1 Gnanaznu awyefna anyipyei ɓai ɓwace fyewyi kwa si, Yeisu woi kwu kpe nge əsa ɓəə la si n wo ɓa fa anyì ye, wa jezelo Dada aba. Shi wo ɓə kwu yeye wu əwo aza n ɓa ɓə fyi n anyì nyi, wa yé n ɓai nya azozo ba.

2 Ɓai kpe ɓai gyi wyeshe nyagyi jesnu Shetam woi la kwo ludna n Yahuda, Sima Iskariyot nugwnu, nge wo ɓwu Yeisu. 3 Yeisu ɓə kpe nge Dada wo kwu anya vnyanya fa fyi n əwo aɓwa, jesnu nge wo ɓə gbmi n Shekwoyi aba nu, jesnu woi jezelo Shekwoyi aba; 4 ntulonu wa laka gnyi n anyagyi gyi aba, wa kpma əwo aje əbmyi nya jesnu wa kwu tawali pa n əwo əshni. 5 N dəye avnu, wa ze nuwna fyi n wyewnubwe, wa ya woi zhna əwo amwutuyi apita jesnu woi wnu ɓa ya n tawalii, n wo ɓə ncei pa n əwo əshni nyi.

6 Wa ɓe Sima Byitusu aba, Byitusu wa gna wo, "Dagayi, ho ye ha zhna əmi apita nu?"

7 Yeisu wa dnaɓəgbe, "Ho ta kpe əɓo əye lo n mi zhni nsaiye m, ama n abye dəye ho ɓə ɓwa əkwo awyega."

8 Byitusu wa gna, "Aawo, ho taa zhna mi apitabwada m nanyinanyi." Yeisu wa dnaɓəgbe, "Akpəge ma zhna əho apita, a gye nyaho to n hoi todo lo n mii m."

9 Sima Byitusu wa dnaɓəgbe, "Ngye nlonu nu, Dagayi, akpəge toge əmi apitabwada nu gbmanyi m, ama əmi aɓwa jesnu n əmi tukwoi ɓədo!"

10 Yeisu wa dnaɓəgbe, "Aza n ɓa la nuwna fu, ɓa ɓwa gwo ɓa zhna əɓa apitabwada nu; əɓa nayi vnyanya kwo gyigyii lo. Jesnu fye gyigyii lo, kwo shikwonyi əfye vnyanya nu to gyigyiyi lo m." 11 Ntuge wo ɓəi kpe əza əye n wo ɓə ye wa ɓwu wo, cenu ɓə zhni wa gna nge əɓa vnyanya nu to gyigyii lo m.

12 She wo ɓəə la pwo əɓa apita zhna ɓo, wa kpe əwo aje wa jezelo əwo aseseba njesnu. Wa nya ɓa əɓo, "Fye kwu əɓo awyega ɓwa n mi kwu zhni fye nyi?" 13 "Fye yi mi ‘Nyawuyi’ n ‘Dagayii,’ gaiciya nu n kwoi, ntuge əza nu n mi zhni. 14 Nsaiye əmi, n mi zhni əfye Dagayi n Nyawuyii nyi, mi la əfye apitabwada zhna, əfyehni ce, kwo gwo fya zhna aje apitabwada. 15 Mi la ofye wu fye fya vyi, nabai fya zhni ngye shi ma zhni fye nyi. 16 Ɓəhnihni əmi nu gna fye, fyenu too lo n wo du əwo Dagayi m, kwo tnutnudayi n du əza n wa tnu wo tnutnu nyi m. 17 Nsaiye shi fye kwu aɓo ye kpeye nyi, anabəlikada nu n fyei n fya zhni ɓa.

18 "Mi ta daɓo n əfyei nu vnyanya m; mi kpe aza əye lo n mi la knyí. Ama dəye, ye kwa nu nyakaɓala nu n nyakagyigyiyi: ‘Əza n wo kwnu biledi gyi n mii nyi, wo la pmyitu mi.’ 

19 "Mi pma fye gna nu nsaiye to kwoi zhni m, nabai shi kwo ɓə zhni, fye ɓe kwu gaiciya ga nge mi zhni əza nu n mi zhni. 20 Ɓəhnihni əmi nu gna fye, əzadəhodəhoyi n wa gwo əza n ma tnu n woi, wo la mi gwo; jesnu əzadəhodəhoyi n wa gwo mi, wo la əza gwo n wo ɓə tnu n mii nyi."

21 Shi Yeisu ɓə kwu ɓəye da, bwugba kwaa wnu wo dna n zafnu, wa gbmiɓo ge, "Ɓəhnihni əmi nu gna fye, zaknayi n fye, wo ye wa ɓwu mi nu."

22 Əwo amwutuyi ɓa shi aje awye n ɓəyeɓwui, nabai ɓa kpe əza əye n a da əwo ɓo. 23 Zaknayi n əɓa mwutuyi, n Yeisu ɓə zhni woi ye wo nyi, wo ɓə sasetu n ma wo. 24 Sima Byitusu wa daɓo n mwutuyi yi n əɓwai, "Nya wo əza n wo da əwo əɓo."

25 N myima n Yeisu agwu, wa nya wo əɓo, "Dagayi, nyika nu a?"

26 Yeisu wa dnaɓəgbe, "Əza nu n mi ɓa ga wo biledi pisai ye, əsa mi ɓə la kwo dna n bwoɓyi nyi." Nlonu, she wo ɓə da biledi dna, wa ga Yahuda kwo, Sima Iskariyot nugwnu. 27 She Yahuda ɓə zè n biledi gwogwoi, Shetam wa lodna n wo.

Ntulonu Yeisu wa gna wo, "Əɓo n ho ye ha zhni nyi, zhni kwo n pyepyei." 28 Ama tu n nyagyi gyi abaayi, zahozahoyi to ɓə ɓwa awyega əɓo n kwo ɓə zhni Yeisu wa daɓo n woi nlonu m. 29 Shikwonyi Yahuda nu ɓə zhni əɓa gyiwye shiyi, ɓa ɓə zhninubwo ge Yeisu gna wo nge wo si anya nu n a ɓə ye ntu awyefna ɓo, kwo nge wo ga asnayi nyaho. 30 She Yahuda ɓə pwo biledi gyi ɓo, wa gbmiya lo. Njesnu sukwo ɓəə la zhni.

31 Shi Yahuda Iskariyoti ɓə la gbmiya lo, Yeisu wa gna, "Nsaiye Əza Nugwnu wo la latu ɓwa, jesnu Shekwoyi wo la latu ɓwa dna n Nugwnu. 32 Ngye Shekwoyi wo la latu ɓwa dna n əwo, Shekwoyi ɓa la Nugwnu tu dna n əwohni, jesnu wo ɓaa wo latu n əsagbmanyii.

33 "Əmi aɓyi, mi ɓa kwnusnu n fyei n ɓwasnu əsa fyewyi nu. Fye ɓə zna mi shni, ama n ɓwasnu shi mi ɓə gna Ayahudiyi nyi, nlonu n mi gna fye nsaiye: Aba n mi lo nyi, fye taa myi fya ɓe m.

34 "Ɓəgbetu woiwoyi nu n mi ga fye: Fye ye n ajei. Ntulonu ɓəshishi nu fya ye n ajei, ngye shi mi kwu ye n fyei nyi, 35 N dəyei nu n zahozahoyi ɓa kpe nge fye zhni əmi amwutuyi nu, n fya yé n ajei."

36 Sima Byitusu wa nya wo əɓo, "Dagayi, ho lo n nanu a?" Yeisu wa dnaɓəgbe, "Aba n mi lo nyi, fye taa myi fya vyi mi nsaiye m, ama fye ɓə vyi ɓe nsahoi."

37 Byitusu wa nyaɓo, "Dagayi, knyi nu zhni minyi taa myi ma vyi ho nsaiye ma? Mi ɓa ga əmi wyewyeyi ntu əho əɓo."

38 Nlonu Yeisu wa dnaɓəgbe, "Ɓəhnihnii ho ɓa ga əho wyewyeyi ntu mi əɓo? Ɓəhnihnii əmi nu gna ho, Pisenugba ɓə snu n kwo cekwu, hoi la əmi yekpé əɓo na aɓwa ngwnu-ata!"