1 Nlonu Yeisu wa gna əwo amwutuyi ɓəsisi, nabai wa wu ɓa nge ɓa gwo ɓa zhniaduwa ciici jesnu to ɓa bmabwugba m. 2 Wa gna, "N əzhi ho, owadayi ɓə nyi ń wo to ɓə wo Shekwoyi ədna, kwo wa gye əwo anuwna ń aza aɓonubwozhnii m. 3 Nyigbayi ɓə dna ń əzhi yi ń wo ɓə la gyima, woi ɓe əwo aba woi tna wo əɓwa, ‘Gwo əmi ɓədá ga mi ń əmi nuwnuyi.’

4 "Kwaa əsa la to owadayi ye m. Ama n əwyihoi wa gna əwohni, ‘Kwo shikwonyi mi ta wo Shekwoyi ədna, kwo ma gye əmi anuwna ń aza ɓənubwozhnii m, 5 dudulonu ntuge nyigbayi ye gna mi gnagna lo ciici, mi ɓa gwo əwa ɓədá ga wo, nabai ń wo taa je ɓe wa gyi mi ce m!’ "

6 Dagayi wa gna, "Knatnubwa ha wo əɓo n owadayi tnagaiciyazhniyi da lo. 7 Shekwoyi taa ɓe n ɓədái ga əwo aza knyiknyiyi, ń ɓa ciɓwi kpe wo n nyipyei n sukwoi nyi m? Wo ɓa kwu ɓa fa zhi lonu? 8 Əmi nu gna fye, wo ɓa zhni ɓa ɓá ɓwa ɓədá n pyepyei. Dudulonu, əsa ń Əza Nugwnu ɓə jezeɓe, wo ɓə gye gaiciyaganunui ye nyi ń anyìi?"

9 Aza yi ń ɓa ɓə n agwumyii ń əɓa ɓəfyecezhni jesnu ɓai ci əzahozahoyi wyegba nyi; Yeisu wa gna ɓa ɓəsisi ye: 10 "Aza ngwnu-aba ɓə gwnulo Dagayipwuwa nabai ɓə zhniaduwa, zaknayi ɓə zhni Farisiyi nu, njesnu zabaayi gədu gwoyi. 11 Farisiyi wa laka gnyi n əwo əɓwai wa zhniaduwa nge: ‘Shekwoyi, mi sa ho ami lo ntuge mi to wulo ngye azaje nu m; avyì, aɓənukwoizhniyi, anagbáizhniyi; kwo ngye gədu gwoyi ye nu m. 12 Mi wnagbeshi anyipyei ngwnu-aba dna ń laadiɓwugyi, jesnu mii gbmi zaka nyahonyahoi nya n mi ncei lo.’

13 "Ama gədu gwoyi, wa laka gnyi n kpaai. To wa ye wa kpewyé wu n əshe m, ama wa znu agwu əɓwa wa gna, ‘Shekwoyi gye mi snusnu, mi zhni leifyizhniyi nu.’

14 "Əmi nu gna fye nge əza ye, toge əzadoyi m, wo ɓə laka n Shekwoyi awyeba wa lo əwo pwuwa ntna əɓəgyi n Shekwoyi aba. Ntuge aza vnyanya n ɓa mwa əɓahni tukwo, a ɓə gba ɓa, jesnu aza n ɓa gba əɓahni tukwo, a ɓə mwa ɓa."

15 Aza ɓə zhi ɓai ɓe Yeisu n aɓyii ce, nabai wa kpe ɓa əwo aɓwa. She amwutuyi ɓə gye dəye ɓa gnaknyi ɓa. 16 Ama Yeisu wa yì aɓyi ɓe ncei ń əwo aba wa gna, "Fye fa aɓyi anawyi ɓa ɓe əmi aba, jesnu fye to nya ɓa ya m, ntuge Shekwoyi əbemi zhni əɓa pya nya nu. 17 Ɓəhnihni mi nu gna fye, zahozahoyi n wo taa gwo Shekwoyi əbemi ngye əɓyi nawyii m, wo to ɓə lodna ń kwo m nanyinanyi."

18 Əbegyiyi ho wa nya wo əɓo, "Nyawuyi manai, knyiyi nu zhni ɓəshishi n mi ɓa zhni mii ɓwa wyewyeyi nyalonyalo nya?"

19 Yeisu wa dnaɓəgbe, "Knyiyi nu zhni hoi yi mi nge əza manai a? Əza manai to lo m; akpəge Shekwoyi gbmanyi. 20 Ho kpe aɓəgbetu əye lo: ‘Ho taa zhni anagbái m, ho taa wu əza m, ho taa wyivyi m, ho taa gbmi əɓo katá nya m, ga əho dada mwamwa n əho əyai.’ "

21 Wa gna, "Əɓa vnyanya ye, mi ɓə ya ɓa ɓwashi mi ye zhni əɓyikasa nu."

22 She Yeisu ɓə wo ɓə ye, wa gna wo, "Dudulonu ənya gbmanyi ye n hoi celo. Kwnu nyahonyahoi n ho ncei lo, jesnu ha kwu ga awyekwoyi, ho ɓə ɓwa nyaɓwayezhi n əshemi. Nlonu hoi ɓe, ha vyi mi."

23 She wo ɓə wo əɓo ye, wa ɓwa bwugbawnu n mwa, ntuge wo ɓəi zhni nyaɓwayi yaakwo nu. 24 Yeisu wa shi wo awye jesnu wa gna wo, "Gye kwo dnaɓo lo gyiwyeda woi lodna n Shekwoyi əbemi! 25 Ɓəhnihni, kwo gna wo lo faafa lakwnumi kwa du n acibwa a fa əza n wo n nyaɓwai lo woi lodna n Shekwoyi əbemi."

26 Aza ń ɓa ɓə wo əɓo ye ɓa nyaɓo, "To nyika nu ɓə pwo a?"

27 Yeisu wa dnaɓəgbe, "Əɓo ń kwo taa yezhni ń zanyikwocii m, kwo yezhni ń Shekwoyii."

28 Byitusu wa gna wo, "Yi kwu anya fa vnyanya ń yi ɓə ncei, yii vyi ho!"

29 Yeisu wa gna ɓa, "Gaiciya nu ń mi gna fye, əzaho to lo n wo la əwo pwuwa fa, kwo nyikwo kwo amajei n amapwii kwo azakwoi kwo aɓyi, ntu Shekwoyi əbemi ɓo, 30 n wo to ɓə ɓwa n aɓwai mwa bəgyé ngye she wa fa nsnu dna ń cala ye, jesnu n cala dəyi ń kwo ɓəlo nyi; wyewyeyi nyalonyalo nya m."

31 Yeisu wa pmyi Awoceaba zhi n gnagna wa gna ɓa, "Yi gwnulo Urishelima nu, jesnu nyahonyahoi ń sheɓəgwognayi ɓə kwu kafyi ń Əza Nugwnu tukwo, kwo ɓə kwu nu. 32 A ɓə la wo taya ga Abyedo, ɓa ɓə kpe wo agyè, ɓai knyi wo akpmi, ɓai knyiaknyi kpe wo; ɓai ɓyewoya ń knalufnyii jesnu ɓai la wo wu. 33 N nyipyei tayii, wo ɓə je kala la."

34 Amwutuyi to ɓa ɓwa awyega ɓəhoɓəhoi nya n ɓəye m. Əkwo ɓətukwo ɓə sosoi ń əɓa awyeba jesnu to ɓa kpe əɓo ye n wo ɓə gnyi woi da m.

35 Shi Yeisu ɓə wó vyivyiwyi n Jerikwoi, wyebwayi ɓə sase shi ń zokwogbe woi ɓanya. 36 Shi wyebwayi ye ɓə wo deeji kwoi duya ń əwo aba, wa nyaɓo ń kwo ɓə dnado. 37 Ɓa gna wo, "Yeisu Nazeretiyi nu duya."

38 Wa sáwyi, "Yeisu Dawuda Nugwnu, gye mi snusnu!"

39 Aza ń ɓa ɓə gyi ń abye nyi, ɓa gnaknyi wo ɓa gna wo nge wo la cepyi, ama wa gna əwyi ɓeɓe nu, "Dawuda Nugwnu, gye mi snusnu!"

40 Yeisu wa kpegnyi, wa ga əgbe nge a ɓe wo n əza yii. Shi wo ɓə ɓe vyivyiwyi, Yeisu wa nya wo əɓo, 41 "Knyiyi nu n ho ye ma zhni ga ho a?" Wa dnaɓəgbe,

"Dagayi mi ye ma gyewyeba."

42 Yeisu wa gna wo, "Gwo əho wyebagye, əho gaiciyaganunui kwo la ho kágna." 43 Nsayisayii, wa gwo əwo wyebagye jesnu wa vyi Yeisu, woi ci Shekwoyi. Shi aza vnyanya ɓə gye ce, əɓahni ce ɓa ci Shekwoyi.