1 N anyipyei ngwnu-ata avnu, shi wo ɓə si əknyi yi, Fyesitus wa gbmi n Kaisariya wa gwnulo Urishelima, 2 aba n apirisiti atukwoda n Ayahudiyi abyedai ɓə kpmiyazhi n əwo abye, ntuge ɓa ɓe n aɓəmai kpe n Bwulus tukwo. 3 Ɓa gyiwye n Fyesitus aba, nabai wa wu ɓa bmyashi, a shna Bwulus aba lo ncei n Urishelima, ntuge ɓa ɓə gnyi ɓai ye əɓahni aza nu ɓa kwu ɓwufyi n abwugizhi, ɓai wu wo woi lo n zokwo. 4 Fyesitus wa dnaɓəgbe, "A n Bwulusii shi dnalo n Kaisariya nu, jesnu əsa taa mwa m, əmihni gnyi mii lo n ɓo nu. 5 Fa azaho n fye abyeda, ɓa kwnu ɓe n mii, ngye əza yi n kwu əɓo nukwoi ho zhni, ɓa lo ɓə kpe wo aɓəyi dna n abaayi."

6 Shi Fyesitus ɓə ɓwa anyipyei ngwnu-nyimwanyimwa ɓai lo ngwnu-awo dna n kwnusnu n ɓai, wa shnilo Kaisariya. Əfye kwa gyi zhi, wa yì aza fyi n bwokwnu jesnu wa ga əgbe nge a gbmiɓe n Bwulusii n əwo abye. 7 She Bwulus ɓə lodna, Ayahudiyi n ɓa ɓə kwnu shnizhi n Urishelima nyi, ɓa kwukazhi n shé wo gwnu. Ɓa kpe wo aɓo ashnawoi ama to ɓa myi ɓa ɓe n aɓəkwnuyii m.

8 Nlonu Bwulus wa da əwohni aɓəmaɓəgbedna: "Mi too zhni ɓəho abwi nya m, kwo n gbmiya n Ayahudiyi owa, kwo tu n Dagayipwuwa, kwo tu n Kaisa tukwo m."

9 Fyesitus, nabai wa myi wa wu Ayahudiyi bmyashi, wa gna Bwulus, "Ho ɓa ye ha gwnulo Urishelima a da ho owa gnyi n əmi abye n ɓwaayi ntu aɓo dəye tukwo?"

10 Bwulus wa dnaɓəgbe, "Nsaiye mi gnyagnyi gnyi n Kaisa owa bwokwnu nu, aba n kwo kwnuce a da mi owa. Mi too zhni Ayahudiyi əɓo nukwoi ho m, shi əho n hohni ho kpe ce əye lo dəidəi. 11 Ngye a ɓə la mi wna nu n ɓəgyi nukwoi hoi, n kwo kwnuce lo n əfyii, mi to ɓə wo əfyi ɓyi m. Ama ngye aɓo n Ayahudiyi yekpe n mi nyi, n a to gye gaiciya dna n ɓa m, əzaho to n ikwoi lo, wa ya mi dna n əɓa akwnu m. Əmi aɓwatna lo da Kaisa nu!"

12 Shi Fyesitus ɓə kwu sà n əwo abwokwnudai, wa gna: "Ho kwu ɓwuci ga Kaisa. Kaisa aba nu n ho ɓa lo!"

13 She anyipyei fyewyi ɓə duya, Əsu Agiripa n Byenisii ɓa ɓe Kaisariya, nabai ɓa ga Fyesitus amisa mwamwaga nya. 14 Shikwonyi ɓa ɓə ye ɓa ɓwa anyipyei bəgyé nu fyi n abaayi nyi, Fyesitus wa da Bwulus owa ɓo n əsui. Wa gna: "Əza dnalo n ya, n Fyelisi ɓə la wo fa dna n zhalu. 15 Shi mi ɓə lo Urishelima, apirisiti tukwoda ɓədo n Ayahudiyi abyedai, ɓa ɓe n aɓoi kpe n wo jesnu ɓa ɓà nge a la wo znuknyi.

16 "Ma gna ɓa nge Aromayi kwnunu nu to a ga əza dna n əwo aɓəkpeyi akwnu, to ai ga əza aba wa gnyi əwohni ń aɓo, n a cei kpe wo nyi m. 17 Shi ɓa ɓə ɓe n ya n kwnusnu n mii, mi to ɓə zhni kalala n ɓəda yei m, ama əfye kwa gyi zhi, ma yi abwokwnuda jesnu ma ga əgbe nge a duɓe n əza yii. 18 She əwo aɓəmayi ɓə kwukala zhi ɓa daɓo, ɓa to ɓə ɓe n ɓəkasa hoi tu n wo, she mi ɓə n əwyei tu nyi m. 19 N əkwoɓwi, ɓaa n ɓəhoi nu shi lo, aɓənakpeaje nya n woi, ntu əɓa kwnunu ɓo jesnu ntu əzaho ɓo n a ɓə zhni ai yi ge Yeisu, əza n wo ɓə la fyí, ama n Bwulus gna nge wo ye n wyewyeyi lo nyi. 20 Kwo ɓə kwu mi gbmiaje, she mi ɓə ɓa pmi aɓo ye pya gye; ntulonu ma nyaɓo kwo n wo ɓa ye wa lo Urishelima, a lo ə da wo owa dna n əɓo ntu aɓəma ye ɓo. 21 Ama she Bwulus ɓə tnaɓwa nge a lo n woi n Agwotusu aba nu, wo znu ɓəda ya, ma ga əgbe nge a la wo gwudna, nya əsa n mi ɓə myi ma tnu n woi n Kaisa aba."

22 Nlonu Agiripa wa gna Fyesitus, "Mi ɓa ye ma wo əza ye ɓəda n əmihni."

Wa dnaɓəgbe, "Nsu ho ɓei kna wo tnubwa."

23 Əfye kwa gyi zhi, Agiripa n Byenisii ɓa ɓe owa bwokwnu n mwamwa yaakwoi kpe jesnu ɓa lofyi n akwnuyi azayaakwoi, ɓədo n azayaakwoi əzhiyaakwo nya. She Fyesitus ɓə ga əgbe, a duɓe n Bwulusii. 24 Fyesitus wa gna: "Əsu Agiripa, n azai vnyanya n ɓa fyilo n ya n kwnusnu n yii, fye gye əza ye əwye lo! Ayahudiyi əzhi vnyanya ɓa kwu ənya ka, aɓəma nya, ga mi ntu əwo ɓo n Urishelima jesnu dna n Kaisariya n ya, ɓai ɓəwyi nge; kwo to gwo əza ye wo ye je anyìgyi n shnasnu m. 25 Mi to ɓwa ɓəho shi ń wa zhni, n kwo kwnuce lo n əfyii m, ama ntuge wo la lo n ɓwucii n Kaisa aba, mi la bwugbadna ma tnu n woi n Roma. 26 Ama mi to n nyaho kpokəloi lo, n mi ɓa ka ga Əza Duduyi ntu əwo ɓo m. Ntucenu mi la ɓe n woi n əfye aba vnyanya, N shnisnusnu n əho aba Əsu Agiripa, nabai aɓo n ɓa ɓá kwnuɓe n aɓo nyanya nyi, n mi ɓa ɓwa ɓəho ma ka ənya tu n wo tukwo. 27 Ntuge mi zhninubwo ge, kwo to n apmai lo ma tnu n zhaludai lo Roma ncei ntna aɓo akwnuwui n a cei kpe n wo tukwo m."