1 Nsaiye Awyefna Biledi Tnayisti nya, ń a yi kwo Gnanaznu nyi, kwo ɓəə la wo vyivyiwyi, 2 jesnu apirisiti atukwoda n owa anyawuyii, ɓa ɓə laɓa ɓai zna zokwo ho shni ɓa wu Yeisu, ntuge ɓa ɓə wo aza ədna. 3 Nlonu Shetam wa lodna n Yahuda, ń a ɓə yi wo nge Iskariyoti nyi; zaknayi dna n Awoceaba yi. 4 Nlonu Yahuda wa lo da apirisiti atukwoda n Ayahudiyibwokwnu gwuyi atukwodai, wa kwuaɓoaje n ɓai, shi wo ɓa ɓwi Yeisu n wu. 5 A da ɓá jesnu ɓa kwu ye nge ɓa ɓá ga wo gyiwye. 6 Waa ye jesnu wa laɓa woi dna əsa wye n kwo ɓa bmya wa ta Yeisu ya ga ɓa to deejii zhi m.

7 Nlonu Awyefna nyipyei Biledi Tnayisti nya kwa ɓe, əwyi ń a wu Gnanaznu kwugyasnáyi nyaga ncei nyi. 8 Yeisu wa tnu Byitusu n Yohanai, woi gna, "Fye lo fyei zhniaba aba ga yi ń yi ɓa gyi Gnanaznu nyagyi."

9 Ɓa nyaɓo, "Ho ncei pma yii zhniaba aba əkwo nya n nanu a?"

10 Wa dnaɓəgbe, "Shi fye lofyi n əzhiyaakwo, əza n nuwna nyikwnui tu, wo ɓə shegwnu fye. Fye vyi wo lo pwuwa n wo ɓəə lodna n kwo nyi, 11 jesnu fye gna pwuwada, ‘Nyawuyi nyaɓo lo: Zhiɓeyi nyakwnu gnyi ń nanu, aba ń mi ɓa gyi Gnanaznu nyagyi n kwnusnu ń əmi amwutuyii a?’ 12 Wo ɓə wu fye nyakwnusniyi dnagbmai ncei zhniaba gnyi n nunui. Fye zhniaba aba n ɓo."

13 Ɓa kwuka, ɓa lo ɓa gye aɓo n ɓwasnu shi Yeisu ɓə gna ɓa nyi. Ntulonu ɓa zhni Gnanaznu nyagyi ɓo.

14 She əsa ɓə si, Yeisu ń əwo amwutuyii ɓaa kpmima n tebwul. 15 Jesnu wa gna ɓa, "Mi ɓə ncei pma ma kwnu Gnanaznu nyagyi gyi n fyei ń əwyei bmyibmyiyi, ma kpé azhnìgye. 16 Ntuge mi gna fye, mi to ɓə ye je kwo gyi m, sai əsa ń əkwo ɓətukwo ɓə kwu nu dna ń Shekwoyi əbemi."

17 Shi wo ɓə la bwoɓyi la shi, wa sa Shekwoyi ami jesnu wa gna, "Fye gwo dəye fya gna kwo ya ga aje. 18 Ntuge mi gna fye, mi to ɓə ye je anam wnunuyi gyigyii ye sni m, akpəge Shekwoyi əbemi kwo la ɓe."

19 Njesnu wa la biledi, wa saami jesnu wa sa kwo ya, wa ga ɓa kwo woi gna, "Dəye nu zhni əmi nayi ń a la ga ntu əfye ɓo; fye zhni dəye fyei pa əmi əɓo."

20 N ɓwasnu lonu, shi ɓa ɓə kwu pwo wyeshenyagyi gyi ɓo, wa la bwoɓyi shi, woi gna, "Bwoɓyi ye nu zhni ɓəgbeshi woiwoyi dna n əmi ami, ədo ń a la zeya ntu ń fye ɓo. 21 Ama əza ń wo ye wa kwnu mi nyi, wo n əɓwai kwnudna lo n mii tu ń tebwul ye. 22 Əza Nugwnu ɓa lo ngye shi a ncei znutu lo ń wu nu, ama owii n əza yi aba ń wo ɓwu wo nyi." 23 Ɓa ya aje aɓonya əɓahniɓahni kwo nyika nu n ɓa n wo ye wa zhni ɓəye a?

24 Aɓənakpeaje ɓa laka fyi n əɓa atasni, kwo nyika nu, ń ɓa, n a zhninubwo nge əwo nu ɓə la zhni əza duduyi a. 25 Yeisu wa gna ɓa, "Asu Abyedo nya zhni adagayi nu kpe n əɓa aza; jesnu aza yi n ɓa gyi əbe kpe n əɓa tukwo nyi, ɓa yi əɓahni nge Azabmazhniyi. 26 Ama əfyeeda fye taa zhni nlonu m. N əkwo əɓwi, əza yaakwo duduyi ń əfye atasni wo ɓaa zè ngye əɓyi nawyii, jesnu əza ń wo gyi əbe ngye əza ń wo zhni tnutnuyi. 27 Ntuge nyika nu gna yaakwo zhni lo a, əza nu n wo sasetu n tebwul woi gyi nyagyi nyi, kwo əza n wo gna nyagyi nyi a? Əza nu to ń wo sasetu n tebwul nyi m? Ama mi dnalo ń əfye atasni ngye əza ń wo zhni tnutnuyi. 28 Əfye nu zhni aza yi ń fye kwu gnyiagnyi zhi n mii dna n əmi mwimwi. 29 Mi ga fye əbemi nu, n ɓwasnu shi əmi Dada ɓə dna mi əbemi n akwnu nyi, 30 nabai ń fye ɓə gyi, fyei sni kpe n əmi tebwul fyi n əmi əbemi jesnu fyei sase kpe n abeshnikpegye, fyei da Israila abye awoceaba owa.

31 "Sima, Sima, Shetam wo kwu əfye əɓo nya nabai wa pye fye ya vnyanya ngye alikama. 32 Ama mi kwu aduwazhni ntu əho ɓo, Sima, nabai to əho gaiciyaganunui kwoi gbakalá m. Jesnu shi ho ɓə la awye je pmyiɓe da mi, ɓə fyi əho azaje akalá nabai ɓa kwu myizhi."

33 Ama wa dnaɓəgbe, "Dagayi, mi n mihnii yeyei lo, ma kwnu zhalu lo n hoi, jesnu ma fyí n kwnusnu n hoi."

34 Yeisu wa dnaɓəgbe, "Əmi nu gna ho Byitusu, pisenugba ɓə snu ń kwo cekwu n naiye, hoi la əmi yekpé aɓəna aɓwa ngwnu-ata."

35 Nlonu Yeisu wa nya ɓa əɓo, "She mi ɓə tnu fye tnutnu ntna lagyiita, gwnuma kwo abwada, fye ɓə kwu gyi nyaho sna?"

Ɓa dnaɓəgbe, "Aawo."

36 Wa gna ɓa, "Ama nsaiye, ngye əza n lagyiitai lo, wo la kwo la, n gwnumai ce; jesnu n ho to n əbeyakwoi lo m, kwu əho aje əbmyi nya kwnu, nabai ha si əbeyakwo gbmanyi. 37 A cei kafyilo: ‘A ɓə n woi ba dna ɓədo n aleifyizhniyii’; njesnu mi gna fye nge ɓəshishi nu dəye kwa nu tu n əmi tukwo. Əə, əɓo n kwo kafyilo ntu əmi ɓo, kwo gnyi kwoi si əkwo nunusa nu nyi."

38 Amwutuyi ɓa gna, "Gyewye, Dagayi, abe ayaakwo shi nyi ngwnu-aba."

Wa dnaɓəgbe, "Kwo la kwnu!"

39 Yeisu wa gbmiya lo Zaitu Əpe shi wo zhni wa shnizhni nyi, jesnu əwo amwutuyi ɓa vyi wo. 40 She wo ɓə si abaayi, wa gna ɓa ge, "Fye zhniaduwa nabai n fye taa kaya fyi n mwumwu m." 41 Wa lo n əkpai fyeewyi, wa ceakwokwo shi wa zhniaduwa, 42 "Dada, ngye əho ɓəye nu, akpəge ho la bwoɓyi ye la mi ya; dudulonu toge əmi ɓəye m, ama əho nya nu kwo zhni." 43 Maləka wa gbmi ń əshemi wa kpeya da wo, wa fyi wo akalá. 44 Jesnu woi dna gnyi n azhnìgye, wa gna aduwa zhnizhni n əwyei bmyibmyii, jesnu əwo amisa ɓa gbiya zhi n əknyi ngye ami kwolo.

45 She wo ɓə laka n aduwazhni aba, wa jezeɓe da əwo amwutuyi, wa gye ɓa zhi ɓai wnagye, n ɓəɓei zhi ntu n bwugbawnu ɓo. 46 Wa nya ɓa əɓo, "Knyiyi nu zhni fyei wnagye a? Fye kwukazhi fya zhniaduwa nabai n fye taa kaya fyi n mwumwu m."

47 Woi ye gnyi woi daɓo, deeji kwa yezhi jesnu əza ń a yi wo ge Yahuda nyi; gbmanyi n Awoceaba yi, waa gyiabye, anuwnuyii vyi wo. Wa yegwu Yeisu nabai wa she aɓwa pma wo nugwnudo nya pya, 48 ama Yeisu wa nya wo əɓo, "Yahuda, ho kwnu Əza Nugwnu ngye nugwnudo nu?"

49 She Yeisu amwutuyi ɓə gye əɓo n kwo ɓə ye kwa zhni nyi, ɓa da ge, "Dagayi, kwo yi zhniapma n əyi abe yaakwo a?" 50 Jesnu zaknayi n əɓa, wa znu pirisiti dnagbmai fyenu ənya, waa tnubwa ɓwaizhe nya ka wo ya.

51 Ama Yeisu wa dnaɓəgbe ge, "Fye to je əɓəye zhni m!" Jesnu wa to əza yi tnubwa ɓwa, wa ká wo gna.

52 Nlonu Yeisu wa gna apirisiti tukwoda, n Dagayipwuwa abagwuyi atukwodai, ɓədo n abyedai, ń ɓa ɓəə kwu ɓe zhi ntuge ɓa wna wo nyi, "Mi zhni kalákpei tukwoda nu, n fye gnyi fyei ɓe da mi n abeyaakwoi n abwusii? 53 Mi ɓə kwnusnu n fyei nyipyei dəhodəhoi dna n Dagayipwuwa ashilagyí, fye to ɓə wna mi n əsa yi m. Ama əfye əsa nu gnyi nyi; ń wyegbma gyibe ncei."

54 Nlonu ɓa wna wo, ɓa lo n woi n pirisiti dnagbmai pwuwa. Byitusu wa lo woi vyi wo ń tagnyi. 55 She azaho n abaayi, ɓə kwu əná fnyizhi n ashilagyí akpeda atasni, ɓai kwu sase zhi, Byitusu waa sase shi ɓədo n ɓai. 56 Ɓyinyikwoyi tnutnuyi ho, wa gye wo sase shi n əná aba. Wa shi wo awye byiwuu wa gna, "Zanugbayi ye ɓə kwnusnu n woi."

57 Ama wa na kwo aɓo. Wa gna, "Nyikwoza, mi ta kpe wo ye lo m."

58 Əsa fyewyi ce, əzado wa gye wo əwye jesnu wa gna, "Əhohni ce, ho ɓə kwnusnu n ɓai."

Byitusu wa dnaɓəgbe, "Zanugbayi, əmi nu to m!"

59 A ɓwa əsa ngye snukna gbmanyi əzado ce wa je kwo əgbemyi, "Ɓəhnihni, əza ye ɓə kwnusnu n woi, ntuge wo zhni Gəliliyi nu."

60 Byitusu wa dnaɓəgbe, "Zanugbayi, mi ta kpe əɓo ye lo n ho gnyi hoi da m, kpeekpe!" Woi ye ɓwagnyi woi daɓo, pisenugba kwa cekwu. 61 Dagayi wa pmyiawye shi Byitusu ceewo. Nlonu Byitusu wa pa ɓədagbma n Dagayi ɓəə kwu da ga wo nyi: "Pisenugba ɓə snu n kwo cekwu n naiye, hoi la əmi yekpé aɓəna aɓwa ngwnu-ata." 62 Nsayi wa gbmiya lo əbmyi wa ciɓwi bwugbazhii nya.

63 Aza n ɓa ɓə zhi ɓai gwu Yeisu nyi, ɓa ya wo agyèkpe jesnu ɓai lu wo. 64 Ɓa kwu aje wna wo n əwo awyeba njesnu ɓa nya wo əɓo, "Da sheɓəgwogna! Nyika nu naa znu ho ənya a?" 65 Jesnu ɓa gna wo aɓəda nukwoi aje n mwa bəgyé.

66 She əfye ɓə gyi zhi, bwokwnu abyeda, apirisiti atukwoda n owa anyawuyii, ɓa yezhi ń abagbmanyi, ɓa ɓe n Yeisui ń əɓa abye. 67 Ɓa gna ge, "Ngye ho zhni Kirisiti nu, gna yi."

Yeisu wa dnaɓəgbe, "Ń ma gna fye, fye taa ga mi gaiciya m, 68 jesnu, ń ma nya fye əɓo, fye taa ɓwa kwo agbma m. 69 Ama ənya n kwo laka nsaiye kwoi lo abye, Əza Nugwnu ɓə sasetu n Shekwoyi Ikwoda Duduyi ɓwaizheɓwa."

70 Əɓa vnyanya ɓa nya wo əɓo, "Əho nu zhni Shekwoyi Nugwnu?"

Wa dnaɓəgbe, "Fye kwu da nge əmi nu."

71 Nlonu ɓa gna, "Yi zhi yii ye pmi knyi ɓəgbmii nu n shnasnu a? Yi kwu kwo wo ń əwohni əgbe."