1 N wyihoi shi Yeisu ɓə dna woi wunya ń Dagayipwuwa ashilagyí jesnu woi zhni waazi nabagyi manai nya, apirisiti atukwoda ń owa anyawuyii ń kwnusnu n abyedai, ɓa ɓe da wo. 2 Ɓa gna, "Gna yi, n knyi ikwoi nu ń ho zhni aɓo ye ncei a, nyika nu na ga ho ikwo ye a?"

3 Wa dnaɓəgbe, "Əmihni ce mi ɓa nya fye əɓo. Fye gnà mi: 4 Yohana batizimazhni; kwo ɓə gbmi n əshemi nu, kwo əkwo ɓo ɓə pá n zanyikwoci nu a?"

5 Ɓa da kwo fyiaje ɓahniɓahni ɓa gna, "N ya gna, ‘N əshemi nu,’ wo ɓa nyaɓo, ‘Knyiyi nu zhni to fyehni ga wo gaiciya ma a?’ 6 Ama ń ya gna, ‘Ń azanyikwoci aba nu,’ aza vnyanya ɓá knyi yi akwuta, ntuge ɓa ɓə kpe nge Yohana ɓə zhni sheɓəgwognayi nu."

7 Ntulonu ɓa dnaɓəgbe, "Yi ta kpe aba lo n kwo ɓə gbmi m."

8 Yeisu wa gna, "Əmihni ce, mi taa gna fye, kwo n knyi ikwoi nu n mi zhni aɓo ye ncei m."

9 Wa gwodu wa sí aza ɓəsisi ye: "Əza ɓə n anamzhnii dna, waa kwo ga afwaɓayi ho, wa lo aba, waa mwasa. 10 N afwanyakwu əsai wa tnu əwo tnutnuyi ń afwaɓayi aba, nabai ń ɓa ɓə ga wo anam agyigyiyi ho. Ama afwaɓayi ɓa lu wo jesnu ɓaa wo jezeya lo ncei ń aɓwa gbəloi. 11 Wa tnu tnutnuyi ədohoi, ama əwohni ce, ɓa lu wo, ɓa zhni wo avnyinkwo ɓo, jesnu ɓaa wo jezeya lo ncei ń aɓwa gbəloi. 12 Wa dù wa tnu ń əza taayii, ɓa kwu wo kpe aci jesnu ɓaa wo gbmiya n ofwa yi.

13 "Nlonu anamzhni ofwada wa gna, ‘Knyiɓei nu ń mi ɓa zhni a? Mi ɓa tnu n əmi nugwnui, əza ń mi ye wo; kpesnu ɓa ɓə ga wo mwamwa.’

14 "Ama she afwaɓayi ɓə tawye ɓa gye wo, ɓa kwu əgbepa. Ɓa gna, ‘Əza ye nu zhni əgwúgyiyi, fye ɓe ya wu wo əgwú ɓə la zè əyi nya.’ 15 Ntulonu ɓa gbmi wo ya gnyi n anamzhni ɓa wu wo.

"To, anamzhni ofwada ɓə zhni ɓa knyiyi nu a? 16 Wo ɓə ɓe, woi wu afwaɓayi ye, jesnu woi la anamzhni ofwa ga azaje." She aza ɓə wo ɓəye, ɓa gna, "Shekwoyi wo pəiceya!"

17 Yeisu wa ce ɓa awye ceewo wa nyaɓo, "To knyiyi nu zhni əɓo ye awyega ń kwo kafyilo nyi:

" ‘Kwuta ń anyakwnumiyi ɓə la əkwo aɓo na nyi,

əkwo nu la zè ɓwakwonu kwuta a’?

18 Əzahozahoyi ń wa myiya tu ń kwuta yi, wo ɓaa bmaya wyiwowyiwo; əza ń kwa kaya tu ń wo, wo ɓaa vyiya dugwudugwu."

19 Owa anyawuyi ń apirisiti atukwodai ɓa zna zokwo shni nabai ɓa wna wo nsayisayii, ntuge ɓa ɓə kpe nge wo sí ɓəsisi ye tu ń əɓa tukwo nu. Ama ɓa kwu wo aza ədna.

20 Ɓa kwu laɓa ɓai ka wo əwye, ɓa tnu abawyeka-fyaayi tnutnu, ɓa kwu əɓahni zè ngye aza agaiciyada. Ɓa ɓə n awyei tu nge ɓa wna Yeisu nu ń ɓəho ń wo ɓa da, nabai ɓa ta wo ya ga gwomna kalá ɓədo n əwo ikwoi. 21 Ntulonu abawyeka-fyaayi ɓa nya wo əɓo: "Nyawuyi, yi kpəlo nge ho daɓo jesnu hoi wu əɓo ń kwo bmya, ho ta wu kakayi m, ama ho wu Shekwoyi zokwo n kwo lodo n gaiciyanunui nyi. 22 Kwo wulo ceewo a gba Kaisa gədu kwo a to gba ma?"

23 Wa kwu əɓa kwocedna gyewye ntulonu wa gna ɓa, 24 "Fye wu mi denari. Nyika dogbe nu tu ń kwo n nyakai a?"

Ɓa dnaɓəgbe, "Kaisa nya nu."

25 Wa gna ɓa, "Nlonu fye ga Kaisa ənya ń kwo zhni Kaisa nya, jesnu Shekwoyi, ənya n kwo zhni Shekwoyi nya."

26 Ɓa to ɓə myi ɓa wna wo dna n əɓo n wo ɓəə kwu da gnyi ń bəgyé nyi m. Ntuge əwo ɓəgbedna ɓə la ɓa ga ɓəwowo, ɓa kwu cepyi.

27 Azaho n Asadusiyi, ń ɓa gna nge əfyikalakwu to lo nyi m, ɓa ɓe Yeisu aba n ɓənyai. 28 Ɓa gna, "Nyawuyi, Mwusa ɓə kwu ka ga yi nge, n əza dnagbma wa fyí jesnu wa fa əwo nyikwo gnyi ntna aɓyi, nge ɓəshishi nu əza yi wa la nyigbayi nabai wa ɓwa əɓyi ga əwo dnagbma. 29 Nsayii, aza ɓə nyi ngwnu-tnaaba, ɓai kwnu n əyàmi gbmanyi. Əza kpmisnuyi wa la nyikwo waa fyí ntna əɓyi. 30 Əzabaayi 31 njesnu, əza taayi waa wo la, kwa ɓwa vyilo nlonu əɓa tnaaba, ɓa kwu fyí ntna əɓyi. 32 N kpmasnu nyikwoza yi ce waa fyí. 33 To, nsaiye, dna n əfyikalakwu əsa wo ɓə zhni nyika nyikwo nu a, shikwonyi əɓa tnaaba ɓa ɓə kwu amwula pa n woi nyi a?"

34 Yeisu wa dnaɓəgbe, "Aza cala ye nya, ɓa pa amwula lo jesnu ai kná ɓa amwula. 35 Ama aza ń a kwu gye ɓa kwnuce, ɓai ɓwa aba ń anyì dəyi n ɓa ɓə lo nyi, jesnu dna ń əfyikalakwu əsa ń əfyi, ɓa to ɓə pa amwula ai gna nge a kná ɓa amwula m, 36 jesnu ɓa to ɓə shna fyí m; ntuge ɓa ɓə kwu zè ngye amaləka nu. Ɓa zhni Shekwoyi aɓyi nu, shikwonyi ɓa zhni aɓyi akalakwu nya nu n əfyi. 37 Ama dna ń zhabwi ənagyi nabagyi, kwo Mwusa ɓə kwu wu nge afyífyiyi zhni ɓa kwukala. Ntuge wo ɓə yi Dagayi, ‘Shekwoyi Ibrahim nya, n Shekwoyi Ishakwu nyai ɓədo n Shekwoyi Yakwuɓwu nyai.’ 38 Wo to zhni Shekwoyi afyífyiyi nya nu m, ama aza n ɓa zhi n wyewyeyii nyi, ntuge ń əwo aba, aza vnyanya n wyewyeyi lo."

39 Azaho n owa anyawuyi ɓa dnaɓəgbe, "Nyawuyi, ho kwu ɓəda n bmya!" 40 Njesnu əzaho to ɓə shna myi wa nya wo ɓəhoɓəhoi m.

41 Nlonu Yeisu wa gna ɓa, "Knyiyi nu zhni ai gna nge Kirisiti zhni Dawuda nugwnu nu a? 42 Dawuda ń əwohni tukwoi, wo ɓə la znuya dna n əpakashi Anyiasasayi:

" ‘Dagayi ɓə gna əmi Dagayi:

"La sasetu n əmi ɓwaizhe ɓwa

43 nya əsa ń mi ɓə zhni əho anuwnuyi ɓa kwu

zè əho apitakpeba." ’

44 Dawuda yi əwo nu ge ‘Dagayi.’ Kwo ɓa zè n wunanu, waa zè əwo nugwnu a?"

45 Shi aza vnyanya ɓə zhi ɓai knatnubwa, Yeisu wa gna əwo amwutuyi, 46 "Fye zhni pəceye n owa anyawuyi. Ɓa ye ɓa zna laɓa n aje ayaakwoi kpe jesnu ɓa ye a ɓyi ɓa əgna zhi n adubayaakwo n mwamwagai, jesnu a ga ɓa asasekpeba adnagbmai fyi n Ayahudiyibwokwnu n aba mwamwa nyai n awyefnaba. 47 Ɓa losa anyigbayi apwuwa ɓa pmyi ɓa wu əɓahni n aduwazhni akpamwai. A ɓə tá aza ye pya ń əwyei bmyibmyii."