1 Yeisu ɓə gnyi woi zhniaduwa ń əwyihoi ń abaho. She wo ɓə pwo, zaknayi ń əwo amwutuyi wa gna wo, "Dagayi, wu yi aduwazhni, n ɓwasnu she Yohana ɓə wu əwo amwutuyi nyi."

2 Wa gna ɓa, "Əsa ń fya zhniaduwa, fye gna:

" ‘Dada,

əho əye zhni gyigyiyi nu,

əho əbemi kwo ɓe.

3 Dna n nyipyei dəhodəhoi, ga yi nyagyi nya wyizo.

4 Zo yi əyi aleifyi,

shi əyihni ce yi zo əzahozahoyi abwi ń wo bwu yi.

Njesnu to ha lofyi n yii ń mwumwu m.’ "

5 Nlonu Yeisu wa gna ɓa, "Ń a gna ge ho n nugwnudoi lo, haa lo da wo dna ń sukwo sadu, haa gna, ‘Nugwnudo, ga mi biledi aknana ngwnu-ata ma mwi; 6 əmi nugwnudo, dna n əzna, wo la ɓe əmi aba, minyi to n nyagyii lo ń mi ɓa ga wo m.’ 7 Njesnu n a gna nge əza n wo dna n nyakwnu-mi nyi, wo dnaɓəgbe, ‘Tó gna mi gnagna m. Mi la kpakwo lu gwu, əmi aɓyi n əmii yi kwu gwnukpe ń gədo. Mi taa myi ma laka ɓe ma ga ho nyaho m.’ 8 Əmi nu gna fye, kwo shikwonyi wo taa laka ɓə ntuge wo zhni əwo nugwnudo nu m, dudulonu ntuge wo la shenugyi ntna vnyinkwo, ɓəhnihni wo ɓə laka wa ga wo biledi shi wo ye ńsnu."

9 Ntulonu mi gna fye: "Fye nyaɓo, a ɓa ga fye; fye znashni, fye ɓa ɓwa; fye jeaba, jesnu a ɓa gwu kpakwo ya ga fye. 10 Ntuge zahozahoyi ń wo nyaɓo, wo gwo; əza ń wo znashni, wo ɓwa; jesnu əza ń wo jeaba, a ɓa gwu aba ya ga wo.

11 "Nyika nu lo n fye, adada, n əwo nugwnu ɓa nya wo əbmya ɓo, wa ga wo owa nu ń əkwo əɓwi a? 12 Kwo ń wa nya wo pisezhi ɓo, wa ga wo napisi nu a? 13 Nlonu, ngye əfye, kwo shikwonyi, fye zhni aɓənukwoizhniyi nu, fye kpəlo shi fye ɓa ga əfye aɓyi anya amanai, fye kwu gna kpekpe nge, əfye Dada n wo dna n əshemi nyi, wo ɓa gna aza yi Zafnu Gyigyiyi gaga nu n ɓa nya wo əkwo əɓo nyi!"

14 Yeisu ɓə gnyi woi gbmi əse takpeɓəda nya ya. She əse yi ɓə gbmiya, takpeɓəda yi wa daɓo jesnu ca wo deeji.

15 Ama azaho ń ɓa, ɓa gna, "N Byelzebwulu kalái nu, ase əbeɓyi, ń wo gnyi woi kwnu ase ya ncei." 16 Azaje ɓa mwi wo ɓai nya wo əznù əɓo n kwo gbmi ń əshemi.

17 Yeisu ɓə kpé əɓa aɓo ɓənubwozhni wa gna ɓa: "Əbemi dəhodəhoi ń kwo la əkwohni gnajeya, kwo ɓa kwu zhniagbma; jesnu pwuwa ń kwo la əkwohni gnajeya kwo ɓaa myiya. 18 Ngye Shetam wo la əwohni gnaje woi snukwnú n əwohnii, əwo əbemi ɓa gnyiagnyi n wuna a? Mi gna fye dəye ntuge fya gná nge, mi kwnu ase ya n Byelzebwulu kalái nu. 19 Nsaiye, ngye mi kwnu ase ya n Byelzebwulu kalái nu, n nyikai nu ń əfye, avyiyi, kwnu ɓa ya ncei a? Ntulonu əɓa nu ɓə kwu zè əfye awadayi. 20 Ama ngye mi kwnu ase ya n Shekwoyi ɓwanyii nu, a gye Shekwoyi əbemi n la ɓe əfye aba.

21 "Əsa n əza kaláda, n okwnu akayai gwnuznu; n shi woi gwu əwo pwuwa, əwo nyaɓwa ɓa kwu pwo. 22 Ama əsa n əzado ɓe n du wo n akalá, waa je wo ń okwnui, jesnu waa myi n əwo əɓo, wo ɓə gwo əza yi akwnuakaya ń wo kpema ɓa nyi, jesnu woi kwú əwo okwnugyi nyaɓwa wa gnaya.

23 "Zahozahoyi n wo to kwnusnu lo n mii m, wo gnyiapaapa nu n mii, jesnu zahozahoyi n wo ta yezhi lo n kwnusnu n mii m, wo gná anya myi nu.

24 "She zafnu nukwoi gbmiya n əza, kwo zna laɓa ń zhabwikawu nu, kwoi zna ashnita aba shní, ama n kwo to ɓwa m, nlonu kwa gna, ‘Mi ɓa jezelo pwuwa ń mi ɓə gbmi nyi.’ 25 She kwo ɓə si, kwa gye pwuwa n fnyifnyiiya shi ń anyai wnakna. 26 Nlonu kwa lo kwa kwu azafnu anukwoi aje ngwnu-tnaaba n ɓa du əkwohni lo n əkpízhni, ɓa lofyi ɓa kwu fyi n ɓo. Əza yi anyìgyi kwaa gna kpmisnui wnuya."

27 Shi Yeisu ɓə gnyi woi da aɓo ye, nyikwoza ho wa gbmi əgbe dna ń deeji wa gna, "Anabəlikada nu n əyai ń wo ɓə ma ho wa shi ho nyi."

28 Yeisu wa dnaɓəgbe, "Kwo snusnu nu ge, anabəlikada nu n aza yii ń ɓa wó Shekwoyi ɓədagbma ədna jesnu ɓai shi kwo ɓwa nyi."

29 Shi deeji ɓə mwaɓe, Yeisu wa gna, "Cala akpizhniyi nya nu nyi. Kwo nya əznù nu ɓo, ama a taa ga kwo m, kwo gbmanyi, akpəge Yunana əznù. 30 Ngye shi Yunana ɓə la zè əznù ń Aninivayi aba nyi, ntulonu ce, ń Əza Nugwnu wo ɓaa zè əznù n cala ye aba. 31 Əsu nyikwo Snutakwo nya, ɓə laka gnyi n owadawyi n cala yei, woi znu kwo knyi; ntuge wo ɓə gbmi n anyiceshiba wa ɓe wa wo Sulemanu wyemwa ɓəda; ama nsaiye ənya n kwo du Sulemanu lo, gnyilo n ya. 32 Aninivayi ɓə kwukazhi n owadawyi n cala yei jesnu ɓai znu kwo əknyi, ntuge ɓa ɓə kwu yeabwi ntu Yunana waazi ɓo; jesnu nsaiye ənya n kwo du Yunana kwo gnyilo n ya.

33 "Əza to lo n wo wna pyitila əná waa kwo sodna m, kwo waa kwo kwnu papa m. Ama a ya kwo tu n əkwo kwnuyi nu, nabai aza n ɓa lo ɓe nyi ɓa gye bwuznagna. 34 Əho əwye nu zhni pyitila əho nayi nya. Əsa n əho awye bmyalo, əho nayi vnyanya ce nunui lo n bwuznagnai. Ama əsa n ɓa to bmyalo m, əho nayi vnyanya ce n nunui lo n wyegbmai. 35 Nlonu, nsaiye, la əwyewna n bwuznagna n kwo fyi n əho nyi, to kwa kwu zhni wyegbma m. 36 Ntucenu, ngye əho nayi vnyanya n nunui lo n bwuznagnai, jesnu səpa ho to lo n kwo n wyegbmai fyi m, kwo ɓaa ɓwagnyi ń nunui n bwuznagnai vnyanya nu, ngye shi pyitila kná bwuznagna ya kpe ho nyi."

37 Əsa n Yeisu ɓə la pwo ɓəda ɓo, Farisiyi ho wa yì wo nyagyi gyi n əwo pwuwa; ntulonu wa lodna jesnu wa myima n tebwul.

38 Ama ca wo Farisiyii she wo ɓə gye nge Yeisu to ɓə naɓwa kpa ɓa kpe nyagyi gyi m.

39 Nlonu Dagayi wa gna wo, "Əfye Afarisiyi zhna bwoɓyi ya n shnapaɓyii n əbmyi, ama n əmi fye nunui lo n fnanai ɓədo n əkpízhnii. 40 Əfye aza amama! Əza n wo ɓə zhni əbmyi nyi, əwo nu to ɓə zhni əmì ce m? 41 Ama nsaiye, fyè la əɓwa loya ga awyekwoyi, nabai nyahonyahoi n kwo fyi ń əfye əmi nyi, kwo ɓaa zè gyigyiyi.

42 "Owii n əfyei Afarisiyi, ntuge fye ga Shekwoyi zaka n əfye afnyitolo snidaí, fya gà agwuɓá, jesnu n əkna anyanunùyii vnyanya, ama fye kwu owafyecei ya, n Shekwoyi yeyei. Fye ɓə ɓa myi fya zhni kpmasnui ama to fya fa kpmisnuyi zhni ɓo m.

43 "Owii n fyei Afarisiyi, ntuge fye ye fya sase kpe n azayaakwo aba ń Ayahudiyibwokwnu ɓədo n gnaɓyi mwamwaga nyai n agnyikwota.

44 "Owii n əfyei, ntuge fye wulo ngye avnyigwo nu ń a too lú m, aza ɓai znazna kpe n kwo to ɓai kpe m."

45 Zaknayi ń owa agnayekpeyi wa dnaɓəgbe, "Nyawuyi, she ha da aɓo ye, ho kwu yi knyiakpmi cè."

46 Yeisu wa dnaɓəgbe, "Əfye owa agnayekpeyi, owii n fyei, ntuge fye kwu akaya ashnawoi kpe aza ń kwo dnaɓo lo ɓa shnishi, jesnu əfye n əfyehni fye ta dna əfye ɓwanyi lo nabai fya bma ɓa zhni m.

47 "Owii n əfyei, ntuge fye mi sheɓəgwognayi avnyigwo lo, ń əfye azakwoi nu ɓə wu ɓa nyi. 48 Ntulonu fyei gbmiɓo nge fye la əɓwatu ń aɓo ń əfye azakwoi ɓə zhni nyi; əɓa nu ɓə wu sheɓəgwognayi, jesnu əfye nu mi əɓa avnyigwo n kasnu. 49 Ntu dəye ɓo, Shekwoyi, dna n əwo wyemwa, wa gna, ‘Mi ɓa tnu ɓa n sheɓəgwognayii ɓədo n atnutnuloyii; azaho ń əɓa mi, ɓai kwú ɓa wu, ai fyi azaje n awyesnugbegye ɓo.’ 50 Ntucenu, a ɓə shi cala ye nu əɓwa, ntu sheɓəgwognayi vnyanya ami ɓo, n a la zeya nyi, ənya n kwo laka n anyì yayasa, 51 ənya ń kwo laka ń Habyila ami kwoi ɓe Zakariya ami, əza ń a ɓə wu dna ń bəgədi atasni n aba gyigyiyii nyi. Əə, əmi nu gna fye, aɓo shi cala ye nu ntu əɓa aɓəzhnizhni vnyanya ɓo.

52 "Owii ń əfye aba, owa agnayekpeyi, ntuge fye la ɓəyekpe nyagwunya lá. Əfye ń əfyehnii, fye too lofyi m, jesnu fyei ta fa aza lo n ɓa ɓə zhii ɓai lofyi nyi nge ɓa lofyi m."

53 Əsa n Yeisu ɓə gbmiya lo əbmyi, Afarisiyi n owa anyawuyii ɓa ya ɓai gnyiapaapa n woi n əwyei bmyibmyii jesnu ɓa nya wo aɓənyanya, 54 n zhi ɓai pmi nabai ɓa wna wo n ɓəho ń wo ɓa da.