1 Nsayi əza ɓə nyi ai yi wo ge Ananiyasi, ɓədo n əwo nyikwoi Safyira, əɓa ce, ɓa ɓə la əknyi kwnú. 2 N əwo nyikwo akpéi ɓəhoɓəhoi nya, waa gyiwye kpeshì əwohni, ama wa ɓe n adoi n ɓa ɓə ce nyi, waa kwo yashi n atnutnuloyi abye.

3 Nlonu Byitusu wa gna, "Ananiyasi, kwa ze n wunanu Shetam wonyi la nu əho ədu knaaknà wonyi zhni hoi ceakata fyi Zafnu Gyigyiyi, ho nyi la gyiwye ho kpeshì əhohni, n ha kwnu əknyi ncei nyi a? 4 Kwo to ɓə zhni əho nya nu, ha kpe kwo kwnu m? Jesnu shi ho ɓə la kwo kwnu, gyiwye to ɓə shi n ho aba nu m? Knyiyi nu na zhni ho nyi zhninubwo ge ho zhni ɓəye pya a? Ho to ɓwa akatáce fyi zanyikwoci nu m, ama fyi Shekwoyi."

5 She Ananiyasi ɓə wo ɓəye, wa myiya shi wa fyí. Ədna yaakwo kwa wo aza vnyanya n ɓa ɓə wo əɓo n kwo ɓəə kwu zhni nyi. 6 Nlonu aɓyikasa ho ɓa ɓe, ɓa pwu əwo nayi əje, ɓa gbmiya lo n woi, ɓa byi.

7 N asnukna ngwnu-ata avnu, əwo nyikwo wa ɓe, to woi kpe əɓo əye n kwo ɓəə kwu zhni m. 8 Byitusu wa nya wo əɓo, "Gna mi, gyiwye nu nyi n əho n Ananiyasii ɓə kwnu əknyi nyii?"

Wa gna, "Əə, yi ɓə ɓwa kwo kwnu nlonu nù."

9 Byitusu wa gna wo, "Kwo ɓə zè n wunanu fya pakwúlu nabai fya tu Zafnu Dagayi nya mwi a? Knatnubwa! Aza apitabwada nu ɓwazhi nyi n abwokwnumi n ɓa byi əho əɓa nyi, jesnu ɓa ɓá gbmiya lo n hoi ce."

10 N əsagbmanyii wa myiya shi n əwo apita aba waa fyí. Nlonu aɓyikasa ɓa lo ɓe, ɓa gye wo n fyí shi, ɓa gbmiya lo n woi ɓa byi wo ma əwo əɓa. 11 Ədna yaakwo kwa wo ikilisiya vnyanya jesnu n azai vnyanya n ɓa ɓə kwu aɓo ye wo nyi.

12 Amwutuyi ɓa wu aznù bəgyé, n aɓo awowoi fyi n aza. Njesnu avyiyi vnyanya ɓə zhni ɓai yezhi n Sulemanu ashilagyí nu. 13 Əzaho to ɓə myi woi ye əwohni ɓədo n ɓai m, kwo shikwonyi aza ɓə zhni ɓai ga ɓa mwamwa n mwa. 14 Dudulonu, azanugbai n anyikwozai ɓə gnyi ɓai gna bəgyé mwamwa n ɓa ga gaiciya dna n Dagayi, nlonu ɓa kwu ɓe ɓa bəgyé. 15 Ntucenu, aza ɓa ɓe n anyasnayii kpe n adnadna jesnu ɓa kwu ɓa yakpe n agədo n apəcei, nabai kwo n Byitusu jejelukwo nu ɓa ɓwa yakpe azaho n ɓa, woi duya. 16 Deeji ce kwaa yezhi ɓai kwnu n azhimi n ɓa she Urishelima gwnu nyi, ɓai ɓe n anyasnayii ɓədo n aza yii ń azafnu ajegbmiyi ɓə gna ɓa gnagna, jesnu əɓa vnyanya, a ɓə la ɓa kágna.

17 Nlonu Pirisiti dnagbmai n əwo atnutnuyi ajei vnyanya, n ɓa ɓə kwnu n Asadusiyi okwu nyi, ɓa kwu nu zhi n shewoi. 18 Ɓa wna atnutnuloyi ɓa kwu ɓa gwufyi n zhalu azagbàyi nya. 19 Ama dna n sukwo yi, maləka Dagayi nya wa gwú zhalu abwokwnumi ya, jesnu wa kwnu ɓa ɓe ncei. 20 Wa gna, "Fye lo, fye kwu zhi n Dagayipwuwa ashilagyí, fya gna aza aɓo vnyanya wyewyeyi woiwoi ye nya."

21 Əfye kwa gyi zhi, ɓa lofyi n Dagayipwuwa ashilagyí, ngye shi a ɓə gna ɓa, ɓa ya aza nyawu. She pirisiti dnagbmai n əwo azajei ɓə si adogwnuba, ɓa yi Sahindiri zhi n abagbmanyi; Israila abyeda ɓa yezhi n nunui: Ɓa tnu tnutnu lo zhalu nge a ɓe n atnutnuloyii.

22 Ama she ɓa ɓə si zhalu, to abagwuyi atukwoda ɓa gye atnutnuloyi n fyi ɓo m. Ntulonu ɓa jezelo ɓa wu alafyiya, 23 "Ya lo yi nyi gye zhalu n gwugnyi myam, n abagwuyii gnyiagnyi zhi n abwokwnumi agbe; ama she ya gwu abaya, yi to gye zahozahoyi n dna m." 24 She ɓa ɓə wo alafyiya ye, Dagayipwuwa gwuyi tukwoda n apirisiti atukwodai, ɓa kwu zhi n ɓəyeɓwui, ɓai saaɓo, aba n əɓo ye ɓə zozhi.

25 Nlonu əzaho wa ɓe wa gna, "Fye kwu gyega! Aza n fye yai ɓa fyi n zhalu nyi, ɓa fyi nu n Dagayipwuwa ashilagyí ɓai wunya." 26 She ɓa ɓə wo dəye, abagwuyi tukwoda wa lo n əwo atukwoda ajei ɓa ɓe n atnutnuloyii. Ɓa to ɓə zhni apma n akalái m, ntuge ɓa ɓə wodna nge aza ɓa knyi ɓa akwuta.

27 A lo ɓe n atnutnuloyii jesnu a kwu ɓa zhi n Sahindiri abye, nabai pirisiti dnagbmai wa nya ɓa aɓo. 28 Wa gna, "Yi ɓə la əgbe tu fye n əwyei bmyibmyii ge fye to je nyawu dna n əye ye m. Dudulonu fye la Urishelima nu gnyi n əfye nyawui, jesnu fye la bwugba dna nabai fya kwu yi zè aɓəgyiyi əza ye ami nya."

29 Byitusu n atnutnuloyii ajei ɓa dnaɓəgbe, "Ɓəshishi nu ya shi Shekwoyi ɓəda əɓwa a fa zanyikwoci nya! 30 Shekwoyi əyi azakwoyi nya, wo ɓə la Yeisu laka n əfyi, əza n fye ɓə gyi wo tu n znudu fya wo wu nyi. 31 Shekwoyi ɓə la wo latu gnyi n əwo ɓwaizheɓwa, wo la zhni Əbeɓyi jesnu n Gnyiyii nabai n wo ɓa myi wa ɓe n Israilai fyi n abwuye jesnu wa zo ɓa aleifyi. 32 Yi zhni aɓo ye aɓəkwnuyi nu, nlonu cè, Zafnu Gyigyiyii, əwo nu n Shekwoyi la ga aza yi n ɓa vyi əwo ɓəgbetu nyi."

33 She ɓa ɓə wo ɓəye, ɓa kwu zhi n pwunu, jesnu ɓa ye ɓa wu ɓa. 34 Ama Farisiyi n a ɓə yi wo nge Gamaliya nyi, owa nyawuyi, əwo ń aza vnyanya ɓə zhni ɓai ga wo mwamwa nyi, wa laka gnyi n Sahindiri, wa ga əgbe ge a la aza ye kwnuya zhi n əbmyi kpa. 35 Nlonu wa daɓo n Sahindiri yi: "Aisrailayi, fye zhni ɓəye nubwo pəceye əɓo n fye ye fya zhni kpe aza ye nyi. 36 N əsa avnu nya, Tadiyos ɓə kpeyaɓe, woi gna ge wo zhni əzaho nu, jesnu aza ngye adugwu-anyi ɓa kwu vyi wo. Aa wo wu, əwo avyiyi vnyanya ɓaa gnamyi, əɓo yi to kwa shna tukwogyi m. 37 Ń əwo avnu, Yahuda Gəliliyi wa kpeyaɓe n anyipyei azaba nya, jesnu wa sabye n aza afasayii. Əwohni ce, aa wo wu jesnu əwo avyiyi vnyanya ɓaa gnamyi. 38 Ntucenu, əɓo n kwo shi nsaiye nyi, mi ga fye shaula: Fye kwu aza ye ɓwa fa lonu! Fye kwu ɓa ya ɓa lo! Ngye əɓa tnutnu ɓətukwo kwo ɓə pá ń zanyikwoci nu, kwo ɓə la zè gbəloi. 39 Ama ngye kwo gbmi n Shekwoyi nu, fye taa myi fya shni kwo ɓəkpma m; fye ɓə ɓwa gye fye zhi fyei snukwnú n Shekwoyii nu."

40 Əwo ɓəda kwaa əɓa bwugba yami. Ɓa yi atnutnuloyi fyi n əmi jesnu ɓaa ɓa gyinaya. Nlonu ɓa tu ɓa ɓəgbe ge ɓa to je ɓəda da dna n Yeisu əye m, nlonu, ɓa ya ɓa aɓwa ɓa lo.

41 Atnutnuloyi ɓa fa Sahindiri, ɓai nya agbmada ntuge a la ɓa ba fyi n aza n ɓa kwu kwnuce ɓa gyeazhnì vnyinkwo nya ntu n Yeisu əye ɓo. 42 Fyegyifyegyi, fyi n Dagayipwuwa ashilagyí jesnu ɓai vyi apwuwa n apwuwai, to ɓa fa nyawu ɓo m kpeekpe, ɓai zhni nabagyi manai waazi nge Yeisu nu zhni Masifu.