1 N dəye avnu, Yeisu wa zna laɓa dna n Gəlili. Wo to ɓə ye wa zna laɓa dna n Yahudiya m, ntuge Ayahudiyi atukwoda n əknyi yi, ɓə zhi ɓai zna zokwo shni ɓa wu wo. 2 Nsayii shi əsa Alubwikpe Awyefna Yahudiyi nya ɓə la wo vyivyiwyi,

3 Yeisu amaje ɓa gna wo, "Fa Gəlili ha lo Yahudiya, nabai n əho amwutuyi n ɓa fyilo n abaayi ɓə gye atnutnu n ho zhni nyi. 4 Əza to lo n wo ye a kpe wo əye, n wo zhni aɓo n ɓwuɓwu m. Shikwonyi ho zhni aɓo ye lo nyi, lo ho kwu əhohni wu n anyì." 5 Ntuge kwo əwo amaje to ɓə n gaiciyai ga n wo m.

6 Ntucenu Yeisu wa gna ɓa, "Əmi əsa too si kpa m; ama n əfye aba əsahosahoi n fyei bmyabmyalo. 7 Anyì taa wnunu n fyei m, ama kwo wnunu lo n mii, ntuge mi gbmiɓo nge əkwo atnutnu zhni anukwoi nu. 8 Əfye, fye lo awyefnaba. Mi ta lo awyefnaba yi lo m, ntuge əmi əsa too zo nu m." 9 She wo ɓə la pwo ɓəda ye daɓo, waa dna n Gəlili.

10 Shi əwo amaje ɓə kwu lo awyefnaba, waa lo ce, toge pəipəi m, ama n ɓwuɓwu. 11 Nsayi ń awyefnaba Ayahudiyi atukwoda ɓə zhi ɓai zna wo shni jesnu ɓa nyaɓo, "Wo gnyi ń na a?"

12 Aɓəsnaanya da ɓə la lapwi laɓa fyi n deeji ntu n əwo ɓo. Azaho gna, "Wo zhni əza manai nu."

Azaje ɓa dnaɓəgbe, "Aawo, wo fyi aza kwoce nu." 13 Ama zahozahoyi to ɓə da ɓəhoɓəhoi pəipəi tu n əwo tukwo m, ntuge aza ɓə wo atukwoda ədna.

14 Yeisu ɓə fa awyefna, ɓaa du ajegna ya, wa kpe Dagayipwuwa ashilagyí lo wa ya nyawu. 15 Ca wo Ayahudiyi n ɓa ɓə fyi n abaayi nyi jesnu ɓa nyaɓo, "Əza ye wa ɓwa ɓəyekpe ye pya n wunanu, to woi ɓwa nyawu m ma a?"

16 Yeisu wa dnaɓəgbe, "Əmi nyawu to zhni əmi nya nu m, kwo gbmi n əza aba nu n wo ɓə tnu n mii nyi. 17 Zahozahoyi n wa knyí wa zhni Shekwoyi ɓəmwi, wo ɓa kpe kwo əmi nyawu gbmi n Shekwoyi aba nu, kwo mi da əmihni ɓəda nu. 18 Əza n wa da əwohni ɓəda, wo da kwo nabai wa ɓwa əwohni latu nu, ama əza n wo zna əza yi latu shni n wa tnu n woi nyi, wo zhni əza gaiciyanunui da nu; kwocedna dəhodəhoi to dnalo n wo m. 19 Mwusa to ɓə la owa ga fye m? Dudulonu zaho to lo n fye n wo shi owa ɓwa lo m. Knyiyi nu zhni fyenyi ncei pma fya wu mi a?"

20 Deeji kwa dnaɓəgbe, "Ho nunui lo n asei. Nyika nu pma wa wu ho a?"

21 Yeisu wa gna ɓa, "Ma zhni tuzè gbmanyi, əfye vnyanya fyenyi zhi n ɓəwowoi. 22 Dudulonu, ntuge Mwusa ɓə ga fye nyaznu (kwo shikwonyi kwo to ɓə gbmi n Mwusa nu m, ama ń adada-azakwoi), fye znu əɓyinugbai ənya n Sibyiwyii. 23 Nsaiye ngye a ɓaa əɓyinugbai znunya n Sibyiwyii nabai to a znu Mwusa owa gna m, knyiyi nu zhni fyei gyi minagyi n mii, ntuge mi la əza nayi vnyanya kágna n Sibyiwyii a? 24 Fyè kwu fa owada ɓo ń əza awyesa, ama n əkwoɓwi, fyè da owa n cefyé."

25 Nsayii dna n Urishelima azaho ɓa ya ɓənya, "Əza ye nu to gnyi nyi n aza ye ɓa wu wo nyi m? 26 Wo gnyi nyi ń ya, woi daɓo n aza awye, jesnu ɓa ta da ɓədagbma ho lo n woi m. Atukwoda ɓa la əɓo znuya nu nge əwo nu zhni Kirisiti? 27 Ama yi kpe aba əye lo n əza ye gbmi; əsa n Kirisiti ɓəə ɓe ncei, əzaho to ɓə kpe aba əye n wo gbmi m."

28 Nlonu Yeisu, wo ye dna woi wunya n Dagayipwuwa ashilagyí, wa sáwyi, "Əə, fye kpe mi əye lo jesnu aba n mi gbmi. Mi to gnyi n ya n əmihni ikwoi nu m, ama əza ń wo ɓə tnu n mii nyi, wo zhni gaiciyada nu. Fye ta kpe əwo əye lo m, 29 ama mi kpe əwo əye lo ntuge mi gbmiɓe n əwo aba nu, əwo nu ɓə tnu n mii."

30 Ntu dəye ɓo, ɓa ye ɓa wna wo, ama zahozahoyi to ɓə wna wo m, ntuge əwo əsa to ɓə si kpa m. 31 Dudulonu, bəgyé fyi n deeji ɓə kwu gaiciyai ga n wo. Ɓa gna, "Əsa n Kirisiti ɓə ɓe ncei, wo ɓə zhni aznù n du əza ye?"

32 Afarisiyi ɓa wo deeji kwoi da aɓəsnaanya da ye pya ntu n wo ɓo. Nlonu apirisiti tukwoda ɓədo n Afarisiyii ɓa tnu Dagayipwuwa abagwuyi nge ɓa wna wo.

33 Yeisu wa gna, "Mi ɓwa kwnugnyi n fyei əsa fyewyi nu, nlonu mii jezelo da əza n wo ɓə tnu n mii nyi. 34 Fye ɓə zna mi shni, ama fye to ɓə gye mi əwye m; jesnu aba n mi dna nyi, fye taa myi fya ɓe m."

35 Ayahudiyi ɓa gna aje, "Əza ye ncei pma wa lo ń nanu, ń yi taa gye wo əwye m ma? Wo ye wa lo əyi aza nyawu nu n ɓa gnamyi fyilo n Agirikiyi atasni nyii? 36 Wo ɓə zhni knyiɓei nu nubwo əsa n wo ɓə gna, ‘Fye ɓə zna mi shni, ama fye to ɓə gye mi əwye m,’ jesnu ‘Aba n mi dna nyi, fye taa myi fya ɓe m’?"

37 Ń awyefna nyipyei kpmasnuii, nyipyei yaakwo duduyi awyefna nya, Yeisu wa laka gnyi wa daɓo n bəgyei lawu, "Fa zahozahoyi ń nuwna myikwnu wó wo lo, wa ɓe əmi aba jesnu wa sni. 38 Əzadəhodəhoyi n wa ga gaiciya dna n mi, ngye shi Nyakagyigyiyi ncei da lo; àlà nuwna wyewyeyi nya ɓa zhe n əwo əmi." 39 Wo ɓə gnyi woi daɓo ntu n Zafnu ɓo nu, n a ɓə ye a ga aza yi n ɓa kwu gaiciyaga fyi n wo nyi. Nya əsa yi, a to ɓə ga Zafnu m, shikwonyi a to ɓəə lá Yeisu tu kpa m.

40 She ɓa ɓə wo əwo aɓədagbma, azaho ɓa gna, "Ɓəhnihnii əza ye zhni Sheɓəgwognayi nu."

41 Azaje ɓa gna, "Wo zhni Kirisiti nu."

Aza ho ɓa dudu ɓa nyaɓo, "Kwo ɓa zè n wunanu Kirisiti wa gbmiɓe n Gəlili a? 42 Nyakagyigyiyi to gna nge Kirisiti ɓə gbmi n Dawuda əfye nu, jesnu woi gbmi n Baitalamyi, əzhi n Dawuda ɓə dna nyi m?" 43 Dəye kwa zhni aza ɓaa gnaje ntu n Yeisu ɓo. 44 Azaho ɓə ncei pma ɓa wna wo, ama zahozahoyi to ɓə to wo əɓwa m.

45 N kpmasnu Dagayipwuwa abagwuyi ɓa jezelo da apirisiti atukwoda n Afarisiyii, ɓa nya ɓa əɓo, "Knyiyi nu naa zhni to fyenyi wna wo ɓe ncei m ma?"

46 Abagwuyii ɓa dnaɓəgbe, "Əza to lo n wo kwu ɓəda shnida, ngye shi əza ye da lo nyi m."

47 Afarisiyi ɓa dnaɓəgbe, "Fye gna nge wo la fye dnakwoce nu cè? 48 Əzaho lo ń abegyiyi kwo ń Afarisiyi n wo la gaiciyaga n wo? 49 Aawo! Akpəge agyikicizhniyi ye n ɓa ta kpe owa əye lo nyi m; knyìtu, n tu lo ń ɓa."

50 Nikwodimwus, n wo ɓə la lo da Yeisu n shnisnu nyi, jesnu ń wo ɓə dna ń əɓa okwu nyi, wa nyaɓo,

51 "Əyi owa znu əza əknyi to ai wo əwo ɓəda kpa kwo a kpe ənya əye n wo zhni m?"

52 Ɓa dnaɓəgbe, "Ho gbmi n Gəlili nu cee? Dna owa əwye, jesnu ho ɓa gye nge sheɓəgwognayi too lo woi gbmi n Gəlili m."

[53 Nlonu əɓa vnyanya, ɓa lo apyi.