1 Nlonu azadogwnu vnyanya ɓa kwukazhi agnyi, ɓa la wo lo ncei n Byilatusu aba. 2 Ɓa ya wo aɓəkpe, ɓai gna, "Yi la əza ye wna woi wnu əyi əknyi ya, woi gna, a to gba Kaisa gədu m, jesnu woi yi əwohni nge Kirisiti, əsu."

3 Nlonu Byilatusu wa nya Yeisu əɓo, "Əho nu zhni Ayahudiyi əsu?"

Yeisu wa dnaɓəgbe, "Ho kwu da lonu."

4 Nlonu Byilatusu wa dnawyi ga apirisiti atukwoda ɓədo n deejii, "Mi too ɓwa əɓo n a ɓa shiɓwa a da owa n əza yei m."

5 Ama ɓa kwu gyìma, "Wo la aza abwugba kwukazhi agnyi n əwo nyawui dna n Yahudiya vnyanya. Wo ɓə ya kwo dna n Gəlili nu, nsaiye wo la ɓe n ya."

6 She Byilatusu ɓə wo əɓo ye, wa nyaɓo ngye əza ye zhni Gəliliyi nu. 7 She wo ɓə kwu wo nge Yeisu ɓə gbmi n Hiridusu əknyi nu, wa tnu n woi n Hiridusu aba, n wo ɓə dna ń Urishelima nsayii ce nyi.

8 She Hiridusu ɓə gye Yeisu əwye, a da wo n mwa, ntuge əsa ɓəə la mwa ń wo ɓə ncei pma wa gye wo əwye. Ntu aɓo ɓo ń wo ɓə kwu wo tu ń əwo tukwo nyi, wo ɓə ń awyetui wa gye wo woi zhni əznù ho. 9 Wa nya wo aɓo n mwa bəgyé, ama to Yeisu wa dna wo ɓəgbe m. 10 Apirisiti tukwoda n owa nyawuyii ɓə gnyiagnyi zhi n ɓo, ɓai kpe wo aɓo n əwyei bmyibmyii. 11 Nlonu Hiridusu n əwo akwnuyii ɓa ci wo aɓo jesnu ɓa kpe wo agyè. Ba kpe wo əje dnagbmai, ɓa je wo zè ya lo ncei n Byilatusu aba. 12 Hiridusu n Byilatusui yi ɓa ɓə zhni anuwnuyi nu n ajei, nya əwyi yi; ntu əɓo ye ɓo, ɓa kwu zhni anugwnudo.

13 Byilatusu wa yì apirisiti atukwoda n abegyiyii ɓədo n azai zhi n abagbmanyi, 14 wa gna ɓa, "Fya ɓe mi ń əza yei, ngye əza nu ń wo fyi azaya, ɓa zhni atukwo gnanakwo ɓo. Mi la wo mwugye ń əfye awye, jesnu mi to gye əɓəho n fye ɓa shiɓwa fya kpe wo aɓo, nabai fya da owa n woi m. 15 Kwo Hiridusu cè, wo too ɓwa ɓəho shi m, ntuge wo la wo jezeya ɓe yi ncei; ngye she fye gyewye nyi, wo too zhni ɓəho n kwo kwnuce lo n əfyii m. 16 Ntucenu, mi ɓa ta wo njesnu maa wo yaɓwa." [17 N gnanaznu awyefna sa, kwo ɓə zhni ɓəshishi nu ɓa knyi əza gbmanyi, n wo dna n zhalu, wa lo wo ya ga ɓa.]

18 Ama deeji vnyanya kwa ɓəwyi, "A lo n əza yei! A la Barabas yaɓwa ga yi!" 19 (A ɓə n Barabas sheya dna ń zhalu ntu tnaɓəgbetuvyi ɓo nu ǹ zawui dna n əzhiyaakwo.)

20 Byilatusu ɓə ncei pma wa ya Yeisu əɓwa, ntulonu wa tna ɓa əɓwa njesnu. 21 Ama ɓa gyiabye n akwufyii, "A la wo znudu! A la wo znudu!"

22 Wa daɓo əɓwa taayi n əɓai: "Ntu knyiɓei a? Knyi əɓogalai nu n əza ye wo kwu zhni a? Mi to gye əɓəho n wo, n kwo kwnuce lo a znu əfyi owa tu wo m. Ntucenu, mi ɓa ga wo tata jesnu ma ya wo əɓwa."

23 Ama ɓa fyiakwu n akalái ɓa kwu gyima nge a la wo znudu, jesnu əɓa akwufyi kwaa myignyi. 24 Ntucenu Byilatusu wa dna bwugba wa zhni əɓo ga ɓa n ɓa ɓə ye nyi. 25 Waa əza ye lo ya ga ɓa ń a ɓə n woi sheya dna n zhalu ntu tnaɓəgbetuvyi ɓo n zawui dna n əzhiyaakwo; əza ń ɓa ɓə nya wo nu ɓo nyi, jesnu waa Yeisu ga ɓa she əɓa ɓəmwi ɓə nyi.

26 Shi akwnuyi ɓə lo n woi, ɓa wna Sima woi gbmi ń Sireni, əza ń wo ɓə gbmi n afwaba woi lo əzhimi, ɓa tu wo znudu jesnu ɓa zhni wo wa shi kwo woi vyi Yeisu n avnu. 27 Aza bəgyé ɓa vyi wo, n anyikwozai n ɓa ɓə zhi n bwugbazhii jesnu ɓai ciɓwi ɓai fyiakwu ntu əwo əɓo. 28 Yeisu wa pmyiawye wa gna ɓa, "Urishelima anyigwnu, fye to ciɓwi ntu əmi ɓo m, fye ciɓwi ntu əfyehni ɓo ɓədo n əfye aɓyii. 29 Ntuge əsa ɓə ɓe n fye ɓə gna, ‘Anabəlikada nu n alamai, aɓyimaba ń ɓa to ɓə ma aɓyi m nanyinanyi, n aɓeɓei ń a to ɓə kpa aɓyi ncei nyi m!’ 30 Nlonu

" ‘ɓa ɓə gna ape,

"Fye myiya kpe n yi!"

jesnu ɓai gna apekwnukwnu,

"Fye kwu yi byi!" ’

31 Ntuge ngye aza zhni əɓəye pya lo əsa n shnuwna ye gnyi n shnipwui, knyiɓei nu ɓə zhni əsa n kwo ɓə la woakawu a?"

32 Azaje ngwnu-aba ń ɓa ɓə zhni avyì nu, aa ɓa kwu n kwnusnu n woi əə wu ɓa. 33 She ɓa ɓə si aba n a yi nge atukwobwe aba, ɓaa wo znudu ń abaayi, n kwnusnu n avyii; gbmanyi tu n əwo ɓwaizhe, gbmanyi tu n əwo ɓwaipmi ɓwa. 34 Yeisu wa gna, "Dada, zo ɓa abwi ntuge ɓa ta kpe əɓo ye lo n ɓa zhni m." Jesnu ɓa gná əwo aje n əbashei.

35 Aza ɓa kwu zhi ɓai shiawye, jesnu abegyiyi ce ɓai kpe wo agyè. Ɓa gna, "Wo ɓə la azaje gnyi, akpəge wo gnyi əwohni; ngye wo zhni Kirisiti, Shekwoyi nya nu, Əza Knyiknyiyi."

36 Akwnuyi ce ɓa ɓe jesnu ɓa kpe wo agyè. Ɓa ga wo anamnuwna mamai 37 jesnu ɓa gna, "Ngye əho nu zhni əsu Ayahudiyi nya, akpəge ho gnyi əhohni."

38 Wyidna ɓə kakpe n əwo tukwo əshe n əkwo nu ɓə nyi;

Əza ye nu Zhni Ayahudiyi əsu.

39 Zaknayi n avyì yi ń wo ɓə gyitu n ɓo nyi, wa knyi Yeisu akpmi: "Mi ta gna əho nu zhni Kirisiti m? Gnyi əhohni ɓədo n əyii!"

40 Ama aɓəkawuzhniyi zabaayi wa gnaknyi wo, wa gna, "Ho ta wo Shekwoyi ədna lo m, shikwonyi yi gwo tata gbmanyi nu m? 41 Əyi tata dnalo n əfye ntuge yi gwo ənya nu n əyi aɓəzhni gwogwolo ncei. Ama əza ye too zhni əɓonukwoi ho m."

42 Nlonu wa gna, "Yeisu, ɓəə pa əmi ɓo, əsa n ho ɓə lodna ncei n əho əbemi."

43 Yeisu wa dnaɓəgbe, "Mi gna ho gaiciya, n naiye ho ɓa kwnusnu n əmii dna n paradisi."

44 Nyipyei atukwogwnu əsa nu ɓə gnyi, jesnu wyegbma kwaa ɓə kpe n əknyii vnyanya, nya snukna ngwnu-ata nyipyei nya, 45 ntuge nyipyei ɓə la fa wo ɓo. Jesnu, əjesa n a ɓə ncei kna n Dagayipwuwa nyi, kwa gnajeya ngwnu-aba. 46 Yeisu wa yì n bəgye kalá nyai, "Dada, dna ń əho akwnu nu ń mi dna əmi zafnu." She wo ɓə da əɓəye, wa dna əsnu.

47 Bəzhetagyida woi kwu gye əɓo ń kwo kwu zhni nyi, wa ci Shekwoyi wa gna, "Ɓəhnihni əza ye ɓə zhni ɓəfyeceyi nu." 48 She aza vnyanya ń ɓa ɓəə la yezhi ɓa gye əɓo ye nyi, ɓə gye əɓo n kwo ɓə zhni, ɓa zè agwu aɓwa njesnu ɓa gaya. 49 Ama aza yi vnyanya ń ɓa ɓe kpe wo əye, du ɓədo ń anyikwozai n ɓa ɓə ya wo vyi n Gəlili nyi, ɓa kwu zhi n tagnyi, ɓai gye aɓo ye.

50 Nsaiye əza ɓə nyi ai yi wo ge Yusufu, wo ɓə dna n abwokwnuda, wo ɓə zhni əza manai nu jesnu gaiciyazhniyi, 51 əza n wo to ɓə əɓwai dna n əɓa ɓəznu ɓədo n əɓa aɓəzhnii m. Wo ɓə gbmi n Arimatiya nu, Yahudiyi əzhi jesnu əwo n əwohni tukwo, wo ɓə gnyi woi pmi Shekwoyi əbemi nu. 52 Wa lo da Byilatusu, wa nya Yeisu nayi ɓo. 53 Nlonu wa shni kwo shi n əknyi, wa kwu kwo wna aje luweluwei jesnu waa kwo la dna n vnyigwo n a ɓə ncei fna dna n kwuta, ədo n a to ɓə shni əza byidna ń kwo m. 54 Əwyi yi ɓə zhni nyipyei aɓəzhnizhi nya nu, njesnu Sibyiwyi ɓə ye kwa si nu.

55 Anyikwoza n ɓa ɓə kwnu ɓe n Yeisui ɓai kwnu n Gəlili nyi, ɓa vyi Yusufu, ɓa lo ɓa gye vnyigwo njesnu shi a ɓə ya əwo nayi dna n kwo. 56 Nlonu ɓa lo apyi ɓa vyi anyasnidaí ɓo n əmi asnidaíi. Ama ɓa kwu snu n Sibyiwyii ntu ɓəvyi aɓəgbetu nya ɓo.