1 She Yeisu ɓə la pwo aɓo ye da ɓo vnyanya ga aza n ɓa ɓə zhi ɓai knatnubwa nyi, wa lodna ń Kapanam. 2 N abaayi, bəzhetagyida tnutnuyi, əza ń əwo dagayi ɓə n əwo apmai dəidəi, wo ɓə shi n nyasnai, n shi n əfyi əgbe. 3 Bəzhetagyida, wa wo Yeisu əɓo, wa tnu n Ayahudiyi abyedai n əwo aba, ɓa gyiwye nge wo ɓe wa ká əwo tnutnuyi gna. 4 She ɓa ɓə si Yeisu aba, ɓa ɓa wo n əwyei bmyibmyii, "Əza ye n kwnuce lo ha zhni wo əɓo ye, 5 ntuge wo ye lo n əyi əknyii jesnu wo lá Ayahudiyibwokwnu mi yi." 6 Ntulonu, Yeisu wa kwnulo n ɓai.

Wo to ɓə ye mwakpa n pwuwa yii m, bəzhetagyida wa tnu n əwo anugwnudoi ɓa lo ɓə gna wo: "Dagayi, to gna əhohni gnagna m, ntuge mi to kwnuce lo ha ɓe əmi pwuwa m. 7 Cenu naa zhni to mi nyi gye əmihni kwnuce ma ɓe da ho m. Ama da ɓədagbma, jesnu əmi tnutnuyi ɓa ɓwa kágna. 8 Ntuge əmi n mihni, mi zhni ikwoda nu, n akwnuyii fyi n əmi akwnu. Mi gna əza ye, ‘Lo,’ wa lo; əza yi, ‘Ɓe,’ wa ɓe. Mi gna əmi tnutnuyi, ‘Zhni ɓəye,’ wa zhni kwo."

9 She Yeisu ɓə wo əɓo ye, ca wo wo, jesnu wa pmyiawye shi bəgyé n kwo ɓə ɓe kwoi vyi wo nyi, wa gna, "Əmi nu gna fye, mi too ɓwa gaiciyaganunui yaakwo ye pya kwo dna ń Israila m." 10 Nlonu aza ń a ɓə tnu ɓa tnutnu nyi, ɓa jezelo apyi ɓa gye tnutnuyi wo la kágna ɓwa.

11 Ń əkwo avnu, əsa fyewyi, Yeisu wa lo əzhi ń a yi kwo nge Nenyi nyi, əwo amwutuyi ɓədo n deeji yaakwoi ɓa kwnulo n woi. 12 Shi wo ɓə wo vyivyiwyi n əzhi yi adubai, a ɓə gnyi ai gbmiya lo n zafyii nu; əɓyinugbai, əwo əya ɓyigba, jesnu əwo əya ɓə zhni nyigbai nu. Deeji yaakwo ɓai kwnu ɓe n əzhi yi n kwnusnu n woi. 13 She Dagayi ɓə gye wo, əwo snusnu kwa wna wo, jesnu wa gna wo ge, "To ciɓwi m."

14 Nlonu wa yegwu, wa to zafyi acakpa ɓwa, ń ɓa ɓə n woi tu nyi; jesnu əwo ashiyi ɓa kwu kpezhi pyi. Wa gna ge, "Əɓyikasa, mi gna ho, laka!" 15 Zafyi yi wa laka tu ń ase, wa ya ɓəda da, jesnu Yeisu waa wo ga əwo əya.

16 Əɓa vnyanya ɓa kwu nu zhi n ɓəwowoi jesnu ɓa ci Shekwoyi. Ɓa gna, "Sheɓəgwognayi yaakwo ń la kpeyaɓe dna ń əyi atasni. Shekwoyi wo la ɓe wa bma əwo aza zhni." 17 Yeisu nabagyi ye, kwaa lapwi fyi ń Yahudiya n azhii ń ɓa shegwnu kwo nyi.

18 Yohana amwutuyi ɓa kwu aɓo ye gna wo vnyanya. She wo ɓə yi əɓa ngwnu-aba, 19 wa tnu ɓa tnutnu lo ncei n Dagayi aba, ɓəə nya wo əɓo, "Əho nu zhni əza n wo ɓəlo nyi, kwo yi tuwye n əzado nu gbowo a?"

20 She ɓa ɓə ɓe Yeisu aba ɓa gna, "Yohana Batizimazhniyi nu naa tnu ń yii ya nya ho əɓo, ‘Əho nu zhni əza n wo ɓe lo nyi, kwo yi tuwye n əzado nu gbowo a?’ "

21 Dna ń əsayi, Yeisu wa ká bəgyé gna ń ɓa ɓə n agwnumai, n anyasnai ɓədo n azafnu nukwoi, jesnu waa awyebwayi bəgyé kágna n əɓa awyebwa. 22 Ntulonu wa dna atnutnuyi ɓəgbe, "Fye jezelo fye gna Yohana aɓo ń fye kwu gyewye jesnu n fye kwu wo: Awyebwayi ɓai gyewyeba, azabmazhi ɓai znazna, anayiwnuyi ɓai ɓwa kágna, atnubwagwunayi ɓai wo atnubwaɓo, ai kwu azafyí kala, jesnu ai da nabagyi manai ga asnayi. 23 Anabəlikada nu n zahozahoyii ń wo to cebwonyi ntu əmi ɓo m."

24 Əsa ń Yohana atnutnuyi ɓəi kwuka, Yeisu wa ya ɓəda n deejii ntu Yohana ɓo: "Fye ɓə lo zhabwikawu fye gye knyiyi nu a? Anuwnaje nu ń əse pmyi ɓa laɓa nyi? 25 Ngye nlonu to m, fye ɓə kwnuya lo fyei gye knyiyi nu a? Əza nu n aje amanai kpe? Aawo, aza yi ń ɓa kpe aje anakwoi jesnu ɓai ye agbmada nyi, ɓa fyilo ń agalukwo nu. 26 Ama knyiyi nu n fye ɓə kwnuya lo fyee gyewye a? Sheɓəgwognayi nu? Əə, əmi nu gna fye, jesnu n du sheɓəgwognayi. 27 Əza nu nyi ń aa n ənyai kafyilo tu ń əwo tukwo:

" ‘Mi ɓə tnú n əmi tnutnudayii, woi la gyilo ń əho abye,

əwo nu ɓə zhni əho zokwo hoi ɓe ɓo.’

28 Mi gna fye, fyi ń aza yi ń anyikwoza ɓə ma nyi, əzaho to lo n du Yohana ń əɓa mi m; dudulonu, əza ń əwo nu gnagbagbai lo dna ń Shekwoyi əbemi wo du wo lo."

29 (Aza vnyanya, kwó du n agədu gwoyii, shi ɓa ɓə wo Yeisu ɓədagbma, ɓaa kwo gwo nge Shekwoyi zokwo nu zhni manai, ntuge Yohana nu ɓə zhni ɓa batizima. 30 Ama Afarisiyi ń owa aɓəyekpeyii, ɓaa Shekwoyi ɓəmwi aɓəna, ntu əɓahni ɓo, ntuge Yohana nu to ɓə zhni ɓa batizima m.)

31 Yeisu wa gwodu wa gna, "To, mi ɓa mwi cala ye do n knyiyi nu a? Ɓa wulo n wunanu a? 32 Ɓa wulo ngye aɓyi nu ń ɓa sase kpe ń adubayaakwo ɓai yi aje:

" ‘Yi kwu mwayí bye ga fye,

to fya nyanya m;

ya kwo aka-anyí,

to fya zhni bwugbazhii m.’

33 Ntuge Yohana batizimazhniyi ɓə ɓe to woi gyi nyagyi kwo woi sni anamnuwna m, fya gna, ‘Wo n asei lo.’ 34 Əza Nugwnu ɓə ɓe woi gyi, woi sni, fya gna ge, ‘Fnanada nu gnyi ń ya, ɓədo n nyasniyii, agədu gwoyi nugwnudo n aleifyizhniyii.’ 35 Ama a kpe wyemwa bmyabmya əye n əkwo aɓyi nu vnyanya."

36 She zaknayi ń Afarisiyi ɓə yi Yeisu wyeshenyagyi gyi, wa lo Farisiyii pwuwa, waa sasetu n myima n tebwul. 37 Nyikwoza ho ń əzhi yi, ń wo ɓəə kwu anyìgyi dna n leifyizhni, ɓə kwu kpe ge Yeisu dnalo woi gyi nyagyi ń Farisiyi pwuwa, ntulonu wa ɓe abaayi n alabasta lúulúu ɓyiyi əmisnidaí shi. 38 Shi wo ɓə gnyi ń əwo avnu ń əwo apita aba woi ciɓwi, she wo ɓə ya, wa kwu Yeisu apitabwada bwudo n əwo awyenyii. Nlonu wa wnu ɓa ya n əwo tukwoyii, wa to Yeisu apitabwada n əwo əgbei, jesnu wa zè əmisnidaí kpe n ɓa.

39 She Farisiyi ń wo ɓə yi wo nyagyi gyi nyi ɓə gye dəye, wa da fyi ń əwo əmi, "Ngye əza ye ɓə gna wo zhni sheɓəgwognayi nu, wo ɓə ɓa kwu əza kpeye n wo to wo əɓwa nyi, jesnu nyikwoza pya n wo zhni; nge wo zhni leifyizhniyi nu."

40 Yeisu wa dna wo ɓəgbe, "Sima, mi n ɓəhoi lo ma gna ho."

Wa gna, "Nyawuyi, gna mi."

41 "Aza ngwnu-aba ɓə n ətai shi gyiwyemwigayi ho. Zaknayi ɓəi n ətai shi wo denari tagyi ngwnu-atnu, əzabaayi, shiitnu. 42 Əzaho to ɓə nyì n ɓa, n wo ɓə ɓa shni əwo əta yi gba m, ntulonu gyiwyemwigayi wa kwu gyiwye yi fa ga ɓa. Nsaiye nyika nu ń əɓa ngwnu-aba, n wo ɓa gna wo ye a?"

43 Sima wa dnaɓəgbe, "Mi zhninubwo nge, əza n a fa gyiwye ga wo n du nyi."

Yeisu wa gna wo, "Ho la ɓəda znuya dəidəi."

44 Nlonu wa pmyiawye shi nyikwoza yi wa gna Sima, "Ho kwu nyikwoza ye gyewye? Ma lo ɓe əho pwuwa. Ho to ga mi nuwna ntu n əmi apita ɓo m, ama wo kwu əmi apitabwada bwudo n əwo awyenyii, jesnu wo nyi wnu ɓa ya n əwo tukwoyii. 45 Ho to shepma mi, yeye nya m, ama nyikwoza ye, she ma lodna ń ya, wo too fa əmi apitabwada əgbe to ɓo m. 46 Ho to kpe mi tukwo omi m, ama wo kwu əmisnidaí kpe n əmi apitabwada. 47 Ntucenu, mi gna ho nu ge, a kwu əwo aleifyi bəgyé zo wo; ntu əwo yeye yaakwo wu ɓo. Ama əza ń a zo wo aleifyi fyewyi, wo wu yeye fyewyi nu."

48 Nlonu Yeisu wa gna nyikwoza yi ge, "A kwu əho aleifyi zo ho."

49 Azhiɓeyi aje ɓa ya ɓai daɓo n ajei ɓahniɓahni, "Nyika nu gnyi ń əza yei ya, woi myi woi zo əza aleifyi a?"

50 Yeisu wa gna nyikwoza yi, "Əho gaiciyaganunui kwo la ho gnyiya, lo n bwugbafui."