1 "Fye to fa əfye adu ɓa wnu fye m. Fye kwu gaiciyaga n Shekwoyi; jesnu fye kwu gaiciyaga fyi n mi cè. 2 Əmi Dada pwuwa n anyakwnui lo n mwa bəgyé; ngye kwo to ɓə nyi nlonu m, mi ɓə ɓa gna fye nge mi lo mii zhniaba aba nu ga fye? 3 Jesnu n ma lo maa aba zhniaba ga fye, mi ɓə jezeɓe ma kwú fye, fyei kwu kwnusnu n mii, nabai əfyehni ce, fyei kwu fyi ń aba n mi dna. 4 Fye kpe zokwo əye lo n kwo lo aba n mi lo nyi."

5 Toma wa gna wo, "Dagayi, yi ta kpe aba əye lo n ho lo nyi m, to, yi ɓa kpe zokwo n wuna a?"

6 Yeisu wa dnaɓəgbe, "Əmi nu zhni zokwo jesnu gaiciyanunui n wyewyeyii. Zaho taa myi wa ɓe Dada aba m, akpəge dna n əmi. 7 Ngye fye kwu mi kpeye, fye ɓa kpe əmi Dada əye ce. Ənya n kwo laka nsaiye, fye kwu wo kpeye jesnu fye kwu wo gyewye."

8 Fyilibwus wa gna, "Dagayi, wu yi Dada, jesnu kwo ɓa kwu yi kwnuawye."

9 Yeisu wa dnaɓəgbe: "Ho ta kpe mi əye lo m, Fyilibwus, əsa n kwo la mwa mii kwnusnu n fyei nyi? Zahozahoyi n wo kwu mi gyewye wo kwu əmi Dada gyewye. Knyiyi nu ɓa zhni ha gna, ‘Wu yi Dada a’? 10 Fye too ga gaiciya nge mi dnalo n Dada, jesnu nge Dada dnalo n mi m? Aɓədagbma n mi gna fye nyi, mi ta da ɓa ń əmihni ikwoi nu m. Ama, Dada nu, n wo dna n mi nyi, əwo nu zhni əwohni tnutnu. 11 Ga mi gaiciya əsa ń ma gna nge mi dnalo n Dada jesnu nge Dada dnalo n mi; kwo n wunanu, ga gaiciya ń aɓəgbmi atnutnu n fye kwu gye mii zhni ɓa əmihni nyi. 12 Ɓəhnihni əmi nu gna fye, əzadəhodəhoyi n wa ga gaiciya n mi, wo ɓa zhni atnutnu ń mi zhni nyi, jesnu wo ɓə zhni atnutnu ayaakwo n du adəye, ntuge mi lo da Dada nu. 13 Njesnu mi ɓa zhni ɓəhoɓəhoi n fya nyaɓo dna n əmi əye, nabai n Dada ɓa ɓwa latu dna n Nugwnu. 14 Fye ɓə myi fya nya nyahonyahoi əɓo dna n əmi əye, jesnu mi ɓə zhni kwo ga əfye.

15 "Ngye fye ye mi lo, fye shi əmi aɓəgbetu əɓwa. 16 Njesnu mi ɓa nya Dada əɓo, wo ɓə ga fye bmazhniyi ədo, woi bma fye zhni, woi kwnusnu n fyei nyalonyalo; 17 əwo nu zhni Zafnu gaiciyanunui nya. Anyì taa gwo əwo m, ntuge ɓa too shni wo wyegye, kwo ɓa kpe wo əye m. Ama fye kpe wo əye lo, ntuge wo kwnusnu lo n fyei jesnu wo ɓə la dna n fye. 18 Mi taa fa fye ngye akwuwyi m; mi ɓa ɓe da fye. 19 Ntna əsa mwai, anyì taa je mi wyegye m kpeekpe, ama fye ɓə gye mi əwye. Ntuge mi n wyewyeyi lo, əfyehni ce fye ɓa ɓwa wyewyeyi. 20 Dna n əwyi yi nu n fye ɓə la kwo wnashi nge mi dnalo n Dada, jesnu nge fye fyilo n mi, əmihni dnalo n fye. 21 Əzadəhodəhoyi n wo n əmi aɓəgbetui shi, jesnu woi shi ɓa əɓwa, wo zhni əza nu n wo ye mi. Əza n wo ye mi, əmi Dada ɓa ye wo, jesnu əmihni ce ɓa ye wo, ma wu əmihni n əwo aba."

22 Nsayi Yahuda (toge Yahuda Iskariyoti m) wa gna, "Ama, Dagayi, knyiyi nu zhni ho nyi ye ha wu yi əhohni, ama toge ha wu əhohni n anyì ma?"

23 Yeisu wa dnaɓəgbe, "Zahozahoyi n wo ye mi wo ɓa vyi əmi nyawu. Əmi Dada ɓa ye wo, jesnu yi ɓə ɓe əwo aba, yi la wo zè əyi pwuwa. 24 Zahozahoyi n wo ta ye mi lo m, wo taa vyi əmi nyawu m. Aɓədagbma ye n fye wo nyi, ɓa to zhni əmi anya nu m; ɓa zhni Dada anya nu n wo ɓə tnu n mii nyi.

25 "Aɓo ye vnyanya mi kwu ɓa da fye mii ye kwnusnu n fyei. 26 Ama bmazhniyi, Zafnu Gyigyiyi, n Dada ɓə tnu woi dna n əmi əye nyi, wo ɓə wu fye aɓo vnyanya jesnu woi pá fye ɓəhoɓəhoi n mi kwu gna fye. 27 Mi fa fye zhi n bwugbafui nu; mi ga fye əmi bwugbafu. Mi ta ga fye shi anyì ga nu nyi m. Fye to ye əfye adu ɓa wnu fye m, jesnu fye to wodna m.

28 "Fye ɓə kwú wo mii gna, ‘Mi gnyi mii laka nu, jesnu mi ɓe jezeɓe da fye.’ Ngye fye ye mi lo, fye ɓa dagbma nge mi lo da Dada nu, ntuge Dada wo du mi lo. 29 Mi kwu aɓo ye pma fye gna to ɓai zhni kpa m, nabai əsa n kwo ɓə zhni ncei, fyei kwu gaiciyaga. 30 Mi taa je ɓəda da n fyei n duya ya m, ntuge əbeɓyi anyì nya ɓe lo. Wo to n nyahoi lo wa shi mi ɓwa ncei m, 31 ama wo ɓe nabai n anyì ɓa kpe nu nge mi ye Dada lo, jesnu mi ɓwa əɓo nu zhni n əmi Dada ɓə tu mi əgbe nge mi zhni. Fye kwukala ɓe, ya lo.