1 Shi wo ɓəlo n zokwo, wa gye əza n a ɓə ma wo n awyei bwabwai. 2 Əwo amwutuyi ɓa nya wo əɓo, "Rabyi, nyika nu ɓə zhni leifyi a, əza ye nu kwo əwo azamayi nu ɓə zhni a ma wo n awyei bwabwai a?"

3 Yeisu wa gna, "Əza ye nu to ɓə zhni leifyi kwo əwo azamayi m, ama dəye ɓə zhni nabai a wu Shekwoyi kalá tnutnu nu dna n əwo. 4 Ɓəshishi nu ya zhni əza tnutnu n wo ɓə tnu n mii nyi; nyipyei ye gnyi. Sukwo ɓe lo, əsa n əza to ɓə myi wa zhni tnutnu m. 5 Shi mi ye dnalo n anyì nyi, əmi nu zhni bwuznagna anyì nya."

6 Shi wo ɓə kwu ɓəye da, wa fu əwnu n əwo aknyii zhi n əknyi, jesnu wa pmya əza yi kwo n awye. 7 Wa gna wo, "Lo, ho wnuawye n Silowam nuwnaznudna" (ɓədagbma ye nu gyi ge "Tnuncei"). Ntulonu əza ye wa lo wa wnuawye jesnu wa zhi apyi woi gyewyeba.

8 Əwo akwnuzhiyi n aza yii n ɓa ɓəə kwu wo gyewye n sapa woi ɓanya nyi, ɓa nyaɓo, "Əza nu to nyi n wo ɓə zhni woi sase shi woi ɓanya nyi m?" 9 Azaho ɓa gna nge əwo nu. Azaje ɓa gna, "Aawo, wo gbe wo gbegbe nu." Ama əwo n wohnii waa gyitu, "Əmi nu gnyi."

10 Ɓa nyaɓo, "A zhni n wunanu ho nyi gnyi hoi gyewyeba a?"

11 Wa dnaɓəgbe, "Əza n ɓa yi wo ge Yeisu nyi, əwo nu na fu əwnu wonyi pmya mi n awye. Wonyi gna mi ge mi lo Silowam nuwna mii wnuawye. Ntulonu maa lo, ma wnuawye, minyi gyewyeba."

12 Ɓa nya wo əɓo, "Əza ye gnyi ń na a?"

Wa gna, "Mi ta kpəlo m."

13 Ɓa ɓe Afarisiyi n əza yii ń awye ɓə n woi bwabwai nyi. 14 Əwyi n Yeisu ɓə fu əwnu wa pmya n əza yi awye ɓa kpe wo ya nyi, kwo ɓə zhni Sibyiwyi nu. 15 Ntucenu Afarisiyi ce ɓa nya wo əɓo, shi wo ɓə gwo əwo wyebagye n wu. Əza yi wa dnaɓəgbe, "Wo ɓə pmya əwnu nu n əmi awye, ma wnuawye nsaiye mi gyewyeba lo."

16 Afarisiyi ho ɓa gna, "Əza ye ta gbmi n Shekwoyi aba nu m, ntuge wo ta shi owa Sibyiwyi nya əɓwa lo m." Ama azaje ɓa nyaɓo, "Kwo ɓá kpezhni n wunanu leifyizhniyi wa zhni aznù ye pya?" Ntulonu ɓaa gnaje.

17 Nlonu ɓa je pmyi da wyebwayi, "Ho n knyiɓei nu lo ha da ntu n əwo əɓo a? Əho awye nu n wa gwuya." Əza yi wa dnaɓəgbe, "Wo zhni sheɓəgwognayi nu."

18 To ɓa du ɓa ga gaiciya nge wo ɓə zhni wyebwayi nu jesnu nge wa gwo wyebagye gwogwo nu m, sai əsa n ɓa ɓə tnu əza yi azamayi ɓo. 19 Ɓa nyaɓo, "Əfye nugwnu nu gnyi n əza yei? Əza nu nyi n fye gna nge a ɓə ma wo n awyei bwabwai? Kwa zè n wunanu nsaiye woi gyewyeba a?"

20 Əwo azamayi ɓa dnaɓəgbe, "Yi kpəlo nge wo zhni əyi nugwnu nu, jesnu yi kpəlo nge a ɓə ma wo n awyei bwabwai nu. 21 Ama shi wa zhni wonyi gyewyeba nsaiye, kwo əza n wa kpe wo awye ya nyi, yi ta kpəlo m. Fye nya wo əɓo. Wo la gbmiza; wo ɓa daɓo n əwohnii." 22 Əwo azamayi ɓə da əɓo ye ntuge ɓa ɓə zhi n Ayahudiyi atukwoda ədnawoi nu, n ɓa ɓəə kwu lu da nge əza n wa da nge Yeisu zhni Kirisiti nu, a ɓaa wo nyaya n Ayahudiyibwokwnu. 23 Cenu ɓə zhni əwo azamayi ɓa gna, "Wo la gbmiza; fye nya wo əɓo."

24 Ɓa je əza yi yì əɓwa baayi n wo ɓə zhni wyebwayi nyi, ɓa gna, "La Shekwoyi tu ha da gaiciya. Yi kpəlo nge əza ye zhni leifyizhniyi nu."

25 Wa dnaɓəgbe, "Kwo wo zhni leifyizhniyi nu, kwo nlonu to m, mi ta kpəlo m. Əɓo gbmanyi nu n mi kpəlo, mi ɓə zhni wyebwayi nu, ama nsaiye mi gyewyeba lo!"

26 Nlonu ɓa nya wo əɓo, "Wo ɓə zhni ho knyiɓei nu a? Wo ɓə kpé əho awyeya n wunanu a?"

27 Wa dnaɓəgbe, "Mi kwu gna fye n shnisnu, ama fye too kna tnubwa m. Ntu knyiɓei nu n fye ye fya je ce wo a? Fye ye fya kwu zè əwo amwutuyi nu cè?"

28 Nlonu ɓa knyi wo akpmi ɓa gna, "Ho zhni əza ye mwutuyi nu! Əyii da, zhni Mwusa amwutuyi nu! 29 Yi kpəlo nge Shekwoyi ɓə kwu əɓo da n Mwusai, ama əza ye n wo nyi, yi ta kpe aba lo n wo gbmi m kpeekpe."

30 Əza yi wa dnaɓəgbe, "Nsaiye dəye zhni əɓo wowoi nu! Fye ta kpe aba lo n wo gbmi m, dudulonu wo la əmi awye kpeya. 31 Yi kpəlo nge Shekwoyi ta kna aleifyizhniyi tnubwa m. Wo kna Shekwodnawoyi nu tnubwa n wo zhni əwo ɓəye nyi. 32 She anyì ɓə ya, əzaho too shni wo nge a la wyebwayi kpeawyeya n a ɓə ma wo n awyei bwabwai m. 33 Ngye əza ye to ɓə gna ge wo gbmi n Shekwoyi aba nu m, wo taa myi n ɓəho zhni m."

34 Ntu n dəye ɓo, ɓa dnaɓəgbe, "Əho n a ɓə ma ho n nunui dna n leifyi; kwo ɓa zhni n wunanu əho nu ha ga yi nyawu a!" Ɓa gbmi wo ya gnyi n əbmyi.

35 Yeisu wa wo nge ɓa la wo gbmiya n Ayahudiyibwokwnu, shi wo ɓə gye wo əwye, wa gna, "Ho la gaiciyaga dna n Əza Nugwnu?"

36 Əza yi wa nyaɓo, "Haamwasa, nyika nu n woi a? Gna mi nabai ma ga wo gaiciya."

37 Yeisu wa gna, "Ho kwu wo gyewye nsaiye; ɓəhnihni, əwo nu gnyi woi daɓo n hoi."

38 Nlonu əza yi wa gna, "Dagayi, mi la gaiciyaga," nlonu, wa ga wo mwamwa.

39 Yeisu wa gna, "Ntu n owada ɓo nu n mi la lo ɓe anyì ye, nabai nge awyebwayi ɓa gyewyeba, jesnu aza yi n ɓa gyewyeba lo nyi, ɓa kwu zè awyebwayi."

40 Afarisiyi ho n ɓa ɓə kwnuzhi n woi ɓa kwu wo woi da ɓəye jesnu ɓa nyaɓo, "Nge naa? Yi zhni awyebwayi nu cè?"

41 Yeisu wa gna, "Ngye fye ɓəə zhni awyebwayi nu, to fye ye n leifyi ɓəgyii lo m; ama nsaiye shi fye gyewyeba lo nyi, əfye ɓəgyi kwo la myitu n fye.