1 Ń ayayaba ɓədagbma ɓə nyi, Ɓədagbma yi ɓə kwnusnu n Shekwoyii nu, jesnu Ɓədagbma yi ɓə zhni Shekwoyi nu. 2 Wo ɓə kwnusnu n Shekwoyii nu ń ayayaba. 3 N əwoi nu ń a ɓə zhni anya vnyanya; ntna wo, a to ɓə myi a zhni nyahonyahoi ń a ɓə kwu zhni nyi m. 4 Dna n wo nu n wyewyeyi ɓə nyi, jesnu wyewyeyi yi nu ɓə zhni bwuznagna azanyikwoci nya. 5 Bwuznagna fnu dna n wyegbma, jesnu wyegbma too myi n əkwo əsnugyi m.

6 Əza ɓə nyi ń Shekwoyi ɓə tnu n woi ai yi wo nge Yohana. 7 Wo ɓə ɓe n zhni ɓəgbmiyi nu, wá daɓo tu n bwuznagna yi tukwo, nabai nge dna n wo zokwo nu ń aza vnyanya ɓa myi ɓa ga gaiciya. 8 Əwo nu to ɓə zhni bwuznagna n əwohni m; wo ɓə ɓe n ɓwa bwuznagna yi ɓəgbmiyi nu zhni.

9 Bwuznagna hnihnii n kwo ga zahozahoyi bwuznagna nyi, kwo ɓə gnyi kwoi lo ɓe anyì nu. 10 Wo ɓə dna ń anyì, kwo shikwonyi a ɓə zhni anyì n əwoi nu, ama anyì to ɓə kpe wo əye m. 11 Wa ɓe əɓa aba ń ɓa ɓə zhni əwo anya nyi, ama əwo anya to ɓə gwo wo m. 12 Dudulonu əɓa vnyanya ń ɓa ɓə la wo gwo, aza yi ń ɓa ɓə kwu gaiciyaga dna n əwo əye, wa ga ɓa ikwo ɓá kwu zhni Shekwoyi aɓyi; 13 aɓyi ń a to ɓə ma ɓa fyi n nayi zokwo, kwo n zanugbayi ɓəye m, ama a ɓə ma ɓa fyi n Shekwoyi nu.

14 Ɓədagbma kwo ɓə la zè nayi jesnu waa dna n əyi atasni. Yi kwu əwo latu gyewye, latu Nugwnu ɓyigba nya, ń wo ɓə gbmi n Dada aba, n nunui n shebmyashii ɓədo n gaiciyanunuii.

15 (Yohana wa gbmi əɓo tu n əwo tukwo. Wa dnawyi, woi gna, "Əza nu nyi n mi ɓə daɓo tu n əwo tukwo əsa n mi ɓə gna, ‘Əza n wo ɓe lo n əmi avnu nyi, wo du mi lo ntuge wo ɓə gyi n əmi abye.’ ") 16 Dna n əwo shebmyashi nunui nu, n əyi vnyanya yi kwu anabəlika ɓwa kpeaje. 17 Ntuge a ɓə ga owa n Mwusa akwnu nu; shebmyashi n gaiciyanunui, ɓa ɓe dna n Yeisu Kirisiti akwnu. 18 Əzaho to lo ń wó shni Shekwoyi wyegye m, akpəge Nugwnu ɓyigba gbmanyi, ń wo zhni Shekwoyi nu n əwohni nyi, əwo nu gna wó lo vyivyiwyi n Dadai, əwo nu n kwu Dada wu yi.

19 Nsaiye, dəye nu ɓə zhni Yohana ɓəgbmi she Ayahudiyi atukwoda fyi n Urishelima ɓə tnu apirisiti ɓədo n Alevyiyi ɓa lo ɓəə nya wo əɓo əza pya ń wo ɓə zhni. 20 Wo to ɓə ná ɓəgbmi əɓo m, ama wa daɓo n əgbei la, "Əmi nu to zhni Kirisiti m."

21 Ɓa nya wo əɓo, "To, ho zhni nyika nu a?

"Ho zhni Iliya nu?" Wa gna, "Mi to zhni əwo nu m."

"Əho nu zhni Sheɓəgwognayi?"

Wa dnaɓəgbe, "Aawo."

22 N kpmasnu ɓa gna, "Ho zhni nyikanu a? Dna yi ɓəgbe ya lo aza ncei ń ɓa tnuyi nyi. Ho da knyiɓei nu tu n əhohni tukwo a?"

23 Yohana wa dnaɓəgbe dna n Ishaya sheɓəgwognayi aɓədagbma, "Əmi nu zhni bəgye n wo dnawyi dna n zhabwikawu, ‘La zokwo tace ga Dagayi.’ "

24 Nsayi Afarisiyi ń a ɓə tnu ɓa tnutnu nyi 25 ɓa nya wo əɓo, "To knyiyi nu zhni hoi zhni batizima n ho to zhni Kirisiti nu m, kwo Iliya, kwo Sheɓəgwognayi ma?"

26 Yohana wa dnaɓəgbe, "Mi zhni batizima n nuwnai nu, ama ń əfye atasni əza gnyiagnyi gnyilo ń fye ta kpe wo əye lo m. 27 Əwo nu zhni əza ń wo ɓə ɓe n əmi avnu, əwo abwada abma mi to kwnuce lo ma loya m."

28 A ɓə zhni aɓo ye vnyanya fyi n Byetani nu n Urudu səpa dəyi aba n Yohana ɓə dna woi zhni batizima nyi.

29 Əfye kwa gyi zhi, Yohana wa gye Yeisu woi ɓe da wo jesnu wa gna, "Fye gye, Shekwoyi Kwugyasnáyi, n wo kwú aleifyi anyì nya ya! 30 Əza nu nyi n mi ɓə da wo əɓo əsa n mi ɓə gna, ‘Əza n wo ɓe lo n mi avnu nyi, wo du mi lo ntuge wo ɓə gyi n əmi abye.’ 31 Mi to ɓə kpe əwo əye n mihnii nu m, ama əɓo n kwo ɓə zhni ma ɓe mii zhni batizima n nuwnai nyi, əkwo nu nge a gbmi wo wu ga Israila."

32 Nlonu Yohana wa gbmi əɓo ye: "Ma gye Zafnu kwoi shnizhi ɓe n əshemi ngye lukpe, jesnu kwaa kpetu n əwo. 33 Njesnu əmi, mi to ɓə kpe wo əye m, ama əza n wo ɓə tnu mi ma zhni batizima n nuwnai nyi, wa gna mi, ‘Əza n ha gye Zafnu kwoi shnizhi ɓe jesnu kwoi kpetu n wo nyi, əwo nu zhni əza ń wo ɓə zhni batizima n Zafnu Gyigyiyi.’ 34 Mi kwu gyewye jesnu mi la ɓəgbmi nge əza ye nu zhni Shekwoyi Əza Knyiknyiyi."

35 Əfye kwa gyi zhi, Yohana ɓə gnyi n abaayi ɓədo n əwo amwutuyii ngwnu-aba. 36 Shi wo ɓə gye Yeisu woi duya, wa gna, "Fye gyewye, Shekwoyi Kwugyasnáyi wo lo nu!"

37 Shi amwutuyi ngwnu-aba ye ɓə wo woi da ɓəye, ɓa vyi Yeisu. 38 Yeisu wa bmyawye wa gye ɓa ɓai vyi wo, wa nya ɓa əɓo, "Fye ye knyiyi nu a?"

Ɓa gna, "Rabyi" (n kwo nu gyi "Nyawuyi"), "Ho dnalo ń nanu a?"

39 Wa dnaɓəgbe, "Fye ɓe jesnu fye ɓa gyewye" Ntulonu ɓa lo ɓa gye aba n wo ɓə dna. Əsa ɓə gnyi ngye snukna ngwnu-anyi nu n nyipyeii, ntucenu ɓa kwu zo nyipyei yi fyi n kwnusnu n woi.

40 Anduru, Sima Byitusu zado, wo ɓə dna n aza ngwnu-aba ń ɓa ɓə kwu ɓəda wo n Yohana ɓəə kwu da nyi, jesnu n wo ɓə la vyi Yeisu nyi. 41 Ənya kpmisnuyi n Anduru ɓə zhni, əkwo nu nge, wa zna əwo ədo shni Sima wa gna wo, "Yi kwu gye Masifu" (n kwo nu gyi, Kirisiti nyi). 42 Jesnu wa ɓe n woi n Yeisu aba.

Yeisu wa shi wo awye wa gna, "Əho nu zhni Sima Yohana nugwnu. A ɓa yi ho ge Kefas" (n a pmyi əkwo nu bma nge Byitusu).

43 Əfye kwa gyi zhi Yeisu wa dnabwugba nge wo ɓa lo Gəlili. She wo ɓə gye Fyilibwus əwye, wa gna wo, "Vyi mi."

44 Fyilibwus, Anduru n Byitusui, ɓa ɓə kwnu n Betsaida əzhimi nu. 45 Fyilibwus wa gye Nataninya əwye wa gna wo, "Yi kwu gye əza n Mwusa ɓə kwu anya ka tu n əwo əɓo dna n owa nyi, jesnu əza n sheɓəgwognayi ɓə kwu anya ka tu n əwo ɓo nyi; Yeisu Nazeretiyi, Yusufu nugwnu."

46 Nataninya wa nyaɓo, "Nazereti! Nyaho manai ɓa gbmiɓe ń ɓo o?" Fyilibwus wa gna, "Ɓe ha gye."

47 She Yeisu ɓə gye Nataninya əwye woi ɓe, wa gna wo, "Israilayi hnihnii nu nyi, əza n kwocedna to dna n wo m."

48 Nataninya wa nyaɓo, "Ha kpe mi əye n wuna?"

Yeisu wa dna wo ɓəgbe, "Ma kwu gye ho hoi ye shi n gbaayi shnuwnata to Fyilibwus woi yi ho m."

49 Nlonu Nataninya wa gna, "Rabyi, ho zhni Shekwoyi Nugwnu nu; əho nu zhni əsu Israila nya."

50 Yeisu wa gna, "Ho ga gaiciya ntuge ma gna ho ge, ma kwu gye ho shi n gbaayita nu. Ai ho ɓa gye aɓo əwye n ɓa gna adəye dulo." 51 Wa je ɓəda ɓe, "Ɓəhnihni əmi nu gna ho, ho ɓə gye əshemi n gwuya gnyi, jesnu Shekwoyi amaləka ɓai gwnulo jesnu ɓai shnizhi kpe n Əza Nugwnu."