnu fye n ɓəgbeshii əmi Dada nya; ama fye kwu kpefyi n əzhiyaakwo kpa, nya əsa n a ɓə kwu fye pwi n kalái n kwo kwnu n əshe nyi."

50 She wo ɓəə la ɓa kwnuya lo ncei vyivyiwyi ń Byetanii, wa kwu əwo aɓwa wu ń əshe jesnu wa kpe ɓa anabəlika. 51 Woi ye gnyi woi kpe ɓa anabəlika, wa fa ɓa jesnu a la wo gwnulo ncei n əshemi. 52 Nlonu ɓa ga wo mwamwa, ɓa jezelo Urishelima n agbmada yaakwoi. 53 Nlonu ɓa kwu fyi n Dagayipwuwa ciici, ɓai ci Shekwoyi.