1 She Yeisu ɓəə la ngwnu-awoceaba yi yìzhi ń aba gbmanyi, wa ga ɓa kalá n ikwoi ɓa kwnu ase ya vnyanya jesnu anyasnai ɓa gwo kágna, 2 wa tnú ɓa tnutnu ɓa lo ɓə zhni waazi Shekwoyi əbemi nya jesnu ɓai ka anyasnayi gna. 3 Wa gna ɓa, "Fye to la nyahonyahoi ntu əzna ɓo m. Fye to la bwusi kwo gwnuma kwo biledi kwo gyiwye kwo əje baayi m. 4 Pwuwa dəhodəhoi n fya lofyi, fye kwu fyi n ɓo nya əsa n fye ɓə kwnu ń əzhi yi. 5 Ngye aza to gwo fye m, fya fa əzhi yi, fya lu aɓwutukwnu ya ń əfye apitabwada, kwaa zè ɓəgbmi tu n əɓa tukwo." 6 Ntulonu ɓa kwnuya lo ɓa vyi azhigba gbmanyigbmanyi, ɓai da nabagyi manai jesnu azai gwo kágna ń ɓwahoɓwahoi.

7 Nsayii, Hiridusu begyiyi wa kwu aɓo wo vnyanya n ɓa ɓə gnyi ɓai zhni nyi. Ca wó wo ntuge azaho ɓə laɓa ɓai da nge a ɓəə la Yohana laka ń əfyi, 8 azaje ɓa gna Iliya nu n la kpeyaɓe, dudulonu, azaje nge sheɓəgwognayi sapa nya ho nu n wo la je gbmiɓe ń wyewyeyii. 9 Ama Hiridusu wa gna, "Mi ɓə la Yohana kpé tukwo. To nyika nu zhni aɓo ye ń mi wo əɓa ɓo nyi a?" Njesnu wa yì əwohni nabai wa gye wo əwye.

10 She atnutnuyi ɓə jezezhi, ɓa wu Yeisu aɓo n ɓa ɓə kwu zhni nyi. Nlonu wa kwu ɓa ɓà wyiya lo kwnusnu n woi, ɓa lo əzhimi ho ɓahniɓahni, ai yi kwo ge Betsaida, 11 ama she deeji ɓə wo ce, ɓa vyi wo. Waa ɓa gwo, wa daɓo n ɓai ntu Shekwoyi əbemi ɓo, jesnu wa ká aza yi gna n ɓa ɓə ye kágna.

12 N wyesheɓwai, awoceaba yi ɓa ɓe da wo ɓa gna, "Kwu deeji ye gnami nabai ɓa lo azhigba n ɓa shegwnu laɓa nyi ɓədo n azhigbai, ɓə zna nyagyi shni n agyewnabai, ntuge yi zhi n zhabwi nu n ya."

13 Wa dnaɓəgbe, "Fye ga ɓa nyaho ɓa gyi."

Ɓa dnaɓəgbe, "Yi n biledi aknanai shilo n ɓwasnu ngwnu-atnu nu n abmyai ngwnu-aba; akpəge ń yi ɓa lo yii si nyagyi ga deeji ye nu vnyanya." 14 (Azanugbai ɓə nyi ngye dugwu-atnu nu.)

Ama wa gna əwo amwutuyi, "Fye gna ɓa ɓà kwu sase zhi ń akwui, ngye shiitnu, shiitnu." 15 Əwo amwutuyi ɓa kwu zhni nlonu, jesnu zahozahoyi waa sase. 16 Shi wo ɓə gwo biledi aknana ngwnu-atnu n abmya ngwnu-aba yii, wa kpe awye wu n əshe, wa sa Shekwoyi ami jesnu wa sa ɓa ya. Nlonu wa ga əwo amwutuyi ɓa, nabai ɓa gnaya ga aza. 17 Əɓa vnyanya ɓa gyi jesnu nubwo kwa kwu ɓa fwu, amwutuyi ɓa kwu awyiwoi n ɓa ɓə ce nyí ɓa kwu nu acekwnu ngwnu-awoceaba.

18 N əwyihoi she Yeisu ɓə pmyiyagnyi woi zhniaduwa jesnu əwo amwutuyi ɓə kwnusnu n woi, wa nya ɓa ɓo, "Deeji gna lo ge mi zhni nyika nu a?"

19 Ɓa dnaɓəgbe, "Azaho gna Yohana Batizimazhniyi nu, azaje gna nge Iliya; dudulonu azaje, nge sheɓəgwognayi kwokwoi ho nu n wo la jezeɓe n wyewyeyii."

20 Wa nyaɓo, "Ama əfye ma a, fye gna ge mi zhni nyika nu a?"

Byitusu wa dnaɓəgbe, "Kirisiti, Shekwoyi nya."

21 Yeisu wa kwnù ɓa ń əwyei bmyibmyiyi ge ɓa to gna zahozahoyi ɓəye m. 22 Nlonu wa gna, "Ɓəshishi nu Əza Nugwnu wa gyeazhnì aɓo bəgyé nya jesnu abyeda, apirisiti atukwoda ɓədo n owa anyawuyii, ɓa ɓə la əwo aɓo na. Njesnu ɓəshishi nu ai la wo wu, ama n nyipyei tayii ai la wo laka gnyi n wyewyeyii."

23 Nlonu wa gna ɓa əɓa vnyanya, "Zahozahoyi ń wo ncei pmalo waa zhni əmi mwutuyi, ɓəshishi nu waa əwohni aɓəna, jesnu wa la əwo znudu fyegyifyegyi, wa vyi mi. 24 Ntuge əza n wo ncei pmalo wa gnyi əwohni wyewyeyi, wo ɓə ɓwu kwo nuwna, ama əza n wo ɓa ɓwu əwo wyewyeyi nuwna ntu əmi ɓo, wo ɓə gnyi kwo. 25 Kwo n apmai lo n wunanu, n əza ɓa ɓwa anyì vnyanya, ama wa ɓwu əwo wyewyeyi nuwna a? 26 Əzadəhodəhoyi ń wo ɓa wó mi vnyinkwo ɓədo ń əmi aɓədagbmai, Əza Nugwnu ɓə wo əwohni vnyinkwo she wo ɓə jezeɓe dna n əwo latu n Dada latui n amaləka agyigyiyii nyai.

27 "Ɓəhnihni əmi nu gna fye, azaho gnyiagnyi zhilo ń ya n ɓa taa to əfyi wo m, akpəge ɓa kwu Shekwoyi əbemi gyewye."

28 Ń anyipyei nyimwanyimwa avnu shi Yeisu ɓə da aɓo ye, wa kwu Byitusu, Yohana n Jemyis yi n kwnusnu n woi, ɓa gwnukpe n əpe ɓa lo ɓə zhniaduwa. 29 Shi wo ɓə dna n aduwazhni, əwo awyeba ɓaa znubma, əwo aje ɓai shenaya ngye əgbmanabmya. 30 Aza ngwnu-aba, Mwusa n Iliyai, ɓa kpmiyazhi n bmyabmya latu nyai kpe, ɓai daɓo n Yeisui. 31 Ɓa da əwo kala la ɓo n anyì, ədo n wo ɓə ye wa nu kwo dna n Urishelima nyi. 32 Byitusu n əwo anugwnudoi ɓə zhi n agyeawyei n lului, ama əsa ń əgye ɓə la ɓa kpma vnyanya, ɓa gye əwo latu əwye n azai ngwnu-aba n ɓa ɓə kwnu agnyignyi zhi ń woi nyi. 33 Shi aza yi ɓə zhi ɓai kwukala n Yeisu aba, Byitusu wa gna wo, "Dagayi, kwo bmyalo ya kwu kpe n ya. Fa ya kpe alubwi ngwnu-ata; gbmanyi əho nya, gbmanyi Mwusa nya jesnu gbmanyi Iliya nya." (Wo to ɓə kpe əɓo əye n wo ɓə gnyi woi da m.)

34 Woi ye gnyi woi daɓo, ənyì kwa kpeya ɓe kwa kwu pwu ɓa, jesnu ədna kwa wo ɓa, shi ɓa ɓə lofyi n ənyì. 35 Bəgye kwa gbmiɓe n ənyì kwoi gna, "Əza ye nu zhni əmi Nugwnu, əza ń mi la knyí; fye kna wo tnubwa." 36 She bəgye ɓə kwu əɓo da, ɓa gye Yeisu n cegnyi əwo gbmanyi nu. Amwutuyi ɓa kwu ɓəye shi ɓahni jesnu to ɓa da zahozahoyi dna n sayi, əɓo n ɓa ɓəə kwu gyewye nyi m.

37 Ń fyegyizhii, she ɓa ɓə kazhi ɓe n əpe, deeji yaakwo kwa shegwnu wo. 38 Əzaho dna n deeji wa sáwyi, "Nyawuyi, mi gyi ho əwye, shi əmi nugwnu awye, ntuge əwo nu ɓwa əmi ɓyigba zhni. 39 Ase wna wo, wa fyiakwu n əsagbmanyii; kwa lo wo dna n kpəkpə, wa pwuafugya. Kwo ta ya wo əɓwa n pye m, jesnu kwo zhni wo agbma lo. 40 Mi kwu əho amwutuyi tnaɓwa nge ɓa gbmi kwo ya, ama ɓa to myi ń əkwo gbmiya m."

41 Yeisu wa dnaɓəgbe, "Əfye cala tnagaiciyaga n aɓoajegbmi nyai, mi ɓa kwnusnu n fyei əsa ngwnu aknyiyi nu a, jesnu mii ɓwa bwugba n fyei a? Ɓe mi n əho nugwnui n ya."

42 Kwo əsa n əɓyi yi ɓə gnyi woi ɓe Yeisu aba, ase ɓa shewoya shi n əknyi, dna n kpəkpə. Ama Yeisu wa gnaknyi ase, wa ka əɓyi yi gna jesnu waa wo ga əwo dada. 43 Ca wo ɓa əɓa vnyanya, ntu ikwo yaakwo Shekwoyi nya ɓo.

Shi əzahozahoyi ɓə ye gnyi n ɓəwowoi ntu aɓo vnyanya ɓo n Yeisu ɓə kwu zhni nyi, wa gna əwo amwutuyi, 44 "Fye kwu Atnubwakna cewo n əɓo n mi ye ma gna fye nyi: A ɓə la Əza Nugwnu ga dna n aza akwnu." 45 Ama to ɓa ɓwa awyega əɓo nya n wo ɓə zhninubwo ncei nyi m. A ɓə n kwoi ɓwu ɓa ɓwuɓwuyi, to ɓa myi ɓa wna əɓo ho tukwo shi m, ntuge ədna ɓə wo ɓa n ɓa ɓá nya wo əɓo yi nyi.

46 Aɓənakpeaje ɓa laka dna n amwutuyi atasni nge kwo nyika nu n ɓa, ɓə la zhni əza duduyi a. 47 Yeisu woi kpe əɓa aɓonubwozhni ye, wa la əɓyi nawyi wa wo gnyiagnyi ma əwohni. 48 Nlonu wa gna ɓa, "Əzadəhodəhoyi n wa gwo əɓyi nawyii ye dna n əmi əye, wo la mi gwo; jesnu əzadəhodəhoyi n wa gwo mi, wo la əza gwo n wo ɓə tnu ń mii nyi. Ntuge əza ń wo nu gnagbagbai lo n əfye vnyanya mi; əwo nu zhni duduyi."

49 Yohana wa gna, "Dagayi, yi kwu gye əzaho woi kwnu ase ya dna n əho əye, ya ye ya kpma wo, ntuge wo to kwnusnu lo n yii m."

50 Yeisu wa gna, "Fye to kpma wo m, ntuge əzadəhodəhoyi n wo ta gnyiapaapa lo n əfyei m, wo kwnusnu lo n əfyei."

51 Shi əsa ɓə la wo vyivyiwyi ń a ɓa la wo lo ncei n əshemi, Yeisu wa dna bwugba ntna doshna wa lo Urishelima. 52 Wa tnu atnutnudayi ɓa kwu gyiabye, ɓa lo ɓa lofyi ń Asamariyayi azhigba, ɓəə kwu aɓo wnaknazhi ga wo; 53 Ama aza n abaayi to ɓə gwo wo m, ntuge wo ɓə gnyi woi lo Urishelima nu. 54 She Jemyis n Yohanai əwo amwutuyi ɓə gye dəye, ɓa nyaɓo, "Dagayi, ho ncei pmalo ya yi əná ɓe ncei n əshemi kwa zhni ɓa agbma a?" 55 Ama Yeisu wa pmyi, wa gnaknyi ɓa. 56 Nlonu əwo n əwo amwutuyii ɓa lo əzhigba ədo.

57 Shi ɓa ɓə lo ɓai znazna lo n zokwoi, əzaho wa gna wo, "Mi ɓa vyi ho abahobahoi n ha lo."

58 Yeisu wa dnaɓəgbe, "Acamcam n aɓwoi lo jesnu alú n amai kpəlo, ama Əza Nugwnu too n abai lo n wo ɓa ya əwo tukwo shi m."

59 Wa gna əzado, "Vyi mi."

Ama əza yi wa dnaɓəgbe, "Dagayi, fa, ma lo mii la əmi dada byi kpa."

60 Yeisu wa gna wo, "Fa azafyí ɓa byi əɓa aza afyífyiyi, ama əho da, lo ho zhni waazi Shekwoyi əbemi nya."

61 Dudulonu əzado wa gna, "Dagayi, mi ɓa vyi ho; ama fa, ma jezelo mi kwu əmi apwuwada gnaami kpa."

62 Yeisu wa dnaɓəgbe, "Əza to lo ń wo la əɓwa tu n zukwo ofwa nya jesnu wa bmyawye; ń wo kwnuce lo wa zhni tnutnu dna n Shekwoyi əbemi m."