1 "Mi kwu aɓo ye gna fye vnyanya nabai to fyei myiya m. 2 Ɓa ɓə la fye kwnuya n ayahudiyibwokwnu; ɓəhnihnii, əsa ɓe lo n zahozahoyi n wa wnunu n fyei, wo ɓə zhninubwo nge wo zhni Shekwoyi tnutnu nu. 3 Ɓa ɓə zhni aɓo ye pya ntuge ɓa too kpe Dada əye kwo əmi m. 4 Mi kwu dəye gna fye, nabai nge əsa n aɓo ye əsa ɓə si ncei, fyei pa nge mi ɓə la fye kwnù. Mi to ɓə gna fye aɓo ye n ayayaba m, ntuge mi ɓə kwnusnu n fyei, 5 ama nsaiye, mi gnyi mii lo da əwo nu n wo ɓə tnu n mii nyi. Əzaho to lo n fye n wo nya mi əɓo lo ge, ‘Ho lo n nanu a?’ 6 Fye zezè, fye kwu nu zhi n bwugbawnui nu ntuge mi kwu aɓo ye gna fye. 7 Ama ɓəhnihni əmi nu gna fye, kwo bmyalo n əfye aba ge, mi gnyi mii lo. Akpəge ma lo, əfye Bmazhniyi taa ɓe da fye m; ama n ma lo, mi ɓə tnu fye n woi. 8 She wo ɓə ɓe, wo ɓə wu nge anyì dnalo ń abaɓwi ntu leifyi ɓo, ɓədo n ɓəfyecezhnii n owadai: 9 ntu leifyi ɓo, ntuge aza ta ga mi gaiciya lo m; 10 ntu ɓəfyecezhni əɓo, ntuge mi ye ma lo Dada aba nu, aba n fye taa je mi əwyegye m; 11 jesnu ntu n owada ɓo, ntuge a la anyì ye əsuɓyi znuknyi.

12 "Mi ye n aɓəda ajei lo n mwa ma gna fye, n du she fye ɓa shni ɓa əɓwashi nsaiye. 13 Ama əsa n əwo, Zafnu gaiciyanunui nya ɓə ɓe, wo ɓə dna fye n ofye zokwo gaiciyanunui nya vnyanya. Wo to ɓə da əwohni ɓəda m; wo ɓə ɓwa əɓo nu da n wa wo, jesnu wo ɓə gna fye aɓo ń ɓa ɓe lo n abye. 14 Wo ɓə la mi latu, ntuge wo ɓə gwo əɓo n əmi aba nu n wo ɓə wu fye kwo awyega. 15 Anya vnyanya n ɓa zhni Dada anya, ɓa zhni əmi anya nu. Cenuzhni mii gna ge Zafnu ɓə gwo n əmi nu, əɓo n wo ɓə wu fye kwo awyega nyi."

16 Yeisu wa gwodu wa gna, "Əsa fyewyi fye taa je mi wyegye m kpeekpe, ama jesnu n əsa fyewyi kwa duya, fye ɓə gye mi əwye."

17 She wo ɓə da ɓəye, əwo amwutuyi ho ɓa gna aje nge, "Knyiɓei nu n wo zhninubwo woi gna nge, ‘Dna n əsa fyewyi fye taa je mi wyegye m kpeekpe, jesnu n əsa fyewyi n kwa duya, fye ɓə gye mi əwye a’? Jesnu, ‘Ntuge mi gnyi mii lo Dada aba nu a’?" 18 Ɓa gwodu n ɓənyai, "Wo zhninubwo n wunanu nge, ‘əsa fyewyi a’? Yi too ɓwa awyega əɓo n wo gnyi woi da m."

19 Yeisu wa kwu gyewye ge ɓa ye lo ɓa nya wo ɓəye əɓo, ntulonu wa gna ɓa, "Fye nya aje əɓo nu əɓo n mi zhninubwo əsa n ma gna, ‘Əsa fyewyi fye taa je mi wyegye m kpeekpe, jesnu n əsa fyewyi kwa duya fye ɓə gye mi əwye a’? 20 Ɓəhnihni əmi nu gna fye, fye ɓə ciɓwi jesnu fyei wnubwugba, ama anyì ɓə nya agbmada. Fye ɓə wnubwugba, ama əfye bwugbawnu ɓə la zè bwugbada. 21 Əsa n nyikwoza shi n əɓyima nyasnai, wo zhni wa wo snasna ntuge əwo əɓyima əsa nu gnyi; ama shi wo la kágna, wo zhni wa əwo snasna əɓo zamwi, ntu n əwo bwugbada ɓo nge wo la əɓyi ma dna n anyì. 22 Kwo ɓwasnu lo nlonu nu n fyei: Nsaiye əkwo nu zhni əfye bwugbawnu əsa, ama mi ɓə je fye əwyegye, fye ɓə dagbma, jesnu əzaho to ɓə gwo əfye bwugbada ya m. 23 Dna n əwyi yi, fye to ɓə je mi ɓəhoɓəhoi nya m. Ɓəhnihni əmi nu gna fye, əmi Dada ɓə ga fye nyahonyahoi n fya nya əkwo əɓo dna n əmi əye. 24 Nya əsa ye, fye too nyá nyaho əɓo dna n əmi əye m. Fye nyaɓo fye ɓa gwo, jesnu əfye bwugbada ɓa kwu nu knaaknà.

25 "Kwo shikwonyi mi daɓo lo n fyei n anyìɓəsisi nu, əsa ɓe lo n mi to ɓə je apmazhni n aɓədaye pyai m, ama mi ɓə gna fye əmi Dada əɓo n səsəiya. 26 Dna n əwyi yi, fye ɓə nya anya əɓo dna n əmi əye. Mi ta gna ge mi ɓə nya Dada əɓo nu n əfye əɓwi m. 27 Aawo, Dada ye fye lo n əwohnii, ntuge fye kwu yeye wu mi jesnu fye kwu gaiciyaga nge mi ɓe gbmiɓe n Shekwoyi aba nu. 28 Mi ɓə gbmiɓe n Dada aba nu, ma lodna n anyì; nsaiye mi gnyi mii fa anyì nu, ma jezelo da Dada."

29 Nlonu Yeisu amwutuyi ɓa gna, "Nsaiye ho daɓo lo səsəiya toge n aɓəda anyìɓəsisi nyai m. 30 Nsaiye yi kwu gyewye ge, ho kpe aɓo ye lo vnyanya jesnu kwo to ye n apmai lo əza wa nya ho əɓo m. Dəye kwo kwu zhni yii ga gaiciya nge ho ɓə gbmiɓe n Shekwoyi aba nu."

31 Yeisu wa dnaɓəgbe, "Fye kwu gaiciyaga nsayi? 32 Əsa ɓe lo jesnu ɓəhnihni kwo la ɓe, əsa n a ɓə la fye gnámyi, zahozahoyi woi lo əwo pwuwa. Fye ɓə la mi fa gnyi n əmi gbmanyi. Dudulonu mi to gnyi əmi gbmanyi nu m, ntuge əmi Dada kwnusnu lo n mii.

33 "Mi kwu aɓo ye gna fye, nabai nge dna n əmi nu n fye ɓa ɓwa bwugbafu. Dna n anyì ye, fye ɓa ɓwa bwugbawnu. Ama fye la bwugba dna kalá! Mi kwu nasala gyi tu n anyì tukwo."