1 Ama Yeisu wa gwnutu lo Zaitu Əpe.

2 Njesnu n labmii wa kpeyagnyi dna n Dagayipwuwa ashilagyí aba ń aza vnyanya ɓə shekna wo; wa sasetu wa wunya. 3 Owa anyawuyii n Afarisiyii, ɓa ɓe n nyikwoza hoi n a ɓə wna wo dna n anagbái. Ɓaa wo gnyiagnyi gnyi n deeji abye 4 ɓa gna Yeisu, "Nyawuyi, a wna nyikwo ye dna woi zhni anagbái nu. 5 Dna n Owa, Mwusa ɓə la əgbe ga yi, nge a knyi nyikwo ye pya akwuta. Nsaiye ho gna nge nanu a?" 6 Ɓa ɓə zhni apma n ɓənya yei ngye agbúlu nu, nabai ɓa ɓwa əɓo n ɓa ɓá tu wo.

Ama Yeisu wa yakwnu wa ya nyaka zhi n əknyi n əwo ɓwanyii. 7 Shi ɓa ɓə gwodu n wo aɓənyai, wa kpebye gnyi wa gna ɓa, "Fa əzaho n fye atasni, n wo to n leifyii lo m, waa zhni əza kpmisnuii, ń wo ɓá she wo kwuta." 8 Njesnu wa je yakwnu wa ka ənya zhi n əknyi.

9 N dəyei, aza yi n ɓa ɓə kwu əɓoi wo, ɓa ya gaya gbmanyigbmanyi, azakwoi nu ɓə kpmi kwuka, nya əsa n Yeisu nu ɓə ɓwa cegnyi ɓədo ń nyikwoza yii, n ye gnyiagnyi gnyi ń ɓo. 10 Yeisu wa kpebye gnyi wa nya wo əɓo, "Nyikwoza, ɓa zhi ń na a? Zahozahoyi too znu ho əknyi m?"

11 Wa gna "Haamwasa, zaho too znu mi əknyi m." Yeisu wa gna, "Nlonu, əmihni ce taa znu ho əknyi m. Lo ho nya haa fa leifyizhni ɓo."]

12 She Yeisu ɓə je ɓəda n azai, wa gna, "Əmi nu zhni bwuznagna anyì nya. Əza n wa vyi mi, wo taa znazna dna n wyegbma m, nanyinanyi, ama wo ɓa ɓwa bwuznagna wyewyeyi nya."

13 Afarisiyi ɓa ce wo əɓo, "Ho gnyi nyi, hoi gbmi əhohni əɓo; əho ɓəgbmi to wnashi lo m."

14 Yeisu wa dnaɓəgbe, "Kwo n ma gbmi əmihni əɓo, əmi ɓəgbmi wnashi lo, ntuge mi kpe aba əye lo n ma gbmi jesnu aba n mi lo. Ama fye to n awyegai lo aba n ma gbmi kwo aba n mi lo m. 15 Fye da owa n zanyikwoci aɓəknawnai nu; mi ta da zahozahoyi owa m. 16 Ama kwo n ma da owa, əmi ɓəznu zhni gaiciya nu, ntuge mi to gnyi n əmi gbmanyi nu m. Mi kwnugnyi ɓədo n Dadai nu, əwo n wo ɓə tnu ń mii nyi. 17 Dna n əfye Owa, a cei kafyilo nge ɓəgbmi aza ngwnu-aba nya, kwo zhni gaiciya nu. 18 Əmi nu zhni əmihni ɓəgbmiyi; əmi Dada n wo ɓə tnu n əmii nyi, əwo nu zhni əmi ɓəgbmiyi baayi."

19 Nlonu ɓa nya wo əɓo, "Əho Dada gnyi ń nanu a?"

Yeisu wa dnaɓəgbe, "Fye ta kpe mi əye lo kwo əmi Dada m. Fye ɓə gna fye kpé mi əye lo, fye ye kpé əmi Dada əye lo ce." 20 Wo ɓə da aɓo ye woi ye gnyi woi wunya nu dna n Dagayipwuwa ashilagyí, n wo vyivyiwyi n anyaga yafyi abai. Dudulonu to zaho wa wna wo m, ntuge əwo əsa to ɓə si kpa m.

21 Njesnu Yeisu wa je ɓa gna, "Mi laka nu mii lo, fye ɓə zna mi shni, jesnu fye ɓə kwu fyí, fyi n əfye aleifyi. Aba n mi lo nyi, fye taa myi fya ɓe ɓo m."

22 Dəye kwa zhni Ayahudiyi ɓa nyaɓo, "Wo ye wa wu əwohni nu u? Əcenu zhni woi gna, ‘Aba n mi lo nyi, fye taa myi fya ɓe n ɓo m’?"

23 Ama wa gwodu, "Fye kwnu ń əknyi nu; mi gbmi ń əshe nu. Fye zhni anyì ye nya nu; mi to zhni anyì ye nya nu m. 24 Mi kwu gna fye nge fye ɓa kwu fyí, fyi n əfye aleifyi; ń fye to ga gaiciya nge əmi nu zhni əwo m, fye ɓa kwu fyí, fyi n əfye aleifyi."

25 Ɓa nyaɓo, "Ho zhni nyika nu a?"

Yeisu wa dnaɓəgbe, "N ɓwasnu shi mi gna fye lo ciici, ənya n kwo ɓə ya ń ayayaba nyi. 26 Mi n aɓoi lo n mwa bəgyé ma da dna n əfye owada. Ama əza n wo ɓə tnu n mii nyi, wo kwnukpema lo jesnu əɓo ń mi kwu wo n wo, əkwo nu n mi gna anyì."

27 To ɓa ɓwa əkwo awyega, nge wo ɓə gnyi woi gna ɓa əwo Dada əɓo nu m. 28 Nlonu Yeisu wa gna ɓa, "She fye ɓə la Əza Nugwnu lawu, n əsayii nu n fye ɓə kpe nge əmi nu zhni əwo, jesnu nge mi ta zhni ɓəhoɓəhoi n əmihnii nu m, ama mi ɓwa əɓo nu da n əmi Dada wo kwu wu mi. 29 Əza n wo ɓə tnu n mii nyi, wo kwnusnu lo n mii; wo too fa mi gnyi n əmi gbmanyi m, ntuge mi zhni əɓo lo ń kwo da wo n sahosahoii." 30 Kwo shi wo ɓə daɓo, aza n mwa bəgyé ɓa kwu gaiciyaga n wo.

31 Yeisu wa gna Ayahudiyi n ɓa ɓəə kwu gaiciyaga dna n wo nyi, "N fya kwu əmi nyawu shiɓwa, fye kwu zhni əmi amwutuyi hnihnii. 32 Nlonu n fye ɓə kpe gaiciyanunui əye jesnu gaiciyanunui ɓə la fye loya."

33 Ɓa dna wo ɓəgbe, "Yi zhni Ibrahim ayawyi nu, yi too shni afyenu zhni fyi n zahozahoyi akwnu m. Kwo zè n wunanu hoi gna nge a ɓə la yi loya a?"

34 Yeisu wa dnaɓəgbe, "Ɓəhnihni nu n mi gna fye, əzahozahoyi n wo zhni leifyi, wo zhni leifyi fyenu nu. 35 Njesnu fyenu to ń abai lo dna n pwuwa nyalonyalo m, ama nugwnu zhni pwuwa yi nya nu nyalonyalo. 36 Ntulonu ngye n Nugwnu ɓa lo əfye ya, fye ɓə kwu zè aloloiya ɓəhnihnii nya. 37 Mi kpəlo nge fye zhni Ibrahim ayawyi nu. Dudulonu fye zna zokwo shnilo nabai fya wu mi, ntuge fye to n abai lo ntu n əmi ɓədagbma ɓo m. 38 Mi gna fye əɓo nu n mi kwu gye n əmi Dada aba, əfyehni ce, fye zhni aɓo nu n fye kwu wo n əfye dada."

39 Ɓa dnaɓəgbe, "Ibrahim nu zhni əyi Dada."

Yeisu wa gna, "Ngye fye ɓəə zhni Ibrahim aɓyi nu, akpəge fye ɓa zhni əɓo n Ibrahim ɓə zhni. 40 Ngye shi kwo lo nyi, fye zna zokwo shnilo nabai fya wu mi, əza n wo kwu gaiciyanunui gna fye, n mi kwu wo n Shekwoyi nyi. Ibrahim to ɓə zhni aɓo ye pya m. 41 Fye zhni əfyehni dada atnutnu nu."

Ɓa ceawyi, "Yi to zhni anagbái aɓyi nu m, Əda gbmanyi n yi ncei ɓwasnu lo, əwo nu zhni Shekwoyi n əwohnii."

42 Yeisu wa gna ɓa, "Ngye Shekwoyi ɓəə zhni əfye Dada nu, fye ɓə ɓa ye mi, ntuge ma gbmiɓe n Shekwoyi aba nu. Əmi nu to ɓe n əmihnii m; Shekwoyi nu ɓə tnu n mii. 43 Knyiyi nu zhni to fyei ɓwa əmi ɓəda awyega m ma? Ntuge fye ta myilo fyei wo əɓo n mi da m. 44 Fye zhni əfye dada anya nu, Shetam, jesnu fye ncei pma fya zhni əfye dada ɓəmwi nu. Wo ɓə zhni zawuyi nu n kpmisnuyi, to woi shi gaiciyanunui ɓwa m, ntuge gaiciyanunui to dnalo n wo m. She wo ceakata, wo da əwo əbemi əbyé nu, ntuge wo zhni katáceyi nu, jesnu akataceyi dada. 45 Dudulonu ntuge mi gna fye gaiciyanunui, fye ta ga mi gaiciya lo m! 46 Zaho lo ń fye ń wo ɓa gbmiɓe n əmi leifyi ɓəgyii? Ngye n mi gna fye gaiciyanunui nu, knyi nu zhni to fyei ga mi gaiciya m, ma a? 47 Əzadəhodəhoyi n wo zhni Shekwoyi nya nu, wo wo əɓo n Shekwoyi da. Əɓo n kwo zhni to fyei wo nyi m, əkwo nu nge, fye to zhni Shekwoyi anya nu m."

48 Ayahudiyi ɓa dna wo ɓəgbe, "Yi to fyilo n zokwo, shi yi da nge ho zhni Samariyai nu, jesnu ge ho nunui lo n asei m?"

49 Yeisu wa gna, "Mi to nunui lo n asei m, ama mi ga əmi Dada mwamwa, ama fyei ci mi wyegba. 50 Mi ta zna latu shni lo ga əmihni m; ama əza lo n wo zna kwo shni, jesnu əwo nu zhni owadayi. 51 Ɓəhnihni əmi nu gna fye, əzadəhodəhoyi n wo vyi əmi ɓədagbma wo taa gye əfyi m nanyinanyi."

52 N dəyei, ɓa sáwyi, "Nsaiye yi kwu kpe nge ho nunui lo n asei! Ibrahim ɓə la fyí, nlonu sheɓəgwognayi ce, dudulonu ho gna nge əzadəhodəhoyi n wo vyi əho ɓədagbma wo taa to əfyi wo m nanyinanyi. 53 Ho du əyi dada Ibrahim lo nu? Wo ɓə lá fyí, nlonu sheaɓəgwognayi ce. Ho gye nge ho zhni nyika nu gnyi a?"

54 Yeisu wa dnaɓəgbe, "Ngye mi lá əmihni tu lo, əmi latu to zhni nyaho nu m. Əmi Dada, n fye gna wo zhni əfye Shekwoyi nyi, əwo nu ga mi latu. 55 Kwo shikwonyi fye ta kpe wo əye lo m, əmihnii da kpe wo əye lo. Ngye ma gna ge mi ta kpe wo əye lo m, mi ɓaa zè katáceyi ngye əfye, ama mi kpe wo əye lo jesnu mi ga əwo ɓədagbma mwamwa. 56 Əfye Dada Ibrahim ɓə nyagbmada dna n ɓənubwozhni nge wo kwu gye əmi nyipyei; wo ɓə kwu kwo gyewye, jesnu a kwu wo da."

57 Ɓa gna wo, "Ho too ló aye shiitnu m, ho nyi n kwu Ibrahim gyewye!"

58 Yeisu wa dnaɓəgbe, "Ɓəhnihni əmi nu gna fye, a ɓə snu ń a ma Ibrahim, mii gnyi gnyi!" 59 N dəyei, ɓa kwu akwuta nge ɓa knyi wo, ama Yeisu wa əwohni ɓwi, wa wyiya fyaa n Dagayipwuwa ashilagyí.