1 Shi yi ɓəə kwu aje gnami, ya kwnufyi n shikwo ya znazna cewo lo Kos. Əfye kwa gyi zhi, ya lo Rodis, ya kwuka n abaayi ya lo Patara. 2 Ya gye əya nuwnanya shi kwoi piyalo Fonishiya, ya lofyi n kwo, ya wna əzna. 3 Shi yi ɓə tawye ya gye Saipwurus, ya duya n əkwo snuta, ya znazna ya lo Siriya. Ya lo ya kwnuzhi n Taya, aba n əyi əya nuwnanya ɓə ye kwa kwnu akaya zhi nyi. 4 Ya zna amwutuyi shni n abaayi jesnu ya kwu kwnufyi n ɓai anyipyei tnaaba. Dna n Zafnu, ɓa gyi Bwulus əwye nge wo to lo Urishelima m. 5 She nyipyei ɓə la si n yi ɓa kwuka, ya fa n ɓo ya gwodu n əyi əznai. Əɓa vnyanya ɓədo n əɓa anyikwoi n aɓyii, ɓa gna yi ami, ɓaa kwnuya n yii n əzhiyaakwo, jesnu ya kwu ma n shikwo əgbe, ya knyiakwokwo zhi ya zhniaduwa. 6 Shi yi ɓə kwu aje gna mi, ya lofyi n əya nuwnanya, ɓa jezelo apyi.

7 Ya gwodu n əyi əznai fyi n əya, yii kwuka n Taya ya kwnuzhi n Pitolemi, aba n yi ɓə ɓyi əyi azaje əgna azanugbai n anyikwozai jesnu ya kwu kwnufyi n ɓai nyipyei ɓwugyi. 8 Əfye kwa gyi zhi, ya kwuka ya kwu si Kaisariya jesnu ya kwu fyi n Fyilibwus pwuwa, waazizhniyi, gbmanyi dna n anyagyignayi Tnaaba yi. 9 Wo ɓə n anyigwnu akwului ngwnu-anyi, n ɓa da sheɓəgwogna

10 Shi yi ɓə kwu fyi n əwo aba, anyipyei fyewyi, sheɓəgwognayi ai yi əwo əye nge Agabwus, wa shnizhi ɓe woi gbmi n Yahudiya. 11 She wo ɓə ɓe da yi, wa kwu Bwulus gigyiznu shnipa, wa pa əwohni aɓwa ɓədo n apitai wa gna, "Zafnu Gyigyiyi kwu gna, ‘Nlai nu n Ayahudiyi, fyi n Urishelima, ɓəə pa əza n əwo gigyiznu əpa ye shi nyi, jesnu ɓa ɓə la wo ga dna n Abyedo akwnu.’ "

12 She yi ɓə wo əɓo ye, əyi ɓədo n azajei ya gyi Bwulus əwye nge wo to gwnulo Urishelima m. 13 Nlonu Bwulus wa dnaɓəgbe, "Knyiyi nu zhni fyei ciɓwi jesnu fyei bma mi ədu a? Mi la əmihni kwu, toge ai ɓwa mi papa nu m, ama mii fyi, dna n Urishelima ntu Dagayi Yeisu əye ɓo." 14 She a to ɓə myi a kpma wo ce m, ya fa wo, ya gna, "Dagayi ɓəye, kwo zhni."

15 N dəye avnu, ya lofyi n zokwo ya gwnulo Urishelima. 16 Amwutuyi ho ɓai kwnu n Kaisariya ɓa da yi apye jesnu ɓa ɓe n yii n Manason pwuwa, ya kwu fyi n ɓo. Wo ɓə gbmi n Saipwurus nu, wo ɓə dna n aza n ɓa ɓə zhni amwutuyi kpmisnui.

17 She yi ɓə si Urishelima, əyi azaje azanugbai n anyikwozai ɓa gwo yi n agbmadai, 18 Əfye kwa gyi zhi, Bwulus ɓədo n əyii vnyanya, ya lo yii gye Jemyis, jesnu abyeda vnyanya ɓə fyi n abaayi. 19 Bwulus wa ɓyigna nlonu wa wu ɓa alafyiya n nu aɓwokwnu nunui, aɓo n Shekwoyi ɓəə kwu zhni fyi n Abyedo atasni ntu əwo ɓəvyitnutnu ɓo.

20 She ɓa ɓə wo ɓəye, ɓa ci Shekwoyi. Nlonu ɓa gna Bwulus: "Əyido, ho gyewye lo she Ayahudiyi bəgyé ɓa kwu gaiciyaga jesnu əɓa vnyanya ɓa n wyenyii lo ntu owa ɓwashi ɓo. 21 A ɓəə kwu gna ɓa ge, ho wunya lo nge Ayahudiyi vnyanya n ɓa fyi n Abyedo atasni nyi, ɓa la pmyiya n Mwusa owa ɓwashi, hoi gna ɓa ge, ɓa to je əɓa aɓyi nyaznu m, kwo ɓa gyianyì vyi əyi azakwoyi kwnunu m. 22 Yi ɓa zhni n wunanu a? Ɓəhnihni ɓa ɓá wo nge ho la ɓe, 23 ntulonu, zhni əɓo, n ya gna ho nge ho zhni. Aza lo n kwnusnu n yii ngwnu-anyi n ɓa kwu ana sni. 24 Kwu aza ye, ha dnaɓwado n ɓai n kwnunu pmyapmya nya, jesnu ha gba əɓa gyiwye, nabai a wnu ɓa tukwo. Nlonu əzahozahoyi ɓa kpé nge gaiciyanunui to lo, n alafyiya n a kwu wu n əho ɓo nyi m, ama nge ho shi owa gbetu əɓwa lo. 25 Ama ntu avyiyi Abyedo ɓo, yi kwu əyi bwugbadna əpa ka ga ɓa nge ɓa kwu fa ashna nyagyi gyi ɓo, n amisnii n abwui anyakpa nyai, n a pmyi ɓa bəgye nyi jesnu n asisiɓozhnii."

26 Əfye kwa gyi zhi, Bwulus wa kwu aza yi, wa pmya əwohni n kwnusnu n ɓai. Nlonu wa lodna n Dagayipwuwa ntuge woo shì nyipyei n pmyapmya kwnunu ɓə zo ncei, jesnu n nyagai n a ɓə ga ntu əzahozahoyi ɓo n ɓa.

27 She anyipyei tnaaba ɓəə kwu ga zo, Ayahudiyi ho ɓai kwnu n Asiya əknyi, ɓa gye Bwulus dna n Dagayipwuwa. Ɓa kwu deeji vnyanya abwugbakala zhi, ɓa wna wo, 28 ɓai ɓəwyi, "Əyi Aisrailayi aje, fye bma yi zhni! Əza nu nyi n wo wunya lo n zahozahoyi aba, jesnu n ɓwahoɓwahoi, tu n əyi aza tukwo, n əyi owai ɓədo n əyi aba yei. Gbowo n dəyei, wo kwu ɓe n Agirikiyii fyi n Dagayipwuwa, ɓanyi lá aba gyigyiyi ye tucegye." 29 (Ntuge ɓa ɓə kwu shni Trofyimwus Afyisuyi wyegye n kwnusnu n Bwulusii dna n əzhiyaakwo, ɓai zhninubwo nge Bwulus ɓəə la loɓe n woi nu n Dagayipwuwa.)

30 Əzhiyaakwo vnyanya kwaa totu gnyi, aza ɓa kwnuɓe n asəpa vnyanya ɓai bwusi. Ɓa wna Bwulus, ɓa gnyì wo, ɓa gbmi wo ya n Dagayipwuwa, nsayisayii ɓa kwu abwokwnumi gwu. 31 Ɓai ye ɓa zhnatna ɓa wu wo, Roma akwnuyi okwu bəzheyaakwo, wa wo n liya nge Urishelima əzhiyaakwo vnyanya ɓə nu gnyi ɓai kpmakwu. 32 Wa kwu akwnuyi atukwoda n akwnuyi hoi n əsagbmanyii ɓa bwusi shnilo da deeji n pyepyei. She agyikicizhniyi ɓə gye bəzheyaakwo n əwo akwnuyii, ɓa kwu fa Bwulus lu ɓo.

33 Bəzheyaakwo wa ɓe wa wna wo, jesnu wa ga əgbe nge a la wo pa n agbmai ngwnu-aba. Nlonu wa nya wo əɓo, əza n wo ɓə zhni, jesnu n əɓoi n wo ɓə zhni. 34 Azaho fyi n deeji ɓa ɓəwyi əɓo gbmanyi nya, azaje, əɓədo nya, ama shi bəzheyaakwo to ɓə ɓwa gaiciyanunui shi m, ntu akwukpmi ɓo, wa ga əgbe nge a la Bwulus lo ncei n akwnuyi apyiznudna. 35 She Bwulus ɓə si apitaknyikpe aba, snunutú agyikicizhniyi nya ɓə mwa, kwa zhni akwnuyi ɓa wo lashi. 36 Deeji n kwo ɓə vyi wo lo n avnu nyi, ɓa gwodu n wyiɓei, "A du wo əɓo ya!"

37 Shi akwnuyi ɓə ye ɓa la Bwulus lo ncei dna n akwnuyi apyiznudna, wa nya bəzheyaakwo əɓo, "Sukwu, mi gna ho əɓo ho?"

Wa dnaɓəgbe, "Ho wo Girik əbye? 38 Əho nu to zhni Masariyi n wo ɓə gnyiapaapa n atukwodai jesnu ha sabye n azaɓwawuyii adugwu ngwnu anyì lo zhabwikawu ncei əsa n kwo la shedna nyi m?"

39 Bwulus wa dnaɓəgbe, "Mi zhni Yahudiyi nu, mi gbmi n Tarsus nu n Kilikiya, əzhiyaakwo dnagbmai əzhiɓyi. Sukwu fa ma daɓo n hoi."

40 She bəzheyaakwo ɓə la əsa ga wo, Bwulus wa knyitu n apitaknyikpe aba asnada, wa zhni deeji n aɓwai. She ɓa ɓə kwu cepyi vnyanya, wa daɓo n ɓai n Ibraniyi nyitalai: