1 N əwyihoi shi Yeisu ɓə gnyiagnyi gnyi n Genezareti nuwna-znudna əgbe, n deejii shegwnu wo zhi ɓai kna Shekwoyi ɓədagbma tnubwa. 2 Wa gye aya ngwnu-aba n kpe ń nuwnagbe, ń abmyawnayi n ɓa ɓə fyi ɓai zhna əɓa asa nyi, ɓəə ncei yakpe. 3 Wa lodna ń əya gbmanyi, ədo n kwo ɓə zhni Sima nya nyi, wa gna wo nge, wo la kwo ceta ya fyewyi ń ədnagbe kwa lo əmi ɓwa. Nlonu wa wunya n sase dna ń əya.

4 She wo ɓəə kwu ɓəda zo da, wa gna Sima, "Ye lo nuwna loloi ɓwa, ha shé əsa ya fyi ha wna abmya."

5 Sima wa dnaɓəgbe, "Dagayi, ya kwu tnutnu zhni n əwyei bmyibmyi dna n sukwo ye vnyanya, to ya wna nyahonyahoi m. Ama shikwonyi ho kwu gna lonu, mi ɓa shé əsa ya fyi."

6 She ɓa ɓəə kwu zhni nlonu, ɓa wna abmya n mwa bəgyé, kwa zhni əɓa asa kwa ya kwoi gbeya. 7 Ntulonu ɓa yi əɓa azabayi ń ɓa ɓə fyi ń əya baayi nyi, nge ɓa ɓe ɓa bma ɓa zhni, jesnu ɓa ɓe ɓa kwu aya ngwnu-aba nu n abmyai, kwa zhni aya yi ɓa ya ɓai shnì.

8 She Sima Byitusu ɓə gye dəye, wa ceakwokwo shi ń Yeisu apita aba wa gna, "Dagayi, la laka n əmi aba; ntuge mi zhni əza leifyida nu!" 9 Ntuge əwo n əwo azajei, ce ɓə kwu wo ɓa, ntu abmya bəgyé ɓo n ɓa ɓəə wna nyi, 10 jesnu nlonu, ca wo Sima atnutnu kwnuzhniyi, Jemyis n Yohanai Zebədi anugwnu.

Nsayi Yeisu wa gna Sima, "To wodna m; ənya n kwo laka nsaiye kwoi lo n abyei nyi, ho ɓa wna azanyikwoci nu." 11 Ntulonu she ɓa ɓə kwu əɓa aya gyikpe n əkpma, ɓa fa anya vnyanya ɓa vyi wo.

12 Yeisu woi ye dna ń əzhi ho, əzaho wa vyi wo lo, n wo ɓə n nayiwnu nyasnai n kwnukpe ń əwo nayi vnyanya. She wo ɓə gye Yeisu, wa ceakwokwo jesnu wa ɓa wo, "Dagayi, ngye ho ɓa ye, ho ɓa myi ha ga mi kágna."

13 Yeisu wa ta əwo əɓwa ya wa to wo əɓwa. Wa gna, "Əmi ɓəye nu, gwo kágna!" Nsayisayii, nayiwnu nyasna kwa fa wo.

14 Nlonu, Yeisu wa tu wo əgbe, "To gna zahozahoyi m, ama lo, ho wu əhohni tukwo n Pirisiti aba jesnu ha ga anya n Mwusa ɓə tugbe, ntu n əfye pmyapmya ɓo nyi, kwaa zè ɓəgbmi ga ɓa"

15 Dudulonu, əwo anabagyi kwa gna lalapwi nu, kwa zhni deeji yaakwo ɓa yezhi ɓa kna əwo ɓəda tnubwa jesnu wa ká ɓa gna n əɓa anyasna. 16 Ama, Yeisu ɓə zhni waa wyiya, ciici woi lo zhabwi woi zhniaduwa ga Shekwoyi.

17 N əwyihoi Yeisu ɓə gnyi woi wunya, Afarisiyi n owa anyawuyii ɓə sase kpe ń ɓo. N ɓa ɓə kwnuɓe ń azhigba dəhodəhoi n Gəlili n Yahudiyai n Urishelimai. Jesnu Dagayi kalá ɓə kwnusnu ń Yeisui ntuge wa ká anyasnai gna. 18 Azanugbai ho ɓa ɓe ń əzai nayi-fyifyiyidai latu ń pəce, ɓa zna aba shni, ɓa lo ɓe n woi ń pwuwa yi, ɓa ya wo shi ń Yeisu abye. 19 She ɓa to ɓə ɓwa zokwo ń ɓa ɓá zhni nlonu m, ntu deeji ɓo, ɓa gwnukpe ń nyakwnushe, ɓa kpe nyakwnushe ya jesnu ɓa shni wo lo ncei ń tu əwo pəce, shì ń deeji atasni jesnu ń Yeisu abye gaaga.

20 She Yeisu ɓə gye əɓa gaiciyaganunui, wa gna, "Nugwnudo, a kwu əho aleifyi zo ho."

21 Afarisiyi n owa anyawuyii ɓa ya ɓai zhni ɓənubwo fyi n əɓa mi, "Nyika nu gnyi ń əza yei woi da atukwopmi ɓo a? Nyika nu ɓa myi wa zo aleifyi ń Shekwoyi nu to ɓwasnu ma a?"

22 Yeisu ɓə kpe əɓo n ɓa ɓə zhi ɓai zhninubwo ncei jesnu wa nya ɓa əɓo, "Knyiyi nu zhni fyei zhni aɓo ye nubwo fyi n əfye adu a? 23 Knyidei nu gna wo lo faafa: a gna, ‘A kwu əho aleifyi zo ho,’ kwo a gna, ‘Laka gnyi ha znazna a?’ 24 Ama mi ncei pmalo fya kwu kpe nge Əza Nugwnu n ikwoi lo dna ń anyì wa zo aleifyi." Ntulonu, wa gna əza ń nayi ɓə n woi fyifyiyi nyi ge, "Mi gna ho, laka gnyi, kwu əho apəce, ha lo əho pwuwa." 25 N əsayisayii, wa laka gnyiagnyi ń əɓa abye, wa kwu ənya ń wo ɓə yatu n kwo nyi jesnu wa lo əwo pwuwa woi ci Shekwoyi. 26 Ca wo zahozahoyi jesnu ɓa ci Shekwoyi. Ɓa kwu nu zhi n ɓəwowoi jesnu ɓa gna, "Yi kwu aɓoawowoi gyewye nnaiye."

27 N dəye avnu, Yeisu wa gbmiya lo əbmyi wa gye gədugwoyi, n sasetu ń agədu gwo aba, ai yi wo nge Levyi. Yeisu wa gna wo, "Vyi mi." 28 Levyi wa laka gnyi, wa fa nyahonyahoi jesnu wa vyi wo.

29 Nlonu Levyi wa pa nyagyigyi agbmada yaakwo nya, ntu Yeisu ɓo, dna ń əwo pwuwa, jesnu agədu gwoyi bəgyé n azajei ɓa kwnu nyagyi gyi n ɓai. 30 Ama Afarisiyi n owa anyawuyi n ɓa ɓəə fyi ń əɓa okwu nyi, ɓa ɓe n awyicei, ń əwo amwutuyi aba nge, "Knyiyi nu zhni fyei gyi jesnu fyei sni n agədu gwoyii n aleifyidai a?"

31 Yeisu wa dna ɓa ɓəgbe, "Lafyiyada ta zna shigbeda shni m, ama nyasnayi. 32 Mi to ɓe ma yi aɓəfyeceyi nu m, ama aleifyida, ɓa ɓe ɓa yeabwi."

33 Ɓa gna wo, "Yohana amwutuyii wnagbe lo ciici ɓai zhniaduwa, nlonu cè n Afarisiyii amwutuyi, ama əho anya da, ɓa laɓa lo ɓai gyi, ɓai sni."

34 Yeisu wa dnaɓəgbe "Fye ɓa zhni mwulaɓa anugwnudo ɓa wnagbe əsa n wo ye kwnusnu lo n ɓai? 35 Ama əsa ɓe lo, she a ɓə la mwulaɓa la ń əɓa ɓa, fyi ń anyipyei yi ɓa ɓə wnagbe."

36 Wa si ɓa ɓəsisi ye: "Əzaho to lo n wo sá əje woiwoi wa gwùta n əje-kwokwoi m. N wa zhni nlonu, əje woiwoi ɓə kpé n əje kwokwoi ətagwu, jesnu əje-kwokwoi ɓə la gna sasaya. 37 Jesnu əzaho to lo ń wo fyi anamnuwna woiwoyi ń anamnuwna apa-pwakwnu kwokwoi m. N wa zhni nlonu, anamnuwna woiwoi ɓaa anamnuwna apa-pwakwnu kwokwoi cepwo; anamnuwna ɓə la pwuya, jesnu anamnuwna apa-pwakwnu ɓə kwu zhniagbma. 38 Aawo, ɓəshishi nu a fyi anamnuwna woiwoi n anamnuwna apa-pwakwnu woiwoi. 39 Njesnu əzaho to lo, n wo kwu anamnuwna kwokwoi sni n wo ɓa ye wa sni woiwoi m, ntuge ɓa gna ge, ‘Kwokwoi gnabmya lo.’ "