1 She a ɓə la bwugbadna nge yi ɓa lo Italiya n əya nuwnanyai nu, a la Bwulus ɓədo n azhaluda ajei a kwu ɓa yafyi n bəzhetagyida akwnu, ai yi wo ge Jiliyos, n wo ɓə dna n akwnuyi anapyei aknyiknyi kampani nyi. 2 Ya lofyi n əya nuwnanya kwoi laka n Adiramyitiyu, kwoi shi kwa lo ayagyiba n ɓa ɓə ma lo n Asiya əknyi shikwogbe nyi, nlonu ya kwnufyi n shikwo. Arisitakwus, Makidoninyayi ɓə kwnusnu n yii, woi gbmi n Tasalonika.

3 Əfye kwa gyi zhi ya kwnuya zhi n Sidon əknyi; Jiliyos wa kwu abmyazhni Bwulus, wa fa wo wa lo əwo anugwnudo aba nabai ɓa vyi wo ɓo, ɓa ga wo anya n wo n əɓa apmai. 4 Ya kwuka n ɓo, ya je lofyi n əya nuwnanya, ya duya lo Saipwurus snuta, ntuge ase nukwoi ɓə ci ɓe n əyi awyei. 5 She yi ɓəə la pi shikwo ya ma lo vyivyiwyi n Kilikiya əknyii ɓədo n Pamfyiliya nyai, ya sakwnu zhi n Myira dna n Lisiya əknyi. 6 Dna n abaayi bəzhetagyida wa gye əya Alekzandariya nya shi n ɓo kwoi lo Itali, wa kwnu yi fyi n kwo. 7 Yi ɓə kwu anyipyei ɓwa n mwa bəgyé yii kpəlo n əzna pəceye, jesnu yii gyeazhnì n əya dnai, deca ya kpe Kimdus kpmayi si. She əse kaláda to ɓə ye nge yi wna əyi zokwo shi kwo kwnuce m, ya bmaya lo n Kəreti abmayii n awyei ce n Salmoni. 8 Ya znazna ma lo n shikwogbei n azhnìi, nlonu ya si aba ai yi ge Ayagyiba Manai, n wo vyivyiwyi n Lasiya əzhimii.

9 Əsa ɓə la yi wnuya n mwa tu n əzna jesnu əyi əyadna ɓə la pmagnyi n awusəgyi wu, ntuge nsaiye Nyipyei Abwizo nya ɓə la duya. Ntulonu Bwulus wa kwnu ɓa, 10 "Əfye, mi kwu gye nge əzna ye, kwo ye kwa ɓe n awusəgyi nu jesnu kwa ɓe n anya nuwnaɓwi yaakwoi əya nya ɓədo n akayai, jesnu n əyi awyewyeyii ce." 11 Ama bəzhetagyida, ədo n wo ɓə ɓa knà Bwulus ɓəda tnubwa nyi, wa zè wa vyi əyadnayi ɓəwu nu ɓədo n əya dagayii. 12 Shikwonyi ayagyiba to ɓə bmya n ɓa ɓá zhni vnyinyikwo fyi n ɓo m. Bəgyé ɓa gna yi gwodu ya dna əya nuwnanya lo, n awyetui nge yii si Fonikisi jesnu yii zhni vnyinkwo fyi n ɓo. Dəye ɓə zhni ayagyiba aba nu n kwo ɓə n awyei ce n Kəreti, kwo ɓə n awyei ce n snutakwo-shnikwó n snukwó-shnikwó.

13 She əse snutakwo nya ɓə ya ci pəceye, ɓa gye ɓa la abaɓwa ɓa znazna, ntulonu ɓa lo əyagyi əwnu ya ɓa dna əya lo n Kəreti shikwogbei. 14 To əsa kwa mwa m, vnuvnuyaakwo kaláda, n a yi kwo əye ge Snukwó-kpekwóɓwa əse nyi, kwa ci ɓe kwoi kwnu n mwuse. 15 Agbmaase ɓa wna əya nuwnanya, to ya shna myi n yi vyi əse m; ntulonu ya kwu aɓwa ga, ya wna əzna she kwo ɓə ci lo ncei. 16 Shi yi ɓə duya n mwuse ɓyiyi snuta n a yi kwo ge Kauda nyi, kwa yi dnaɓo n yi ɓa myi ya kwu əya wyewyeyignyinya wnakna, 17 ntulonu ayadnayi ɓa la əya wyewyeyignyinya ɓa yadna n əya dnagbmai. Nlonu ɓa du awnu ya shni n əya nuwnanya snuta n əkwohni nabai aa kwo wnashi n abagbmanyi. Ntuge ədna ɓə wo ɓa nge ɓa ɓá gwnu Siritis mwuse amwi, ɓa lo əya gyinya ya dna n shikwo, ɓa fa kwo kwa vyi əse lo. 18 Agbmaase ɓa wnu əyi əya nuwnanya ya n mwa kwokwo, əfye kwa gyi zhi, ɓa ya akaya kwnu ɓai sheya fyi n nuwna. 19 Dna n nyipyei taayi, ɓa she əya adosinya ya fyi n nuwna n əɓahni aɓwai. 20 She yi to ɓə gye nyipyei əwye kwo akpasi fyi n anyipyei bəgyé m, jesnu agbmaase ɓa gwodu ɓai gna cici, əyi vnyanya ya bwugba kwnuya n əyi pwopwo ɓo.

21 She əsa ɓə la mwa to ɓai je nyagyi gyi m, Bwulus wa laka gnyi n əɓa abye wa gna, "Əmi azaje, fye ɓə gna fya əmi ɓəwu gwo nge yi to kwuka n Kəreti m; nlonu nu, n yi ɓə ɓa pwo anya agbmazhni ye n anya nuwnaɓwii. 22 Ama nsaiye mi tna fye əɓwa nge fye kwu abwugba fyiakala, ntuge əzaho wyewyeyi to lo n fye n kwo ɓa ɓwu m, əya nuwnanya nu ɓwasnu n kwo ɓa kwu zhnagbma. 23 Nsu n sukwoi, maləka Shekwoyi nya; əza n mi dna n əwo akwnu nyi jesnu əza n mi zhni əwo tnutnu nyi, wo ɓə ma mi gnyi 24 jesnu wa gnai, ‘To wodna m, Bwulus. Ɓəshishi nu nge ho ɓə gnyiagnyi gnyi n Kaisa abye; jesnu Shekwoyi dna n əwo shebmyashi, wo kwu awyewyeyi vnyanya ga ho n ɓa kwnu znazna n hoi nyi.’ 25 Ntulonu, əmi azaje, fye kwu abwugba fyiakala, ntuge mi n gaiciyaganunui lo dna n Shekwoyi nge kwo ɓa ɓwazhni she wa gna mi nyi nu. 26 Dudulonu, yi ɓa kwu gwnukpe n amwi n mwuse ho."

27 Dna n nyipyei wocei-nyiiyi sukwo, yi ɓə ye lo ai gnyi yi, yii znuduya n Adriya shikwo, ngye dna n sukwo sadù, ayadnayi ɓa kwu kpe nge ɓa kwu wo vyivyiwyi n əknyii. 28 Ɓa mwi nuwna lolo gye, ɓa gye kwo lo apita tagyi ncei kpe shiiba. Əsa fyewyi jesnu, ɓa je mwi ɓa ɓwa əkwo lolo apita shiiciwagbmanyi. 29 Yii fyi yii wodna nge yi ɓa shegyi akwuta, ɓa ya ayagyinya fyi n shikwo ngwnu-anyi n avnu, jesnu yii zhniaduwa nge əfye kwo gyi. 30 Ayadnayi ɓa ye ɓahni nge ɓa bwusi ɓa fa əya nuwnanya, ɓa shni əya wyewyeyignyinya dna n shikwo, ɓai zhni ngye ɓa ye ɓa ya ayagyinya ho fyi n abyeɓwa. 31 Nlonu Bwulus wa gna bəzhetagyida ɓədo n akwnuyii, "Akpəge aza ye ɓa ye ɓa kwu kpefyi n əya nuwnanya ye, fye taa pwo m." 32 Ntulonu akwnuyi ɓa ce awnu ya n ɓa ɓə n əya wyewyeyignyinyai shi nyi jesnu ɓa fa kwo kwa wna əkwo zokwo.

33 Əfye kwoi ga gyi, Bwulus wa tna ɓa əɓwa əɓa vnyanya nge ɓa gyi nyagyi. Wa gna, "Anyipyei awoceanyi n ɓa la duya nyi, fye fyi ɓe n anyiɓəyeɓwi nu ciici jesnu ntna nyagyi gyii; fye too gyi nyahonyahoi m. 34 Nsaiye mi tna fye əɓwa nge fye kwu nyagyi gyi. Fye n əkwo apmai lo ntuge fya pwo. Əzaho to lo n əfye atasni n wo ɓa ɓwu əwo tukwoyi nuwna m, kwo gbmanyi." 35 Shi wo ɓə da ɓəye, wa knyi biledi jesnu wa sa Shekwoyi ami gnyi n əɓa abye vnyanya. Nlonu wa sa kwo wa ya gyi. 36 Əɓa vnyanya ɓa ɓwa bwugbakala ɓa gyi nyagyi ce. 37 Əyi vnyanya n yi ɓə fyi n əya nuwnanya nyi yi ɓə nyi tagyi-aba ncei kpe shiitnaaba cei tnanyi nu (276). 38 She ɓa ɓə kwu nyagyi gyi she ɓa ɓə ncei pma, ɓa ce əya akaya knyiya, ɓa she awyi ya fyi n shikwo.

39 She əfyé ɓə gyi zhi, to ɓa kpe aba ye n ɓa zhni m, ama ɓa gye nuwna n pmyima n amwii n ayagyibai, ɓaa kwo dna n bwugba ɓa lo n əya nuwnanyai n amwi yi, n ɓa ɓá myi. 40 She ɓa ɓə la ayagyinya ceya, ɓa fa ɓa fyi n shikwo. Njesnu ɓa awnu loya n kwo shi əyazokwo dna nya ɓwa, ɓa kwu əya abye wu n əse ɓwa, ɓa wna əzna lo shikwogbe. 41 Ama əya kwa shegyi n amwi kwaa kpeshì, əkwo abyeɓwa kwa byidna n amwi to kwa shna myi n znaznà m jesnu əya avnu kwaa gnyi kwoi ɓaya ntu anuwnadokwo anyacei sheknyi ɓo.

42 Akwnuyi ɓa kwu kwúlupa nge ɓa wu azhaluda nabai to ɓa ye əzahozahoyi n ɓa nge wo gbinuwna wa bwusi m. 43 Ama bəzhetagyida ɓə ncei pma wa gnyi Bwulus wyewyeyi, ntucenu to wa ye nge ɓa zhni əɓa kwúlupa əɓo m. Wa ga aza yi əgbe n ɓa ɓə ɓá myi n nuwnagbi, nge ɓa shefyi n nuwna ɓa wna əkpma. 44 Aza n ɓa ɓə ce nyi, ɓa zhni apma n ashnuwna jijii apatai, kwo kpe n əya nuwnanya apisa. Ń zokwo ye əzahozahoyi wa piyalo əkpma dna n nayida.