1 Dna ń əye awocei tnuuyi Tiberiyas Kaisa əbegyi nya; əsa n Byilatusu Pwontus ɓə zhni gwomna tu n Yahudiya, Hiridusu woi gyibe tu ń Gəlili, əwodo Fyilibwus woi gyibe tu ń Ituriya ɓədo n Tarakwonitisii, Lisaninyas woi gyibe tu ń Abyileni; 2 əsa ń Anas ɓədo n Kayafasii ɓa ɓə zhni apirisiti adnagbmai, Shekwoyi ɓədagbma kwa ɓə da Yohana Zakariya nugwnu dna ń zhabwikawu. 3 Wa zna laɓa n azhigba vnyanya n ɓa ɓə she Urudu gwnu, woi zhni waazi batizima abwuye nya ntu n aleifyi zo ɓo. 4 Ngye shi kwo kafyilo n aɓədagbma pafyi sheɓəgwognayi Ishaya nya:

"Əza bəgye dnawyi lo dna ń zhabwikawu,

‘Zhni zokwo ga Dagayi,

la awogye tacé ceewo ntu n əwo ɓo.

5 Dnabminu dəhodəhoi á ɓə kwu kwo nu,

ape n atutului, ai la ɓa ɓaya.

Azokwo aknaknai ai laɓa tacé,

ai kwu azokwo ɓwokwnu nu.

6 Azanyikwoci vnyanya ɓa ɓəə gye Shekwoyi gnyignyi əwye.’ "

7 Yohana wa gna deeji ń ɓa ɓə kwnuɓe nge wa zhni ɓa batizima nyi, "Əfye agbezhi aɓyi! Nyika nu na kwnù fye nge fye bwusi n Shekwoyi minagyi napyei n kwo ɓe lo nyi a? 8 Fye wu alu abwiye nya. Jesnu fye to gna əfyehni, ‘Yi n Ibrahim lo n zhni əyi dada m.’ Ntuge əmi nu gna fye nge, Shekwoyi ɓa myi wa kwu aɓyi kala zhi ga Ibrahim n akwuta ye. 9 A la gbakwnu lu la tu ń ashnuwna gbegye, shnuwna dəhodəhoi ń kwo to ga gyigyi manai m, a ɓə znu kwo ya shi, jesnu ai la kwo sheya dna n əná."

10 Deeji kwa nyaɓo, "To knyiɓei nu n yi ɓa zhni a?"

11 Yohana wa dnaɓəgbe, "Əza n wo n ajei lo ngwnu-aba, wo knyi ga əza n wo to ncei lo m, jesnu əza n wo n nyagyii lo, wo ce ga əza n wo to ncei lo m."

12 Agədu gwoyi ce, ɓa ɓe nge a zhni ɓa batizima. Ɓa nyaɓo, "Nyawuyi, knyiɓei nu n yi ɓa zhni a?"

13 Wa gna ɓa, "Fye to gwo n dutu shi a gna fye gwo m."

14 Nlonu akwnuyi ho ɓa nya wo əɓo, "Əyihni ce, yi zhni n wunanu a?"

Wa dnaɓəgbe, "Fye to fna aza gyiwye n akalái kwo fya kpe aza aɓo akatá nya m; əfye apyáshe-gyiwye ɓa kwu fye kwnuagbma."

15 Aza ɓə zhi ɓai pmi n awyetui, jesnu əɓa vnyanya ɓai saaɓo fyi n əɓa adu; kwo a ɓa kwu gye ge Yohana nu zhni Kirisiti. 16 Yohana wa dnaɓəgbe ga əɓa vnyanya, "Mi zhni fye batizima n nuwnai nu. Ama əzado ɓəə ɓe n wo du mi lo n kalá, əwo abwada abma mi to kwnuce lo ma lo ɓa ya m. Əwo nu ɓəə zhni batizima n Zafnu Gyigyiyii ɓədo ənái. 17 Əwo fnyitala àpmana pyeya nya, kwo dnalo ń əwo akwnu, wa zhni əvye aba, jesnu wa ye alikama fyi n əwo dobwi, ama wo ɓə dna əsní əná n ənái n kwo taa shna wnu m." 18 Nlonu n aɓədagbma ajei n mwa, Yohana wa myì aza zhi jesnu wa zhni ɓa waazi nabagyi manai nya.

19 Ama she Yohana ɓə gnaknyi Hiridusu, gwomna, ntu əwo mwulapa ɓo n Hiriduya əwodo nyikwo, ɓədo n aɓənukwoi ajei vnyanya n wo ɓəə kwu zhni nyi, 20 Hiridusu waa aɓo ye yegwnuaje vnyanya: wa wna Yohana, waa wo gwudna n zhalu.

21 She a ɓə gnyi ai zhni aza vnyanya batizima, a kwu batizima zhni Yeisu cè. Jesnu shi wo ɓə gnyi woi zhniaduwa, əshemi kwa gwuya 22 Zafnu Gyigyiyi wa shnizhi tu n Yeisu ngye lukpe. Jesnu a wo bəgye kwa gbmiɓe n əshemi: "Əho nu zhni əmi Nugwnu, əza n mi ye wo; n əhoi nu n mi ɓwa agbmada."

23 N əsa ye, Yeisu n əwohni tukwo, wo ɓəə kwu aye ɓwa ngye shiita nu, əsa ń wo ɓə ya əwo ɓəvyitnutnu nyi. A ɓə zhninubwo nge wo ɓə zhni Yusufu nugwnu nu, Heli nugwnu, 24 Matati nugwnu, Levyi nugwnu, Melki nugwnu, Janai nugwnu, Yusufu nugwnu, 25 Matatiyas nugwnu, Amosu nugwnu, Nahum nugwnu, Elsi nugwnu, Naggai nugwnu, 26 Maati nugwnu,

Matatiyas nugwnu, Semein nugwnu, Josek nugwnu, Joda nugwnu, 27 Jowana nugwnu, Resa nugwnu, Zerubabel nugwnu, Shetiya nugwnu, Neri nugwnu, 28 Melki nugwnu, Addi nugwnu, Kosam nugwnu, Elmadam nugwnu, Er nugwnu, 29 Joshuwa nugwnu, Eliyaza nugwnu, Jorim nugwnu, Matati nugwnu, Levyi nugwnu, 30 Simyiyon nugwnu, Yahuda nugwnu, Yusufu nugwnu, Jonam nugwnu, Eliyakim nugwnu, 31 Meliya nugwnu, Mena nugwnu, Matata nugwnu, Natan nugwnu, Dawuda nugwnu, 32 Jesse nugwnu, Obedi nugwnu, Bowaz nugwnu, Salmon nugwnu, Nashon nugwnu, 33 Aminadab nugwnu, Ram nugwnu, Hezron nugwnu, Perez nugwnu, Yahuda nugwnu, 34 Yakwuɓwu nugwnu, Ishakwu nugwnu, Ibrahim nugwnu, Tera nugwnu, Nahor nugwnu, 35 Serug nugwnu, Riyu nugwnu, Peleg nugwnu, Əba nugwnu, Shela nugwnu, 36 Kanan nugwnu, Arpazod nugwnu, Shem nugwnu, Nuhu nugwnu, Lamek nugwnu, 37 Metusela nugwnu, Enok nugwnu, Jared nugwnu, Mahalaliye nugwnu, Kenan nugwnu, 38 Enos nugwnu, Seti nugwnu, Adamwu nugwnu, Shekwoyi nugwnu.