1 Nsayii agədu gwoyi n aleifyizhniyii ɓa ɓe ɓai yezhi ɓa kna Yeisu ɓəda tnubwa. 2 Ama Afarisiyi n owa anyawuyii ɓa da aɓəsnaanya, "Əza ye gwo aleifyizhniyi lo jesnu woi kwnu nyagyigyi n ɓai."

3 Nlonu Yeisu wa si ɓa ɓəsisi ye: 4 "Ń a gna nge əzaho lo ń fye n aknyii tagyi, ama gbmanyi n ɓa kwaa wo ɓwi. Wo taa fa ngwnu shiciwagbmanyi ncei ciwagbmanyi zhi ń bmana, wa vyi əknyi ɓwuɓwui yi apita, sai əsa n wa gye kwo əwye m? 5 Nlonu she wo gye kwo əwye, wa la kwo tu n əwo agbegbegye n agbmadai 6 wa lo apyi. Nlonu wo yi əwo anugwnudo ɓədo n əwo akwnuzhiyii wa gna ɓa, ‘Fye dagbma n mii; mi la gye əmi əknyi ɓwuɓwui əwye.’ 7 Mi gna fye nge, n ɓwasnu nlai nu dna n əshemi, n a ɓə nya agbmada n mwa ntu leifyizhniyi gbmanyi ɓo, n wa yeabwi n du aɓəfyeceyi shiiciwagbmanyi ncei ciwagbmanyi n ɓa to n abwuye apmai lo m.

8 "Kwo n a gna nge, nyikwoza n gyiwye azulufa azhanai lo ngwnu-awo, gbmanyi kwaa wo ɓwi. Wo taa wna pyitila əná, wa fnyi pwuwa ya, wa zna kwo shni pəceye sai əsa n wa gye kwo əwye m? 9 Əsa ń wa gye kwo əwye ncei, wo ɓa yi əwo anugwnudo ɓədo n əwo akwnuzhiyii wa gna, ‘Fye nya agbmada n kwnusnu n mii; mi la əmi kəɓwo ɓwuɓwui gyewye.’ 10 N ɓwasnu nlonu, mi gna fye, agbmada nya lo n Shekwoyi amaləka abye ntu leifyizhniyi gbmanyi ɓo n wa yeabwi."

11 Yeisu wa gyiabye: "Əza ɓə nyi n wo ɓə n anugwnui ngwnu-aba. 12 Əza nawyi wa gna əwo dada, ‘Dada, ga mi ənya n kwo ɓa si mi n əho nyaɓwa.’ Ntulonu waa əwo nyaɓwa gnaya ga ɓa.

13 "Tó əsa kwa shna mwa m, nugwnu nawyii wa ye əwo anya fyi vnyanya n wo ɓə ncei n aba gbmanyi, wa wna əzna lo əknyido ń kpaai, jesnu dna n abaayi wa kwu əwo nyaɓwa zhniagbma fyi ń anyìgyi fasa nya. 14 Shi wo ɓə kwu nyahonyahoi zo wu, myikwnu nazhii kwa losa n əknyí yi vnyanya, waa lodna n əsnagyi. 15 Ntulonu wa lo wa gwo tnutnu n əknyí yi da aba; wa tnu n woi n əwo ofwa, wa lo woo kpá abwulutu. 16 Wo ɓə ncei pma wa gyi nyagyii ń abwulutu gyi nyi, ama to a ga wo nyahonyahoi m.

17 "Shi wo ɓə ló əwohni ací, wa gna, ‘Əmi dada n atnutnuyi lo n mwa bəgyé ɓai gyi njesnu kwoi cezhi, ama mi dna nyi n ya, myikwnui wu mi! 18 Mi ɓa laka ma jezelo da əmi dada mii gna wo: Dada, mi kwu leifyi zhni əshemi ɓədo n hoi. 19 Mi to ye kwnuce lo a yi mi nge əho nugwnu m; la mi gwo ngye gbmanyi n əho atnutnuyi.’ 20 Ntulonu wa laka n əznai wa lo da əwo dada.

"Ama woi ye ɓe n zokwo n kpaai, əwo dada wa gye wo əwye, əwo snusnu kwa wna wo; wa bwusi lo da əwo nugwnu, wa shepma wo wa wna wo shi.

21 "Nugwnu wa gna wo, ‘Dada, mi kwu leifyi zhni əshemi jesnu n hoi. Mi to ye kwnuce lo a yi mi nge əho nugwnu m.’

22 "Ama əwo dada wa gna atnutnuyi, ‘Fye kwu pye! Fye ɓe n əje manaii fya kpe wo. Fye dna wo ɓwanyinya jesnu fya fyi wo abwada. 23 Fye ɓe n nakwo bizhimii fya wu kwo. Yi fnawye jesnu ya nya agbmadanya. 24 Ntuge əmi nugwnu ye ɓəə la fyí, ama nsaiye wo la wyewyeyi je ɓwa; wo ɓei la ɓwi, ama a la gye wo əwye.’ Ntulonu ɓa ya agbmada nya.

25 "Aɓwazhilo, nugwnu dnagbmai ɓə tu n ofwa. Shi wo ɓə wo vyivyiwyi n pwuwai, wa wo ai gyianya jesnu ai nyanya. 26 Ntulonu wa yì zaknayi n atnutnuyi wa nya wo əɓo n kwo ɓə gnyi kwoi zhni. 27 Wa dnaɓəgbe, ‘Əho mado wo la zhi jesnu əho dada wo la nakwo bizhimi wu ntuge wo la zhi da wo n laafyiyai.’

28 "Əwo dnagbma wa gyi minagyi to wa ye lodna ɓo n pwuwa m. Ntulonu əwo dada wa gbmilo əbmyi wa tna wo aɓwa. 29 Ama wa dna əwo dada ɓəgbe, ‘Shiawye! Aye ye vnyanya n mi laɓa mii zhni ho fyenu tnutnu nyi, jesnu mii too znu əho ɓəgbetu gna m. Dudulonu ho too shni mi, kwo əbwui ɓyiyi ga, nge mi nya agbmada ncei n kwnusnu n əmi anugwnudoi m, kpeekpe. 30 Ama she əho nugwnu ye, n wo kwu əho nyaɓwa zhniagbma fyi n akaluwa nyi, wa zhi apyi, ho la nakwo bizhimi wu wo!’

31 "Əwo dada wa gna, ‘Əmi nugwnu, ho kwnusnu lo n mii n əsahosahoi, jesnu nyahonyahoi n mi ncei lo əho nya nu. 32 Ama kwo kwnuce lo ya nya agbmadanya jesnu ya dagbma, ntuge əho mado ye ɓə la fyí, ama wo n wyewyeyi lo njesnu; wo ɓə la ɓwi, ama a la gye wo əwye.’ "