1 Yeisu, ń nunui n Zafnu Gyigyiyii, wa fa Urudu jesnu Zafnu wa lo n woi ń zhabwikawu, 2 aba ń Shetam ɓə mwu wo, anyipyei shiinyi. Wo to ɓə gyi nyaho fyi ń anyipyei yi m, jesnu shi anyipyei yi ɓə kwu zo, myikwnu kwaa wo gwnu.

3 Shetam wa gna wo, "Ngye ho zhni Shekwoyi Nugwnu nu, akpəge ho gna kwuta ye nge kwo la zè biledi."

4 Yeisu wa dnaɓəgbe, "Kwo kafyilo: ‘Zanyikwoci taa gyianyì n nyagyii nu gbmanyi m.’ "

5 Shetam wa la wo gwnulo ncei ń aba asnada, wa wu wo anyì abemi vnyanya n əsagbmanyii. 6 Njesnu wa gna wo, "Mi ɓa kwu əɓa ikwo ga ho vnyanya ɓədo n əɓa bmyabmyai, ntuge a kwu ɓa ga mi, jesnu mi ɓa myi ma ga zahozahoyi n mi ncei pma. 7 Ngye ho ɓa ga mi mwamwa, əɓa vnyanya ɓa ɓá kwu zè əho nya."

8 Yeisu wa dnaɓəgbe, "Kwo kafyilo: ‘Mwa Dagayi əho Shekwoyi, jesnu əwo nu ɓwasnu n ho ɓa zhni wo tnutnu.’ "

9 Shetam wa lo n woi ń Urishelima, jesnu waa wo knyitu ń Dagayipwuwa àsna duduyi shé. Wa gna, "Ngye ho zhni Shekwoyi Nugwnu nu, she əhohni ya shi ń əknyi tu n ya. 10 Ntuge kwo kafyilo:

" ‘Wo ɓa ga amaləka gbetu tu ń əho tukwo

ɓa gwu ho pəceye;

11 ɓa ɓə la ho lawu dna n əɓa aɓwa,

nabai n ho to ɓə znu pita n kwuta m.’ "

12 Yeisu wa dnaɓəgbe, "A ncei da lo: ‘To dna Dagayi əho Shekwoyi n mwumwu m.’ "

13 She Shetam ɓə la pwo əwo mwumwu ye ɓo vnyanya, wa fa wo, woi pmi əsado n wo ɓə je ɓwa wa mwi wo.

14 Yeisu wa jezelo Gəlili dna n Zafnu kalá, əwo nabagyi kwa lapwi ń əknyii azhigba vnyanya. 15 Wo ɓə gnyi woi wunya dna n Ayahudiyibwokwnu, jesnu zahozahoyi wa ci wo.

16 Wa lo Nazereti, aba n wo ɓə mwa dna nyi, jesnu n Sibyiwyii wa lodna n Ayahudiyibwokwnu shi əwo kwnunu ɓə nyi. Wa laka gnyi wa ba ənya, 17 a ga wo əpa nyakashi kpmikpmii sheɓəgwognayi Ishaya nya. Wa lo kwo ya, wa gye aba n kwo ncei kafyilo:

18 "Dagayi Zafnu kpəlo n mi, ntuge wo la mi knyi ma da anabagyi manai ga asnayi.

Wo ɓə tnu n mii ma dnawyi loloya nya ga aza n ɓa fyilo n zhalu, jesnu wyebagye ga wyebwayi, ma kwnu aza ya n snuwna, 19 ma dnawyi əyé bmyashi Dagayi nya."

20 Nlonu wa kpmi əpa nyakashi kpmikpmii, waa kwo je əkwo aknawnayi ga jesnu waa sase. Zahozahoyi n wo ɓə dna ń Ayahudiyibwokwnu, ɓa kwu awye byece wo. 21 Wa gna ɓa, "N naiye, nyakagyigyiyi ye kwo la nu fyi ń fye atnubwa."

22 Aza vnyanya ɓa daɓo manai tu n əwo tukwo, ca wo ɓa ntu aɓəda shebmyashi nya ɓo n ɓa ɓə kwnuɓe n əwo əgbe nyi. Ɓa nyaɓo ge, "Əza ye nu to zhni Yusufu nugwnu m?"

23 Yeisu wa gna ɓa, "Ɓəhnihni fye ɓa si mi ɓəsisi ye: ‘Shigbeda ka əhohni gna!’ Jesnu fye ɓa gna mi ge, ‘Zhni aɓo dna ń əhohni əzhi ye, ənya ń yi kwu wo nge ho kwu zhni dna ń Kapanam nyi.’ "

24 Wa gwodu, "Ɓəhnihni əmi nu gna fye, sheɓəgwognayi dəhodəhoi to lo n a gwo wo ń əwohni əzhi m. 25 Mi gna fye gaiciya nu, nge anyigbayi bəgyé ɓə fyi n Israila ń Iliya anyipyei, əsa ń a ɓə lá əshemi gwù aye ngwnu-ata n tokwnui, jesnu myikwnu nazhii kwa gwnù n əknyii vnyanya. 26 Dudulonu, a to ɓə tnu n Iliyai ń əzaho aba n ɓa m, ama a tnu n əwoi lo da nyigbayi n Zarefat ń Sidon əknyi. 27 Nlonu ń nayiwnu anyasnai ɓə mwa bəgyé fyi n Israila ń sheɓəgwognayi Elisha əsa, dudulonu əzaho to ɓə nyi dna n ɓa ń wo ɓə ɓwa kágna m, akpəge Naaman Siriyayi."

28 Aza vnyanya n ɓa ɓə fyi ń Ayahudiyibwokwnu nyi, she ɓa ɓə wo ɓəye ɓa gyi minagyii napyei. 29 Ɓa kwukala zhi, ɓa gbmi wo ya n əzhi, ɓa lo n woi ń agəgyigəgyi əpe kwnukwnù nya n əzhi ɓə mi kpe ń əkwo nu nyi, nabai ɓa ce wo aɓwaya shni n agəgyigəgyii. 30 Ama wa znazna dnalo ncei n deeji atasni, wa wna əwo zokwo.

31 Nlonu wa shnilo Kapanam, əzhi n Gəlili əknyi, jesnu n Sibyiwyii, wa wu aza ənya. 32 Əwo nyawu kwaa wo aza, ntuge əwo aɓədagbma ɓə n ikwoi.

33 Dna n Ayahudiyibwokwnu, əzaho ɓə dna ń wo ɓə n əsei, n zafnu ajegbmiyi, wa sáwyi n bəgye kalái, 34 "Laka n ya! Ho ye knyiyi nu n əyi a, Yeisu Nazeretiyii? Ha ɓe ha zhni yi agbma nu? Mi kpe əza əye lo n wo gnyi n hoi; Gyigyiyida, Shekwoyi nya!"

35 Yeisu wa gnaknyi kwo n əwyei bmyibmyii. "La cepyi! Gbmiya n wo!" Nlonu əse nukwoi kwa she əza yi ya shi n əɓa awyeba vnyanya, jesnu kwa gbmiya to kwa tu wo əci m.

36 Ca wo aza vnyanya, jesnu ɓa gna aje, "Knyi aɓədagbma nu nyi a? N ikwoi ɓədo n kalái woi ga azafnu ajegbmiyi əgbe jesnu ɓai kwnuya!" 37 Jesnu əwo anabagyi kwaa lapwi n shegwnu n səpa yi vnyanya.

38 Yeisu wa fa Ayahudiyibwokwnu wa lo Sima pwuwa. N əsayii Sima yezhi nyikwozada ɓə dna n nayi-nagwnu yaakwoi, jesnu ɓa gna Yeisu nge wo bma wo zhni. 39 Ntulonu wa ya gnyi ń wo aba, wa gnaknyi nayi-nagwnu yi jesnu kwa fa wo. Wa laka gnyi n əsagbmanyii wa ya ɓa ɓəvyi. 40 N nyipyei-shniɓwai, aza ɓa ɓe Yeisu n azai vnyanya, n ɓa ɓəə n anyasnai gbowogbowo, jesnu wa kpe zahozahoyi əwo aɓwa, wa ka ɓa gna əɓa vnyanya. 41 Gbowo n aɓo yei, ase ɓa kwnuya ń aza bəgyé ɓai ɓəwyi, "Əho nu zhni Shekwoyi Nugwnu!" Ama wa gnaknyi ɓa jesnu to wa ye nge ɓa daɓo m, ntuge ɓa ɓəə kpe nge əwo nu zhni Kirisiti.

42 N əfyegyizhii, Yeisu wa gbmiya lo aba pyipyipyiyi. Aza ɓa laɓa ɓai zna wo shni, jesnu she ɓa ɓə si aba n wo ɓə gnyi, ɓa zhni wo atna nge wo to fa ɓa m. 43 Ama wa gna ge, "Ɓəshishi nu ma lo mii zhni waazi nabagyi manai Shekwoyi əbemi nya, ń azhi aje cè, ntuge a tnu n mii nce nu." 44 Njesnu wa gwodu woi zhni waazi fyi n Ayahudiyibwokwnu.