1 Shi Yeisu ɓə da ɓəye, wa kpe awye wu n əshe wa zhniaduwa:

"Dada, əsa kwo la si. La əho Nugwnu latu, nabai n əho Nugwnu wo ɓa myi wa la ho tu. 2 Ntuge əho nu ɓə ga wo ikwo tu n aza vnyanya, nabai n wo ɓa myi wa ga aza vnyanya wyewyeyi nyalonyalo nya, n ho kwu ɓa ga wo nyi. 3 Nsaiye dəye nu zhni wyewyeyi nyalonyalo: nge ɓa kpe əho əye, əho nu ɓwa Shekwoyi gaiciyada zhni, jesnu Yeisu Kirisiti, n ho ɓə tnu n woi nyi. 4 Mi la ɓe ho n latui dna n əknyi, ntu n tnutnu ɓo n mi kwu zozhni; n ho ɓə ga mi nge mi zhni nyi. 5 Nsaiye, Dada la mi latu n əho abye, n latui n mi ɓəə ncei n kwnusnu n hoi nyi, to ai shi anyì m.

6 "Mi la ho kpeyawu ga aza yi n ho ɓə kwnu ɓa ga mi fyi n anyì nyi. Ɓa ɓə zhni əho anya nu; ha kwu ɓa ga mi jesnu ɓa kwu əho ɓədagbma shiɓwa. 7 Nsaiye ɓa kpəlo nge nyahonyahoi n ho la ga mi, kwo gbmi n əho aba nu. 8 Ntuge mi ɓə kwu aɓədagbma gna ɓa, n ho ɓə ga mi nyi jesnu ɓaa ɓa gwò. Ɓa kpəlo, to n kpmakpmai m, nge mi ɓə gbmiɓe n əho aba nu, jesnu ɓa kwu gaiciyaga nge əho nu ɓə tnu n Mii. 9 Mi zhniaduwa ntu əɓa ɓo nu. Mi ta zhniaduwa ga anyì nu m, ama ntu n aza yi ɓo nu n ho kwu ɓa ga mi nyi, ntuge ɓa zhni əho anya nu. 10 Nyahonyahoi n mi ncei lo, kwo zhni əho nya nu, jesnu əho anya vnyanya n ho ncei lo, ɓa zhni əmi anya nu. Njesnu latu kwo la ɓe da mi ntu əɓa ɓo. 11 Mi to ɓə ye gwodu ma dna n anyì m, ama ɓa ye fyilo n anyì, jesnu mi gnyi mii ɓe əho aba nu. Dada Gyigyiyi, kna ɓa n əho əye kalá yi; əye n ho ɓə ga mi, nabai ń ɓa ɓə myi ɓa kwu zè gbmanyi ngye shi yi zhni gbmanyi nu nyi. 12 Mii ye kwnusnu n ɓai, mì ɓə la ɓa kna, ma kwu ɓa shi n laafyiyai n əye yii n ho ɓə ga mi nyi. Əzaho too ɓwu m, akpəge əza n a la wo znuknyi ntu agbmazhni ɓo, nabai n Nyakagyigyiyi ye ɓa kwu nu.

13 "Mi gnyi mii ɓe əho aba nu nsaiye, ama mi da aɓo ye mii ye dna n anyì nu, nabai nge ɓa myi ɓa ɓwa əmi agbmada nunui fyi n əɓa əmi. 14 Mi kwu əho ɓədagbma ga ɓa jesnu anyì n kwu ɓa wnunu, ntuge ɓa to ye zhni anyìmi nya nu n shnasnu m, shi mi to zhni anyìmi nya nu nyi m. 15 Əmi aduwazhni to nyi nge ho la ɓa kwnu n anyì nu m, ama nge ho knà ɓa ń əzanukwoyi. 16 Ɓa to zhni anyì nya nu m, n ɓwasnu shi mi to zhni əkwo nya nu nyi m. 17 Pmya ɓa n gaiciyanunui; əho ɓədagbma zhni gaiciyanunui nu. 18 Shi ho ɓə tnu n mii dna n anyì nyi, mi kwu tnu n ɓai fyi n anyì. 19 Ntu n əɓa ɓo, mi la əmihni pmya, nabai n əɓa ce n ɓa ɓá myi ɓa kwu zhni apmyapmyaiya hnihnii.

20 "Əmi aduwazhni to ɓwasnu ntu n əɓa ɓo nu gbmanyi m. Mi zhniaduwa ntu n aza yi ɓo nu ce n ɓa ɓəə ga gaiciya ntu n əɓa ɓəda ɓo nyi, 21 nabai əɓa vnyanya ɓai kwu zè gbmanyi. Dada, n ɓwasnu shi ho dnalo n mi, əmihni ce n dna ń ho nyi, fa ɓa kwu fyi ce n yi, nabai anyìmi ɓa ga gaiciya ge əho nu ɓə tnu n mii. 22 Latu ń ho ɓə ga mi nyi, mi la ga ɓa, nabai ɓa kwu zè gbmanyi ngye shi yi zhni gbmanyi nu nyi; 23 Əmi n dna ń ɓa, jesnu əho ń dna əmi; nabai n ɓa ɓə kwu lofyi n gbedogwnu nunui. Nlonu n anyì ɓə kpe nge əho nu ɓə tnu n mii, jesnu ho kwu yeye wu ɓai n ɓwasnu shi ho kwu yeye wu mi nyi.

24 "Dada, mi ye aza yi n ho kwu ɓa ga mi nyi, ɓai kwu kwnusnu n mii n aba n mi dna nyi, jesnu ɓai gye əmi latu əwye, latu n ho la ga mi nyi ntuge ho ɓə kwu yeye wu mii to ai shi anyì m.

25 "Dada Ɓəfyeceyi, kwo shikwonyi anyì ta kpe ho əye lo m, mi kpe ho əye lo, jesnu ɓa kpəlo nge əho nu ɓə tnu n mii. 26 Mi kwu zhni ɓa kwu ho kpeye, jesnu mi ɓə ye gwodu ma zhni ɓa kpe ho əye nabai yeye n ho ncei lo ga əmi nyi, kwaa dna n əɓa mi; nabai əmi n mihni maa dna n ɓa."