1 N Sibyiwyi hoi, she Yeisu ɓə lo nyagyi gyi dna ń Farisiyi zayaakwo pwuwa, ɓa kwu zhi ɓai dna wo əwye pəceye. 2 Əzaho ɓə gnyi n əwo abye woi gyeazhnì n nayi snusnui n duwyi. 3 Yeisu wa nya Afarisiyi əɓo ɓədo n owa gnayekpeyi, "Owa ncei ye lo nge a ká əza gna n Sibyiwyii kwó kwo to ncei ye lo ma a?" 4 Ama ɓa kwu cepyi. Ntulonu she wo taɓwashi əza yi, wa ká wo gna jesnu wa kwu wo gnami.

5 Nlonu wa nya ɓa əɓo, "Ngye əzaho n fye ń əɓyii lo kwo nakwo, kwaa kaya dna ń lizhiya n Sibyiwyii, wo taa gbmi kwo ɓə ncei ń əsagbmanyi m?" 6 Njesnu to ɓa ɓwa ɓəho ń ɓa ɓá da m.

7 She wo ɓə kwu gye shi azhiɓeyi tnu aseseba adnagbmai kpe ń tebwul, wa si ɓa ɓəsisi ye: 8 "She əza pa ho amwula awyefna, to lo ho sasetu ń aseseba adnagbmai m, kwo ɓa yezhni nge əza n wo du ho lo n mwamwa, a ɓə kwu kwo pa wo ce. 9 Ngye kwo lo nlonu, əza n wo ɓə pa fye awyefna nyi, wo ɓə ɓe wa gna ho, ‘Ga əza ye əho aseseba.’ Nlonu dna n vnyinkwo, ho ɓə lo aseseba n kwo gnagbagbai. 10 Ama she a pa ho awyefna, lo ho sasetu n aseseba gbàgbài, nabai she awyefnada ɓə ɓe, wo ɓə gna ho, ‘Nugwnudo, ɓe ha gwnulo aseseba adnagbmai.’ Nlonu a ɓə ga ho mwamwa n əho azhiɓeyi aje awye vnyanya. 11 Ntuge aza yi vnyanya n ɓa mwa əɓahni tukwo nyi, a ɓa gbà ɓa, jesnu aza yi n ɓa gbà əɓahni tukwo nyi a ɓə mwa ɓa."

12 Nlonu Yeisu wa gna əza n wo ɓə yi wo nyagyi gyi nyi, "She ho yi aza nyipyeinyagyi gyi kwo wyeshenyagyi gyi, to yi əho anugwnudo, əho azaje, əho əbye kwo əho akwnuzhiyi anyaɓwayi m; n ha zhni nlonu, ɓa ɓə ka hohni yi cè, ntulonu a ɓə kwu əta gba ho. 13 Ama she ho yi nyagyigyi, yi awyekwoyi, azabmazhi, apita shásháida ɓədo n awyebwayii, 14 jesnu ho ɓə ɓwa anabəlika. Kwo shikwonyi ɓa taa myi ɓa gba ho əta m, a ɓə gba ho n aɓəfyeceyi əfyikalakwu əsai."

15 She zaknayi, dna ń aza yi atasni n ɓa ɓə kwnu asese kpe n woi n tebwul nyi, ɓə wo əɓo ye, wa gna Yeisu, "Əza anabəlikada nu ń wo ɓə gyi nyagyi gnyi ń awyefnaba dna ń Shekwoyi əbemi."

16 Yeisu wa dnaɓəgbe, "Əzaho ɓə gnyi woi ye əwohni, wa yì nyagyigyi yaakwo, jesnu wa kwu kwo pa azhiɓeyi n mwa bəgyé. 17 Shi nyagyi gyi yaakwo əsa ɓə la si, wa tnu əwo tnutnuyi woi gna aza yi ń wo ɓəə kwu pa ɓa nyi, ‘Fye ɓe ntuge a kwu ɓəhoɓəhoi zozhni.’ 

18 "Ama əɓa vnyanya ngye ɓa pagbe, ɓa ya ɓai ɓe n aɓəzei. Əza kpmisnuyi wa gna, ‘Mi ye ɓwa əknyi si nu, jesnu ɓəshishi nu ma lo mii gye əkwo əwye. Sukwu, fye la əmi əɓwa gbmiya nce.’ 

19 "Əzado wa gna, ‘Mi ye ɓwa anakwo ofwanu nya si nu, akwu ngwnu-atnu, mi lo ń zokwo nu mi kwu ɓa tumwi. Sukwu fye la əmi əɓwa gbmiya nce.’ 

20 "Əzado wa dudu wa gna, ‘Mi ye ɓwa amwula pa nu, ntulonu mi taa myi n ɓe m.’

21 "Tnutnuyi yi wa jezeɓe wa wu əwo pwuwada əɓo ye. Nlonu, pwuwada wa gyi minagyi jesnu wa ga əwo tnutnuyi əgbe, ‘Gbmilo wolowolo ha vyi adnadna n afyefyei əzhiyaakwo nya, lo ho ɓe n awyekwoyii, azabmazhi, awyebwayi n apita sháshái dai.’

22 "Tnutnuyi yi wa gna, ‘haamwasa, əgbe ń ho ɓə ga nyi, a kwu kwo zhni, ama aba ye celo n a ɓə ye fyi aza.’

23 "Nlonu Dagayi wa gna əwo tnutnuyi, ‘Gbmi lo azokwo ɓədo n azhigba azokwoi, hoo lo ɓe n ɓai n akalái, nabai əmi pwuwa kwaa nu. 24 Əmi nu gna ho, zaknayi to lo ń aza yi ń a ɓə kwu kwo pa ɓa nyi, n wo ɓə to əmi nyagyi wo m.’ "

25 Adeeji yaakwo ɓə lo ɓai znazna n kwnusnu n Yeisui, she wo ɓə bmyawye shi ɓa, wa gna: 26 "Ngye əza lo ń wo ye wa vyi mi, ama wo ta ye lo wa wnunu n əwo dadai, n əwo əyai, əwo nyikwo n aɓyii, əwo aje n amapwii; əə, kwo əwohni wyewyeyi m; əza yi pya taa zhni əmi mwutuyii m. 27 Njesnu əza ń wo to lá əwohni znudu shi waa vyi mi m, wo taa zhni əmi mwutuyii m.

28 "Ń a gna nge əzaho ń fye, ncei pmalo wa mi nyakwnu gwnúkpeaje. Wo taa sase shi nu kpa, wa kwu əkwo mimi gyiwye kwaje, wa gye ngye wo n gyiwyei lo n kwnuce ń wo ɓa myi wa gwnu kwo m? 29 Ntuge ń wa shi nyakwnu shnipa, to wa myi waa gwnù kwo m, əzahozahoyi n wa gye kwo, wo ɓa ci wo aɓo, 30 woi gna, ‘Əza ye ɓə ya nyakwnu mi, ama to wa myi wa gwnù kwo m.’

31 "Kwo n a gna nge, əsu ncei pmalo wa lo okwnu n əsu ədoi. Wo taa sase shi nu kpa, wa gye kwo wo ɓa myi ń okwnusnu n əwo akwnuyii dugwu ngwnu-awo, n əsu ədoi, ń wo ɓe okwnusnu n woi n akwnuyii dugwu shiiba nyi m? 32 Ngye wo taa myi m, wo ɓa fyi aza ɓa lo, ɓai shegwnu əsu dəyi, wo yee ɓe ń zokwo n kpaai, jesnu wo ɓə nya ogwuwnazhi zokwo əɓo. 33 N ɓwasnu lonu ce, zahozahoyi ń fye, ń wo to kwu nyahonyahoi fa ń wo ncei lo m, wo taa myi wa zhni əmi mwutuyi m.

34 "Snakpegye n bmya, ama ń əkwo apmanya nla kwnuya, a ɓa zhni ń wunanu kwa je əkwo apmanya ɓwa a? 35 Kwo to n apmai lo ntu əknyi ɓo kwo fnyidakwulu m; a ɓa zè kwo ya nu.

"Zahozahoyi ń wo n atnubwai lo, akpəge wo wo."